រាជធានីភ្នំពេញ ៖ ស្ត្រីចំណាស់ម្នាក់បានបាត់ខ្លួនអស់រយៈពេល១អាទិត្យកន្លងមក ហើយពុំដឹងថា កំពុងស្ថិតនៅទីកន្លែងណា និងមានសុខទុក្ខយ៉ាងណានោះទេ ជាហេតុធ្វើឲ្យក្រុមគ្រួសារសាច់ញាតិមានការព្រួយបារម្ភយ៉ាងខ្លាំង ហើយតាមរកគ្រប់ទីកន្លែង ប៉ុន្តែពុំបានឃើញ ឬទទួលដំណឹងអ្វីបន្តិចសោះ…
រាជធានីភ្នំពេញ ៖ ស្ត្រីចំណាស់ម្នាក់បានបាត់ខ្លួនអស់រយៈពេល១អាទិត្យកន្លងមក ហើយពុំដឹងថា កំពុងស្ថិតនៅទីកន្លែងណា និងមានសុខទុក្ខយ៉ាងណានោះទេ ជាហេតុធ្វើឲ្យក្រុមគ្រួសារសាច់ញាតិមានការព្រួយបារម្ភយ៉ាងខ្លាំង ហើយតាមរកគ្រប់ទីកន្លែង ប៉ុន្តែពុំបានឃើញ ឬទទួលដំណឹងអ្វីបន្តិចសោះ ។
ដោយឡែក នៅវេលាព្រឹកថ្ងៃទី២១ ខែវិច្ឆិកា ឆ្នាំ២០២៤ កូនស្រីទី២ របស់គាត់ម្នាក់បានកាន់រូបថតម្ដាយជាទីស្រលាញ់របស់ខ្លួនធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដើម្បីសុំឲ្យអាជ្ញាធរជួយអន្តរាគមន៍រកម្ដាយនាងផង ។
កូនស្រីទី២ រូបនោះបាននិយាយថា នាងមានឈ្មោះ យាន វណ្ណៈ អាយុ៣៩ឆ្នាំ មុខរបរជាកម្មការិនីរោងចក្រកាត់ដេរ សព្វថ្ងៃស្នាក់នៅផ្ទះជួល នៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ចំណែកឯម្ដាយរបស់នាង ដែលបានបាត់ខ្លួនច្រើនថ្ងៃមកហើយនោះ ឈ្មោះ ទង់ ស៊ន អាយុ៦៥ឆ្នាំ មានទីលំនៅភូមិស្ពឺ ឃុំជយោ ស្រុកចំការលើ ខេត្តកំពង់ចាម ។ នាងបានរៀបរាប់ប្រាប់ឲ្យដឹងបន្តទៀតថា កាលពីថ្ងៃទី១៣ ខែវិច្ឆិកា ឆ្នាំ២០២៤ ម្ដាយរបស់នាងបានធ្វើដំណើរចាកចេញពីផ្ទះ នៅខេត្តកំពង់ចាមទៅបុណ្យកឋិនទាន នៅវត្តមួយនៅឯខេត្តតាកែវ ប៉ុន្តែឆ្លៀតពេលមិនទាន់ដល់ថ្ងៃបុណ្យក៏បានទៅលេង និងស្នាក់ផ្ទះប្អូនថ្លៃរបស់គាត់ម្នាក់ឈ្មោះ ខាន់ គឹម ស្ថិតនៅភូមិវះពោះ ឃុំខ្វាវ ស្រុកសំរោង ខេត្តតាកែវ ១យប់សិន ។
លុះដល់ថ្ងៃទី១៤ ខែវិច្ឆិកា ទើបចេញទៅបុណ្យកឋិននៅក្នុងវត្តស្ថិតនៅក្នុងស្រុកសំរោង ខេត្តតាកែវនោះដែរ ហើយខណៈពិធីបុណ្យកំពុងតែប្រព្រឹត្តទៅនៅវេលាម៉ោង៣រសៀល ថ្ងៃដដែល ស្រាប់តែម្ដាយរបស់នាងអត់ស្រួលខ្លួន ។ កូនស្រីរូបនេះបាននិយាយបន្តទៀតថា ពេលនោះម្ដាយមីងរបស់នាងម្នាក់ បានជួលម៉ូតូកង់បី១គ្រឿង