ទីក្រុងសេអ៊ូល៖ នៅទីបំផុត ប្រធានាធិបតីកូរ៉េខាងត្បូង លោកយូនស៊ុកយូល ត្រូវរដ្ឋសភាបោះឆ្នោតព្យួរតំណែងរបស់គាត់បានសម្រេចហើយនៅល្ងាចថ្ងៃសៅរ៍នេះ។ សូមបញ្ជាក់ឡើងវិញថាតំណែងនេះមិនទាន់ត្រូវបានដកហូតជាស្ថាពរនៅឡើយទេ។ លោកយូនស៊ុកយូននៅមានពេលវេលាវែងឆ្ងាយតទៅមុខទៀតដើម្បីតតាំងក្ដីនៅក្នុងតុលាការ និងឡើងការពារទង្វើរបស់គាត់ដែលប្រកាសប្រើច្បាប់អាជ្ញាសឹក។
តាមផ្លូវច្បាប់ សភានឹងរុញសំណុំរឿងនេះបន្តទៅតុលាការធម្មនុញ្ញដើម្បីសម្រេចថាតើត្រូវដកតំណែងរបស់លោកយូនស៊ុកយូលជាស្ថាពរ ឬត្រូវប្រគល់តំណែងជូនគាត់វិញ។ នៅក្នុងសម័យកាលអន្តរកាលនេះ នាយករដ្ឋមន្ត្រីកូរ៉េខាងត្បូង លោកហានដុកស៊ូ (Han Duck-soo) នឹងកាន់តំណែងជាប្រធានាធិបតីស្ដីទី។ ចំណែកលោកយូនស៊ុកយូលអាចបន្តអង្គុយនៅក្នុងខុទ្ទកាល័យប្រធានាធិបតីដដែល ជាលក្ខណៈទៅអង្គុយលេងដោយគ្មានភារកិច្ច និងតួនាទីអ្វីទាំងអស់។
លោកហានដុកស៊ូសន្យាថាលោកនឹងខិតខំបំពេញការងារឱ្យអស់ពីកម្លាំងកាយចិត្តដើម្បីធ្វើឱ្យរដ្ឋាភិបាលមានស្ថិរភាពឡើងវិញ។ នៅក្នុងគណបក្សស្ដាំនិយម ឬអភិរក្សនិយមនៅកូរ៉េខាងត្បូង លោកយូនស៊ុកយូលជាប្រធានាធិបតីទី២ដែលត្រូវសភាបោះឆ្នោតព្យួរតំណែងបន្ទាប់ពីលោកស្រីប៉ាក់ឃុនហេ (Park Geun-hye) ដែលជាកូនស្រីរបស់អតីតមេដឹកនាំផ្ដាច់ការប៉ាក់ជុងហ៊ី (Park Chung-hee) ក៏ត្រូវសភាព្យួរតំណែងដូចគ្នាកាលពីឆ្នាំ២០១៧។
ក្រោយមក លោកស្រីប៉ាក់ឃុនហេត្រូវតុលាការសម្រេចដកហូតតំណែងជាស្ថាពរ និងផ្ដន្ទាទោសដាក់ពន្ធនាគារថែមទៀត។ បើប្រៀបធៀបគ្នាទៅ, ទោសកំហុសរបស់លោកស្រីប៉ាក់ឃុនហេស្រាលជាងលោកយូនស៊ុកយូលឆ្ងាយណាស់បើតុលាការរកឃើញទោសកំហុសដូចការចោទប្រកាន់មែន។ លោកយូនស៊ុកយូលទោសធ្ងន់ជាង។ ទោសក្បត់ជាតិ និងទោសប្រឆាំងនឹងរដ្ឋគឺមានតែប្រហារជីវិតប៉ុណ្ណោះសម្រាប់កូរ៉េខាងត្បូង។
ក្រុមអ្នកហែបាតុកម្មដែលទាមទារដកតំណែងរបស់លោកយូនស៊ុកយូលជាយូរមកហើយនោះ គ្រាន់តែទទួលដំណឹងថាសភាបោះឆ្នោតព្យួរតំណែងរបស់គាត់បានសម្រេចហើយ ពួកគេសប្បាយហ៊ោរកញ្ជ្រៀវយ៉ាងកងរំពង។ ផ្ទុយទៅវិញ ក្រុមអ្នកគាំទ្រលោកយូនស៊ុកយូលនាំគ្នាកាត់រំសាយទៅផ្ទះរៀងៗខ្លួនក្រោយពេលទទួលដំណឹងថាសភាបោះឆ្នោតព្យួរតំណែង។
យោងតាមលទ្ធផលឆ្នោតសភាលើកនេះ អ្នកតំណាងរាស្ត្រ២០៤នាក់បោះឆ្នោតគាំទ្រញត្តិស្នើសុំដកតំណែង, អ្នកតំណាងរាស្ត្រ៨៥រូបបោះឆ្នោតជំទាស់នឹងញត្តិនោះ, ៣រូបបោះឆ្នោតអនុបវាទ និង៨សំឡេងជាសន្លឹកឆ្នោតមិនបានការ។ ក្រុមគណបក្សប្រឆាំងទាំងតូចទាំងធំប្រមូលបាន១៩២សំឡេង។ ដូច្នេះ មានន័យថាក្រុមអ្នកតំណាងរាស្ត្ររបស់គណបក្សកាន់អំណាចយ៉ាងតិច១២រូបបានចូលរួមគាំទ្រញត្តិនោះ។
ជាបន្តទៅទៀតនេះ តុលាការធម្មនុញ្ញមានពេល៦ខែដើម្បីពិនិត្យមើលសំណុំរឿងនេះឡើងវិញមុននឹងចេញសេចក្ដីសម្រេចជាស្ថាពរ។ បើតុលាការសម្រេចថាត្រូវតែដកតំណែងរបស់លោកយូនស៊ុកយូល ពេលនោះប្រទេសកូរ៉េខាងត្បូងត្រូវរៀបចំការបោះឆ្នោតជ្រើសរើសប្រធានាធិបតីជាថ្មី។ តាមពិត ការប្រកាសច្បាប់អាជ្ញាសឹកកាលពីយបថ្ងៃអង្គារសប្ដាហ៍មុននោះគ្មានផលចំណេញសម្រាប់លោកយូនស៊ុកយូល, សម្រាប់គណបក្សរបស់គាត់ និងសម្រាប់សង្គមជាតិទាល់តែសោះ។
បើត្រឹមតែអស់តំណែងប្រធានាធិបតីមួយមុខមិនសូវអីទេ។ ប៉ុន្តែលោកក៏កំពុងជាប់ក្ដីក្ដាំនៅក្នុងតុលាការព្រហ្មទណ្ឌថែមទៀត។ សមត្ថកិច្ចកំពុងស៊ើបអង្កេតយ៉ាងស៊ីជម្រៅ និងចាប់ខ្លួនមន្ត្រីធំដែលត្រូវគេសង្ស័យថាចូលរួមនៅក្នុងអំពើក្បត់ជាតិ។ ឧទាហរណ៍ចាប់ខ្លួនអតីតរដ្ឋមន្ត្រីការពារជាតិ, អតីតរដ្ឋមន្ត្រីមហាផ្ទៃ, អគ្គស្នងការនគរបាលជាតិ និងមន្ត្រីជាច្រើនទៀត៕
ចែករំលែកព័តមាននេះ