ទីក្រុងសេអ៊ូល៖ កូរ៉េខាងត្បូងបានបញ្ចេញយន្តហោះចម្បាំងរបស់ខ្លួនជាច្រើនគ្រឿងនៅក្នុងគ្រាអាសន្ននៅពេលយន្តហោះចម្បាំងរបស់ចិន និងរុស្ស៊ីហោះទៅកៀកនឹងព្រំដែនរបស់ខ្លួនខ្លាំងពេកនៅថ្ងៃសុក្រ។ ប្រភពពីយោធាកូរ៉េខាងត្បូងឱ្យដឹងថានៅពេលនោះ យន្តហោះចិន៥គ្រឿង និងយន្តហោះរុស្ស៊ី៦គ្រឿងហោះកាត់តំបន់ការពារដែនអាកាសរបស់កូរ៉េខាងត្បូង។
ចាប់ពីម៉ោង៩:៣៥ព្រឹកដល់ម៉ោង១៣:៥៣រសៀលថ្ងៃសុក្រ គេឃើញយន្តហោះចម្បាំងទាំងនោះហោះចូល និងក្រវែលចុះក្រវែលឡើង មុននឹងបត់ក្បាលត្រឡប់ទៅវិញ។ ព្រឹត្តិការណ៍នោះកើតឡើងនៅសមុទ្រខាងកើត និងសមុទ្រខាងត្បូង។ នេះបើយោងតាមការបញ្ជាក់ពីអគ្គសេនាធិការដ្ឋានកងទ័ពកូរ៉េខាងត្បូងដែលបានចេញសេចក្ដីថ្លែងការណ៍នៅល្ងាចថ្ងៃសុក្រ។
ទោះជាយ៉ាងណាក្ដី កូរ៉េខាងត្បូងបញ្ជាក់ថាយន្តហោះទាំងនោះមិនបានរំលោភទៅលើដែនអាកាសរបស់ខ្លួននោះទេ។ ប៉ុន្តែកូរ៉េខាងត្បូងក៏មិនបានព្រងើយកន្តើយចំពោះបញ្ហានេះដែរ។ កូរ៉េខាងត្បូងបញ្ចេញយន្តហោះចម្បាំងដើម្បីត្រៀមចាត់វិធានការនៅក្នុងករណីចាំបាច់។ តំបន់ការពារដែនអាកាសមានន័យថាជាតំបន់ដែលលាតសន្ធឹងហួសព្រំដែនកូរ៉េខាងត្បូង។
គេបង្កើតតំបន់នេះឡើងដើម្បីងាយស្រួលដាក់ជាខ្សែការពារជាន់ទី១មុនពេលយន្តហោះបរទេសហោះចូលដែនអាកាស។ មានន័យថាបើយន្តហោះបរទេសបើកចូលតំបន់នេះជាការចូលកៀកព្រំដែន។ ប៉ុន្តែមិនទាន់រំលោភអធិបតេយ្យភាពរបស់កូរ៉េខាងត្បូងនៅឡើយទេ។ ក្រសួងការពារជាតិចិនចាត់ទុកថាជាការល្បាតរួមគ្នាលើកទី៩នៅលើសមុទ្រជប៉ុន ឬសមុទ្រខាងកើតហៅតាមភាសាកូរ៉េខាងត្បូង។
ក្រសួងថ្លែងនៅលើបណ្ដាញសង្គមថានេះជាផ្នែក១នៃការហោះហើររួមគ្នារវាងចិន និងរុស្ស៊ី។ មន្ត្រីយោធាកូរ៉េខាងត្បូងថ្លែងថាយន្តហោះចិនមុនដំបូងហោះកាត់ចន្លោះឧបទ្វីបកូរ៉េ និងជប៉ុន។ រួចហើយហោះសំដៅទៅរកកោះដុកដូ (Dokdo) ដែលជាកូនកោះដ៏តូច១ស្ថិតនៅឆ្នេរសមុទ្រខាងកើតកូរ៉េខាងត្បូង។ យន្តហោះរុស្ស៊ីក៏ហោះទៅភាគខាងត្បូងកោះដុកដូផងដែរ។
មន្ត្រីរដ្ឋាភិបាលកូរ៉េខាងត្បូងថ្លែងថាយន្តហោះចិន និងរុស្ស៊ីបានហោះរួមគ្នាជាហ្វូងពីលើភាគខាងត្បូងកោះដុកដូមុននឹងចាកចេញពីទីនោះវិញ។ កាលពីឆ្នាំ២០១៩ យន្តហោះចិន និងរុស្ស៊ីធ្លាប់ហោះពីលើតំបន់ការពារដែនអាកាសរបស់កូរ៉េខាងត្បូងដោយគ្មានការជូនដំណឹងអ្វីទាំងអស់។ កាលនោះ ប្រទេសទាំង២ថ្លែងថានេះជាផ្នែក១នៃការធ្វើសមយុទ្ធយោធារួមគ្នា៕
ចែករំលែកព័តមាននេះ