ទីក្រុងអាស្តាណា៖ លោកពូទីនកោតសរសើរលោកត្រាំថាជាមនុស្សឈ្លាសវៃ និងមានបទពិសោធ។ លោកសង្ឃឹមថាលោកត្រាំនឹងមានសមត្ថភាពពេញលេញក្នុងការបិទបញ្ចប់សង្គ្រាមអ៊ុយក្រែននាពេលខាងមុខនេះ។ ប៉ុន្តែការសន្យាថានឹងបិទបញ្ចប់សង្គ្រាមត្រឹមតែរយៈពេល២៤ម៉ោងនៃការឡើងកាន់អំណាចនោះប្រហែលជាមិនអាចទៅរួចទេ។ អ្នកនាំពាក្យរុស្ស៊ីក៏ធ្លាប់និយាយត្រង់ចំណុចនេះដែរ។ គ្រាន់តែថារុស្ស៊ីចង់ឱ្យមជ្ឈដ្ឋានទូទៅស្ដាប់ពាក្យសម្ដីរបស់ត្រាំដោយយកចិត្តទុកដាក់។
ការថ្លែងដូច្នេះបន្ទាប់ពីប្រភពខ្លះបង្ហើបឱ្យយដឹងថាឧត្ដមសេនីយ៍ចូលនិវត្តម្នាក់បានយកផែនការសន្តិភាពទៅបង្ហាញលោកត្រាំ ហើយត្រូវលោកត្រាំពេញចិត្តយ៉ាងខ្លាំងដល់ថ្នាក់តែងតាំងគាត់ជាប្រេសិតពិសេសទទួលបន្ទុកខាងដោះស្រាយបញ្ហាអ៊ុយក្រែន។ អ្នកខ្លះទៀតប្រាប់ថានៅក្នុងផែនការនោះនិយាយអំពីការកាត់ទឹកដីអ៊ុយក្រែនទៅឱ្យរុស្ស៊ីដើម្បីជាថ្នូរនឹងសន្តិភាព។
ប្រភពខ្លះឱ្យដឹងថាលោកត្រាំអាចនឹងបង្ខិតបង្ខំឱ្យអ៊ុយក្រែនចូលតុចរចាដោយគ្មានការប្រកែកបានឡើយ។ បើមិនដូច្នេះទេ លោកនឹងគំរាមកាត់ជំនួយយោធា។ ទោះបីចង់ ឬមិនចង់ អ៊ុយក្រែនត្រូវតែបង្ខំចិត្តចូលតុចរចា និងធ្វើតាមការទាមទាររបស់លោកពូទីន។ លោកថ្លែងពីប្រទេសកាហ្សាក់ស្ថានថាលោកត្រាំប្រាកដជាមានដំណោះស្រាយសម្រាប់បញ្ហាអ៊ុយក្រែន។
សង្គ្រាមអ៊ុយក្រែនជាប្រធានបទក្ដៅនៅក្នុងការឃោសនាបោះឆ្នោតរបស់លោកត្រាំ។ លោកធ្លាប់សន្យាកាលពីឆ្នាំ២០២៣ថានឹងបិទបញ្ចប់សង្គ្រាមអ៊ុយក្រែនត្រឹមតែរយៈពេល២៤ម៉ោង។ លោកនឹងនិយាយប្រាប់លោកហ្សឺលែនស្គីថាអ៊ុយក្រែនមិនទទួលបានជំនួយតទៅទៀតទេ។ ដូច្នេះត្រូវតែទទួលយកកិច្ចព្រមព្រៀងបញ្ចប់សង្គ្រាម។ លោកនឹងប្រាប់លោកពូទីនដូចគ្នាថាលោកត្រូវតែទទួលយកកិច្ចព្រមព្រៀងបញ្ចប់សង្គ្រាម។ ពេលនោះលោកពូទីននឹងទទួលបានផលប្រយោជន៍ជាច្រើន។
តាមមើលទៅ ទាំងអ៊ុយក្រែន និងរុស្ស៊ីប្រហែលជាមិនទាន់គិតថាសំណើរបស់លោកត្រាំអាចនឹងមានលក្ខខណ្ឌល្អៗដើម្បីឱ្យពួកគេទទួលយកបាននៅឡើយទេ។ ដូច្នេះ ពួកគេមិនទាន់ដឹងថាតើសំណើនេះអាចនឹងទទួលជោគជ័យកម្រិតណាឡើយ។ គ្រាន់តែថានៅពេលលោកត្រាំឡើងកាន់អំណាច សង្គ្រាមអ៊ុយក្រែនអាចនឹងធូរស្បើយជាងមុន។ ការដែលលោកពូទីននិយាយសរសើរលោកត្រាំនេះធ្វើឡើង១សប្ដាហ៍បន្ទាប់ពីមានពាក្យចចាមអារ៉ាមថាលោកទាំង២និយាយគ្នាតាមទូរស័ព្ទ៕
ចែករំលែកព័តមាននេះ