ដែលជាអ្នករស់នៅក្នុងភូមិជាមួយគាត់ ឲ្យដឹកម្ដាយនាងត្រឡប់ទៅផ្ទះរបស់គាត់ (ផ្ទះម្ដាយមីងនាង) ដោយពុំមាននរណាជូនទៅជាមួយនោះឡើយ ព្រោះគិតថា អ្នករត់កង់បីនៅភូមិជាមួយគ្នា ហើយម្ដាយរបស់នាងក៏ស្គាល់ផ្ទះនោះហើយដែរ ។ ប៉ុន្តែអ្វីដែលពុំនឹកស្មានដល់នោះ ស្រាប់តែនៅវេលាល្ងាចថ្ងៃដដែល ក៏បានបាត់មិនឃើញម្ដាយនាងនៅផ្ទះប្អូនស្រីគាត់ឡើយ ទើបមានការភ្ញាក់ផ្អើឆោឡោ ហើយចែកផ្លូវគ្នាដើរតាមស្វែងរកគ្រប់ច្រកល្ហក ប៉ុន្តែមិនបានឃើញសោះ ។
នាងយាន វណ្ណៈ បានប្រាប់ឲ្យដឹងបន្ថែមទៀតថា គិតរហូតមកដល់ថ្ងៃទី២១ ខែវិច្ឆិកានេះម្ដាយនាងបាត់ខ្លួនរយៈពេល១អាទិត្យកន្លងមកហើយ ហើយនៅពេលមានការឆោឡោនោះ អ្នករត់ម៉ូតូកង់បីបានប្រាប់ថា ខ្លួនបានដឹកម្ដាយនាងទៅដល់ផ្ទះប្អូនស្រីគាត់នៅក្នុងភូមិវះពោះនោះហើយ ប៉ុន្តែពេលទៅដល់ម្ដាយនាងអត់ព្រមចុះនៅផ្ទះនោះសោះ ។ ដោយគាត់និយាយថា ផ្ទះនោះមិនមែនផ្ទះប្អូនស្រីគាត់ឡើយ បន្ទាប់មកគាត់ក៏បានឲ្យអ្នករត់កង់បីខាងលើដឹកបន្តទៅកាន់ផ្លូវជាតិលេខ២ ហើយពេលទៅដល់ត្រង់ចំណុចផ្លូវរថភ្លើងមួយកន្លែង បានប្រាប់ឲ្យឈប់ និងបានចុះនៅទីនោះ ក្រោយមកអ្នករត់កង់បីក៏មិនបានដឹងថា ម្ដាយនាងទៅណាទៀតឡើយ ។
ស្ត្រីខាងលើបានសម្ដែងការព្រួយបារម្ភពីសុវត្ថិភាព និងសុខទុក្ខម្ដាយរបស់នាងខ្លាំងណាស់ នាងបានបញ្ជាក់ថា ក្រោយពីបាត់អ្នកម្ដាយ រូបនាង និងក្រុមគ្រួសារសាច់ញាតិបានតាមស្វែងរកគ្រប់ទីកន្លែង ។ មិនតែប៉ុណ្ណោះក៏បានជូនដំណឹងដល់នគរបាលប៉ុស្តិ៍ខ្វាវ នគរបាលស្រុកសំរោង និងនគរបាលខេត្តតាកែវ ព្រមទាំងវិទ្យុក្នុងស្រុកមួយជួយផ្សព្វផ្សាយផងដែរ ប៉ុន្តែគ្មានដំណឹងពីម្ដាយនាងសោះ ។
ពេលនេះនាងបានធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យដើម្បីឲ្យអាជ្ញាធរជួយអន្តរាគមន៍ ក្រែងអ្នកម្ដាយមករកនាងនៅផ្ទះជួលហើយវង្វេងនៅទីកន្លែងណាមួយរកកន្លែងស្នាក់នៅរបស់នាងមិនឃើញ ។ នាងក៏បានអំពាវនាវដល់សាធារណៈជនផងដែរ ប្រសិនបើបានប្រទះឃើញម្ដាយនាងដូចមានភិនភាគនៅក្នុងរូបថតសូមជួយផ្ដល់ដំណឹងតាមរយៈទូរស័ព្ទលេខ៖ 0977427795/087575735 ដោយក្ដីអនុគ្រោះផងចុះ៕
ចែករំលែកព័តមាននេះ