ខេត្តសៀមរាប ៖ ប្រធានមន្ទីរធម្មការនិងសាសនាខេត្ត សហការជាមួយអាជ្ញាធរស្រុកស្វាយលើ បានចុះទៅផ្អាកនិងបង្គាប់ឱ្យធ្វើកិច្ចសន្យាបញ្ឈប់ការសាងសង់រូបសំណាកតាមរចនាបថសាសនាយួន ដែលមានរូបព្រះនាងគង់ស៊ីអ៊ឹម ព្រះយូឡាយ និងគ្រឿងសក្ការៈមួយចំនួនទៀត
ខេត្តសៀមរាប ៖ ប្រធានមន្ទីរធម្មការនិងសាសនាខេត្ត សហការជាមួយអាជ្ញាធរស្រុកស្វាយលើ បានចុះទៅផ្អាកនិងបង្គាប់ឱ្យធ្វើកិច្ចសន្យាបញ្ឈប់ការសាងសង់រូបសំណាកតាមរចនាបថសាសនាយួន ដែលមានរូបព្រះនាងគង់ស៊ីអ៊ឹម ព្រះយូឡាយ និងគ្រឿងសក្ការៈមួយចំនួនទៀត ដែលពួកគេសាងសង់ឡើងដោយមិនបានសុំច្បាប់ពីអាជ្ញាធរ ។ ការចុះទៅបញ្ជាឱ្យផ្អាកការសាងសង់នេះ ធ្វើឡើងកាលពីថ្ងៃទី២៨ ឧសភាកន្លងទៅ ដែលមានចម្ងាយប្រមាណជាង១០០គីឡូម៉ែត្រពីក្រុងសៀមរាប ស្ថិតនៅក្នុងភូមិផ្ចឹកជ្រំ ឃុំកន្ទួត ស្រុកស្វាយលើ ។
តាមប្រភពពីពលរដ្ឋបានឱ្យដឹងថា ការតាំងរូបសំណាកបដិមាតាមបែបសាសនាវៀតណាមនេះ ទើបតែកើតឡើងនៅឆ្នាំ២០១៥នេះ នៅភូមិផ្ចឹកជ្រំ ឃុំកន្ទួត ស្រុកស្វាយលើ បន្ទាប់ពីមានវត្ដមានជនជាតិវៀតណាមមួយក្រុម បានមកតាំងទីលំនៅ នៅទីនោះកាលពីឆ្នាំ២០១២កន្លងមក ។ ប្រភពបន្ដថា ការសាងសង់និងតាំងរូបសំណាកបែបសាសនាវៀតណាមនោះ មិនមានច្បាប់អនុញ្ញាតឡើយ ។
ប្រភពបន្ថែមថា កាលពីពេលថ្មីៗនេះ ជនជាតិវៀតណាមពីរនាក់ប្តីប្រពន្ធ ត្រូវបានសមត្ថកិច្ចស្រុកស្វាយលើឃាត់ខ្លួន បន្ទាប់ពីរកឃើញថា មកស្នាក់នៅដោយមិនមានច្បាប់អនុញ្ញាតពីអាជ្ញាធរ។ នៅថ្ងៃទី០១ មិថុនា មានក្រុមការងារចុះទៅពិនិត្យនៅតំបន់នោះ ដើម្បីរកព័ត៌មានជាក់លាក់ពីការតាំងរូបសំណាកសាសនាអត់ច្បាប់នេះ។
ជុំវិញករណីនេះដែរ លោក វណ្ណ ប៊ុណ្ណា ប្រធានមន្ទីរធម្មការនិងសាសនាខេត្ដ បានឱ្យដឹងនៅព្រឹកថ្ងៃទី០១ មិថុនាថា លោកបានឱ្យក្រុមការងារមន្ទីរធម្មការនិងសាសនាខេត្ត សហការជាមួយអាជ្ញាធរមូលដ្ឋានចុះទៅផ្អាកទីតាំងសាងសង់រូបសំណាកសាសនានៅភូមិផ្ចឹកជ្រំ ឃុំកន្ទួត ស្រុកស្វាយលើនោះហើយ ។ ក្រុមការងារបានធ្វើកិច្ចសន្យាបញ្ឈប់ជាលាយល័ក្ខណ៍អក្សរពីម្ចាស់ទីតាំង២នាក់ប្តីប្រពន្ធដែលប្តីឈ្មោះ លី បៀន និងប្រពន្ធឈ្មោះ ជុំ ញ៉ាវ ជាជនជាតិវៀតណាម ។
លោកប្រធានមន្ទីរបន្តថា អ្នកលួចសាងសង់វត្តខុសច្បាប់នេះ ជាសង្ឃវៀតណាមឈ្មោះ តាំង មិន ហើយសង្ឃអង្គនេះមកត្រួតពិនិត្យវត្តនេះក្នុងមួយខែម្តង ដោយមានជាងសំណង់ចំនួន៦នាក់ ។ លោកបញ្ជាក់ថា ការសាងសង់វត្តនេះគឺជារឿងខុសច្បាប់ ព្រោះពួកគេមិនបានសុំច្បាប់ត្រឹមត្រូវទៅអាជ្ញាធរ ហើយករណីនេះលោកនឹងធ្វើរបាយការណ៍ដាក់ជូនលោកអភិបាលខេត្តដើម្បីធ្វើការត្រួតពិនិត្យនិងមានចំណាត់ការបន្ត ។
