ខេត្តសៀមរាប ៖ មន្ត្រីកងរាជអាវុធហត្ថខេត្តសៀមរាបស័ក្ត២មួយរូប ដែលមេឱ្យទៅយាមនៅសារមន្ទីរជាតិអង្គរ ដែលបានប្រើអំពើហិង្សាទៅលើអ្នកសារព័ត៌មានទាំងកំរោល២នាក់ បង្កឱ្យមានការភ្ញាក់ផ្អើលទាំងយប់ ។ បើតាមប្រភពពីមន្ត្រីប៉េអឹមខេត្តសៀមរាបបានលួចប្រាប់ កាលពីល្ងាចថ្ងៃទី២២…
ខេត្តសៀមរាប ៖ មន្ត្រីកងរាជអាវុធហត្ថខេត្តសៀមរាបស័ក្ត២មួយរូប ដែលមេឱ្យទៅយាមនៅសារមន្ទីរជាតិអង្គរ ដែលបានប្រើអំពើហិង្សាទៅលើអ្នកសារព័ត៌មានទាំងកំរោល២នាក់ បង្កឱ្យមានការភ្ញាក់ផ្អើលទាំងយប់ ។
បើតាមប្រភពពីមន្ត្រីប៉េអឹមខេត្តសៀមរាបបានលួចប្រាប់ កាលពីល្ងាចថ្ងៃទី២២ ខែវិច្ឆិកា ឆ្នាំ២០២៤នេះថា ជនដែលបានប្រើអំពើហិង្សាទៅលើអ្នកកាសែតទាំង២នាក់នោះ មានឈ្មោះ សៅ អ៊ឹម សិទ្ធ ភេទប្រុស អាយុ៣៤ឆ្នាំ មានតួនាទីជាអនុសេនីយ៍ទោ ជាមន្ត្រីកងរាជអាវុធហត្ថខេត្តសៀមរាប ផ្នែកបច្ចេកទេស បច្ចុប្បន្ន រស់នៅក្នុងក្រុងសៀមរាប ប៉ុន្តែត្រូវបានខាងសារមន្ទីរស្នើឱ្យទៅយាមនៅសារមន្ទីរជាតិអង្គរ ដើម្បីការពារភ្ញៀវទេសចរចូលទស្សនា ។ ហើយមន្ត្រីអាវុធហត្ថរូបនេះ ប្រហែលជាមិនសូវបានចូលបន្ទាយអាវុធហត្ថខេត្តសៀមរាប គោរពទង់ជាតិដូចមន្ត្រីអាវុធហត្ថផ្សេងទៀតឡើយ។
បើតាមសម្តីរបស់ លោក សុខ សំអុល អ្នកសារព័ត៌មានមហាខ្មែរ បានរៀបរាប់ប្រាប់ថា លោក កំពុងយកព័ត៌មាន ស្រាប់តែមានបុរសម្នាក់ខាងលើ បានមកវាយលោកបណ្ដាលឱ្យរងរបួសតែម្ដង ហើយត្រូវជនបង្កនោះ បោកទូរស័ព្ទ(អាយ ហ្វូន១២ តម្លៃ (១២០០ $) ទៅលើដី បែកខាងខ្នងមុខ នឹងត្រូវមួយដៃត្រង់ច្រមុះផងដែរ។
ក្រោយធ្វើសកម្មភាពមកលើរូបលោករួច ក៏ចូលទៅប្រតាយប្រតប់ ជាមួយលោក ធា រ៉ា ហៅ ហង្ស តូច អ្នកសារព័ត៌មានសៀមរាបប៉ុស្តិ៍ ប៉ុន្តែមិនមានរបួសស្នាមអ្វីក្នុងហេតុការណ៍ទេ រួចជនបង្ក ឃើញសភាពការមិនសូវស្រួលក៏បានរត់ផ្លោះរបងចូលទៅក្នុងសារមន្ទីរជាតិអង្គរ បាត់ស្រមោលតែម្តង ។
សូមបញ្ជាក់ផងដែរថា ហេតុការណ៍ការប្រើអំពើហិង្សា លើអ្នកសារព័ត៌មានទាំង២នាក់នោះបានកើតឡើងនៅម៉ោង២៣និង៣០នាទី ស្ថិតនៅខាងក្រោយសារមន្ទីរជាតិអង្គរ កាលពីយប់ថ្ងៃទី២១ ខែវិច្ឆិកា ឆ្នាំ២០២៤ ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ខណៈអ្នកសារ ព័ត៌មានចំនួនពីររូបបានទៅយកព័ត៌មាន ករណីសមត្ថកិច្ចឃាត់ខ្លួនជនសង្ស័យម្នាក់សតិមិនប្រក្រតី
( វិកលចរិតនៅក្រោយសារមន្ទីរជាតិអង្គរ) ។
បច្ចុប្បន្ន ជនរងគ្រោះ ជាអ្នកកាសែតទាំង២នាក់ នៅអង្គភាពផ្សេង គ្នា ដែលជនបង្កប្រើហិង្សា ជាមន្ត្រីកងរាជអាវុធហត្ថខេត្តពាក់ស័ក្តិ២ម្នាក់ បណ្តាលឱ្យជនរងគ្រោះរបួស និងបំផ្លាញទ្រព្យសម្បត្តិ នោះ ត្រូវបានថ្នាក់ដឹកនាំ ទីបញ្ជាការកងរាជអាវុធហត្ថខេត្តសៀមរាបធ្វើការកោះហៅ មកសម្របសម្រួល ដើម្បីបញ្ចប់រឿងសងសំណង រួចហើយនៅរសៀលថ្ងៃទី ២២ ខែវិច្ឆិកាឆ្នាំ ២០២៤ ៕
ចែករំលែកព័តមាននេះ