ទីក្រុងគូឡាឡាំពួរ៖ ទឹកជំនន់កំពុងវាយលុកយ៉ាងខ្លាំងក្លានៅម៉ាឡេស៊ី និងថៃ ជាហេតុបង្ខំឱ្យមនុស្សរាប់ម៉ឺននាក់ចាកចោលផ្ទះសម្បែងរបស់ខ្លួនដើម្បីស្វែងរកទីកន្លែងសុវត្ថិភាព។ ទីតាំងដែលរងគ្រោះស្ថិតនៅប្រទេសថៃភាគខាងត្បូង និងតំបន់ព្រំដែនម៉ាឡេស៊ី-ថៃ ដែលជាចំណុចក្បែរៗគ្នា។ រហូតមកដល់ពេលនេះ មនុស្ស៨នាក់បានស្លាប់នៅប្រទេសថៃ និងម៉ាឡេស៊ី។…
ទីក្រុងគូឡាឡាំពួរ៖ ទឹកជំនន់កំពុងវាយលុកយ៉ាងខ្លាំងក្លានៅម៉ាឡេស៊ី និងថៃ ជាហេតុបង្ខំឱ្យមនុស្សរាប់ម៉ឺននាក់ចាកចោលផ្ទះសម្បែងរបស់ខ្លួនដើម្បីស្វែងរកទីកន្លែងសុវត្ថិភាព។ ទីតាំងដែលរងគ្រោះស្ថិតនៅប្រទេសថៃភាគខាងត្បូង និងតំបន់ព្រំដែនម៉ាឡេស៊ី-ថៃ ដែលជាចំណុចក្បែរៗគ្នា។ រហូតមកដល់ពេលនេះ មនុស្ស៨នាក់បានស្លាប់នៅប្រទេសថៃ និងម៉ាឡេស៊ី។
មនុស្សជាង៨ម៉ឺននាក់ត្រូវអាជ្ញាធរជម្លៀសទៅស្នាក់នៅក្នុងជំរំបណ្ដោះអាសន្នចំនួន៤៦៧កន្លែងនៅម៉ាឡេស៊ី។ នៅរដ្ឋចំនួនបីនៃប្រទេសម៉ាឡេស៊ីគឺរដ្ឋកេឡាន់តាន់ (Kelantan), ថេរេនហ្កានូ (Terengganu) និងសារ៉ាវ៉ាក់ (Sarawak) គេរកឃើញសាកសពជនរងគ្រោះបួននាក់។ នេះបើយោងតាមការបង្ហើបឱ្យដឹងពីមន្ត្រីទទួលបន្ទុកខាងគ្រប់គ្រងគ្រោះមហន្តរាយ។
ក្រឡេកទៅមើលស្ថានភាពទឹកជំនន់ប្រទេសថៃឯណោះវិញ គេឃើញថាថៃភាគខាងត្បូងក៏កំពុងរងគ្រោះយ៉ាងដំណំដោយសារគ្រោះទឹកជំនន់ផងដែរ។ នៅខេត្តប៉ាតានី គេរកឃើញសាកសពជនរងគ្រោះ២នាក់ ខណៈដែលនៅខេត្តសុងក្លារកឃើញសាកសព២នាក់ដូចគ្នា។ នេះបើតាមនាយកដ្ឋានគ្រប់គ្រងគ្រោះមហន្តរាយរបស់ថៃប្រកាសនៅលើបណ្ដាញហ្វេសប៊ុក។
នៅប្រទេសថៃភាគខាងត្បូងដដែល គេឃើញថាផ្ទះរបស់អ្នកស្រុកជាង២,៤សែនខ្នងកំពុងរងផលប៉ះពាល់យ៉ាងខ្លាំងដោយសារទឹកជំនន់។ មានន័យថាអាចលិចលង់, ខូចខាត ឬបាក់រលំទាំងស្រុងទៅក្នុងទឹកបន្ទាប់ពីមានភ្លៀងធ្លាក់ខ្លាំងជាច្រើនថ្ងៃជាប់ៗគ្នា។ តាមរយៈរូបភាពដែលគេទទួលបានពីកន្លែងទឹកជំនន់ផ្ទាល់ គេឃើញថាហាងលក់ទំនិញត្រូវទឹកលិចត្រឹមជង្គង់។
ក្រុមអ្នកជួយសង្គ្រោះត្រូវធ្វើដំណើរពីផ្ទះមួយទៅផ្ទះមួយដើម្បីដឹកមនុស្សចេញពីតំបន់លិចទឹកដោយប្រើទូកកៅស៊ូ។ ប្រជាជនរស់នៅខេត្តប៉ាតានីប្រាប់ថាទឹកជំនន់លើកនេះហក់ឡើងខ្ពស់។ ដូច្នេះ ពួកគេគ្មានឱកាសឆក់យកឥវ៉ាន់ ឬរបស់របរមានតម្លៃមកតាមខ្លួនបានឡើយ។ ដើម្បីដោះស្រាយបញ្ហាទឹកជំនន់លើកនេះ នៅម៉ាឡេស៊ី អាជ្ញាធរបានចាត់ក្រុមការងារដើម្បីជម្លៀសមនុស្សដែលរស់នៅក្នុងតំបន់រងគ្រោះ។
អាជ្ញាធរឧតុនិយមនៅក្នុងប្រទេសទាំង២ព្យាករថ្លែងថាភ្លៀងនឹងបន្តធ្លាក់ខ្លាំងរហូតដល់ថ្ងៃសៅរ៍សប្ដាហ៍នេះ។ ឧបនាយករដ្ឋមន្ត្រីម៉ាឡេស៊ី លោកអាម៉ាត់ ហ្សាហ៊ីត ហាមីឌី (Ahmad Zahid Hamidi) ថ្លែងថាតាមមើលទៅ គ្រោះទឹកជំនន់លើកនេះទំនងជាមានសភាពធ្ងន់ធ្ងរជាងឆ្នាំ២០១៤ទៅទៀត។ កាលនោះ មនុស្សជាង១សែននាក់ត្រូវជម្លៀសខ្លួនចេញពីផ្ទះសម្បែង។
នៅម៉ាឡេស៊ីដដែល គេឃើញថាបុគ្គលិកសង្គ្រោះបន្ទាន់រាប់ពាន់នាក់បានចុះទៅតាមបណ្ដារដ្ឋ១ចំនួនដែលកំពុងរងគ្រោះដោយសារជំនន់ទឹកភ្លៀងដោយប្រើប្រាស់ទូកកៅស៊ូ រថយន្ត និងឧទ្ធម្ភាគចក្រ។ នេះបើយោងតាមប្រសាសន៍របស់លោកឧបនាយករដ្ឋមន្ត្រីម៉ាឡេស៊ីដែលលោកក៏ជាប្រធានគណៈកម្មការជាតិទទួលបន្ទុកខាងគ្រប់គ្រងគ្រោះមហន្តរាយផងដែរ៕
ចែករំលែកព័តមាននេះ