គួររំលឹកថា នាប៉ុន្មានឆ្នាំនេះគេសង្កេតឃើញមានសកម្មភាពជនជាតិវៀតណាមសាងសង់រូបសំណាកសាសនារបស់ពួកគេដោយគ្មានច្បាប់ទម្លាប់ ដូចជានៅលើភ្នំបូកគោ និងនៅកោះក្របី កណ្តាលសមុទ្រក្នុងខេត្តកោះកុងជាដើម ហើយពេលនេះធ្លាក់មកដល់ខេត្តសៀមរាបម្តង ។
លោកជំទាវរដ្ឋមន្ត្រីក្រសួងវប្បធម៌ ភឿង សកុណា ត្រូវបានវិទ្យុផ្សាយជាខេមរភាសាមួយដកស្រង់ប្រសាសន៍ថា ក្រសួងវប្បធម៌ នឹងសហការជាមួយក្រសួងអប់រំ ក្រសួងទេសចរណ៍ ក្រសួងធម្មការជាដើម ដើម្បីចុះស្រាវជ្រាវបន្ថែមលើបញ្ហានេះ ។ បើវៀតណាមដាក់តាំងរូបបដិមាដោយចិត្តឯង ដោយមិនមានការអនុញ្ញាតពីអាជ្ញាធរទេ នោះនឹងចាត់វិធានការដូចនៅខេត្តកោះកុងដែលដុតចោល ។ លោកជំទាវបញ្ជាក់ថា នៅខេត្តកោះកុង ឃើញលោក ទៀ វិញ មើលទៅដូចជាអត់មានការអនុញ្ញាតអីទេ ដូច្នេះយើងត្រូវមើលតាមផ្លូវច្បាប់ បើសិនកិច្ចការឆ្លងកាត់តាមអាជ្ញាធរ សមត្ថកិច្ចដែលពាក់ព័ន្ធអនុញ្ញាត អុីចឹងគេមាននីតិវិធីរបស់គេ ប៉ុន្តែបើធ្វើដោយចិត្តឯងអត់មានការអនុញ្ញាតអីទេ នោះគឺខុសច្បាប់ហើយ ។
បើតាមអាជ្ញាធរស្រុកស្វាយលើ បានអះអាងថា មានជនជាតិវៀតណាមប្រមាណ១០០គ្រួសារ ចូលទៅតាំងទីលំនៅក្នុងភូមិផ្ចឹកជ្រំ ឃុំកន្ទួត ស្រុកស្វាយលើ និងបានសាងសង់វិហារ និងតាំងរូបបដិមាបែបជំនឿសាសនាវៀតណាមនៅក្នុងស្រុកនេះ ខណៈប្រជាពលរដ្ឋខ្មែរនៅទីនោះមានត្រឹមតែ៧០គ្រួសារប៉ុណ្ណោះ ។
កាលពីថ្ងៃទី២០ ខែធ្នូ ឆ្នាំ២០១៤ អង្គការលីកាដូរកឃើញជនជាតិវៀតណាមយករូបបដិមាបែបសាសនារបស់ពួកគេរួមមាន ព្រះនាងគង់ស៊ីអ៊ឹម រូបព្រះពុទ្ធ លោកតាចិន និងរូបថតហូជីមិញ ដាក់នៅក្រោមល្អាងថ្មជាង១០ និងរៀបដុំថ្មជាផ្នូរប្រមាណជិត២០ តំណាងឱ្យវីរបុរសរបស់ពួកគេលើភ្នំបូកគោ ខេត្តកំពត ចំនួនពីរកន្លែង គឺនៅតំបន់វាលស្រែប្រាំរយ និងតំបន់ប្រវាំងកូន សម្រាប់គោរពបូជា និងធ្វើសមាធិ តែបញ្ហានោះបានស្ងប់ស្ងាត់ហើយនាពេលនេះ ។
ដោយឡែក នៅខេត្តកោះកុង កាលពីដើមខែមេសា ឆ្នាំ២០១៥ មេបញ្ជាការកងទ័ពជើងទឹក លោក ទៀ វិញ បានសហការជាមួយកម្លាំងចម្រុះរបស់ខេត្តកោះកុងដុតបំផ្លាញរូបសំណាកព្រះនាងគង់ស៊ីអុីម និងកន្លែងធ្វើសមាធិមួយចំនួនទៀត នៅឃុំកាពិ ស្រុកកោះកុង ខេត្តកោះកុង ដែលសមត្ថកិច្ចអះអាងថា ជនជាតិវៀតណាមបានមកធ្វើសមាធិនៅទីនោះដោយខុសច្បាប់ ៕
ចែករំលែកព័តមាននេះ