រាជធានីភ្នំពេញ ៖ យោងតាមសេចក្តីរាយការណ៍ព័ត៌មានជាបឋម បានអោយដឹងថា ផ្ទះមួយកន្លែង ជាទីតាំងឃ្លាំងស្ដុក និងលក់ក្រដាសសែន ត្រូវអគ្គិភ័យឆាបឆេះទាំងស្រុង ផ្អើលសមត្ថកិច្ច និងពលរដ្ឋ…
រាជធានីភ្នំពេញ ៖ យោងតាមសេចក្តីរាយការណ៍ព័ត៌មានជាបឋម បានអោយដឹងថា ផ្ទះមួយកន្លែង ជាទីតាំងឃ្លាំងស្ដុក និងលក់ក្រដាសសែន ត្រូវអគ្គិភ័យឆាបឆេះទាំងស្រុង ផ្អើលសមត្ថកិច្ច និងពលរដ្ឋ ក្នុងមូលដ្ឋាន សង្កាត់ច្បារអំពៅទី០១ ។
គ្រោះអគ្គិភ័យនេះ បង្កឲ្យមានការភ្ញាក់ផ្អើលឡើងកាលពីវេលាម៉ោង០៣និង២៥នាទីរសៀលថ្ងៃទី២៩ ខែវិច្ឆិកា ឆ្នាំ២០២៤នេះ នៅចំណុចផ្ទះលក់ក្រដាសសែន ដែលស្ថិតនៅតាមបណ្តោយផ្លូវលេខ៣៥៧ ខាងក្រោយពេទ្យបង្អែកច្បារអំពៅ ក្នុងសង្កាត់ច្បារ អំពៅទី០១ ខណ្ឌច្បារអំពៅ រាជធានីភ្នំពេញ ។
យោងតាមប្រភពព័ត៌មានពីប្រជាពលរដ្ឋរស់នៅក្បែរកន្លែងកើតហេតុ បានអោយដឹងថា គេបានឃើញមានផ្សែងខ្មៅហ៊ុយខ្មួលខ្មាញ់លាយលំអណ្តាតភ្លើង ។ ភ្លាមៗនោះ ពលរដ្ឋបាននាំគ្នាជួយយកទុយោទឹក មកជួយបាញ់ពន្លត់ដែរ ប៉ុន្តែដោយសារឃ្លាំងស្ដុកខាងលើ សម្បូរទៅដោយក្រដាសសែន ជាហេតុធ្វើអោយមិនអាចទប់ស្កាត់បាន ទើបបង្កអោយអណ្តាតភ្លើង លេបត្របាក់ឆក់យកឃ្លាំងខាងលើទាំងស្រុង តែម្តង ។
អគ្គិភ័យនេះដែរ បានឆាបឆេះឃ្លាំងប្រក់ស័ង្កសី ដែលស្តុកក្រដាសសែន ចំនួន០១ឃ្លាំង ឆេះអស់ទាំងស្រុង រួមនឹងសម្ភារៈមួយចំនួនធំ ។ ហើយក្នុងនោះដែរ កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យជាច្រើនគ្រឿង ទៅជួយអន្តរាគមន៍ដល់ទីតាំងកើតហេតុ បាញ់ទឹកពន្លត់ភ្លើង រលត់ទាំងស្រុងផងដែរ ។ ចំពោះមូលហេតុ សមត្ថកិច្ចជំនាញ កំពុងបើកការស្រាវជ្រាវនៅទីតាំងកើតហេតុ ផងដែរ ៕
ចែករំលែកព័តមាននេះ