ខេត្តបន្ទាយមានជ័យ ៖ ពលរដ្ឋខ្មែរម្នាក់ដែលចូលទៅកាប់ឈើធ្វើអុសក្នុងតំបន់ហាមឃាត់ជាប់ព្រំដែនកម្ពុជា-ថៃ បានជួបគ្រោះអកុសលជាន់មីនផ្ទុះដាច់ជើងម្ខាង ហើយកម្លាំងនគរបាលការពារព្រំដែនគោកនិងកម្លាំងយោធាចូលទៅជួយសង្គ្រោះយកចេញពីក្នុងតំបន់គ្រោះថ្នាក់ ។
ក្រោយកើតហេតុទាំងភាគីយោធាថៃ និងកងកម្លាំងនគរបាលការពារព្រំដែនគោកលេខ៩១១ និងយោធាដែលឈជើងតាមបន្ទាត់ព្រំដែនចូលទៅសង្គ្រោះ ដោយដាក់អង្រឹងសែងចេញពីតំបន់មានមីន ហើយឱ្យក្រុមសង្គ្រោះទៅយកដឹកបញ្ជូនទៅកាន់មន្ទីរពេទ្យបង្អែកក្រុងប៉ោយប៉ែត និងបញ្ជូនបន្តទៅកាន់មន្ទីរពេទ្យបង្អែកខេត្តនៅស្រុកមង្គលបុរី ។
ហេតុការណ៍នេះបានកើតឡើងនៅម៉ោងជាង៣រសៀលថ្ងៃទី២៥ ខែកញ្ញា ឆ្នាំ២០២៤ ជាតំបន់ស្ថិតក្នុងភូមិទំនប់ដាច់ ឃុំអូរបីជាន់ ស្រុកអូរជ្រៅ ។លោកវរសេនីយ៍ឯក អុឹម សុភារៈ អធិការនគរបាលស្រុកអូរជ្រៅបានឱ្យដឹងថា បុរសរងគ្រោះឈ្មោះ យឹម សុភាព ភេទប្រុស អាយុ៥៥ឆ្នាំ រស់នៅភូមិអាងសីលាខ្មែរ ឃុំអូរបីជាន់ ស្រុកអូរជ្រៅ ។លោកអធិការបានបញ្ជាក់ថា ជនរងគ្រោះបានចូលទៅកាប់ឈើធ្វើអុសតាមបន្ទាត់ព្រំដែន បានជាន់មីនបណ្តាលឱ្យផ្ទុះកក្រើកព្រៃដាច់ជើងម្ខាងផ្នែកខាងស្តាំ ។
លោកវរសេនីយ៍ឯក អុឹម សុភារៈ បានបញ្ជាក់ថា កន្លែងដែលជនរងគ្រោះទៅកាប់ឈើអុសដុតនោះជាកន្លែងដែលមានដាក់បម្រាមមិនឱ្យចូល តែជនរងគ្រោះនៅតែលួចចូលទៅកាប់ឈើធ្វើអុស ទើបបណ្តាលឱ្យជាន់មីនដាច់ជើងម្ខាងផ្នែកខាងស្តាំរបួសធ្ងន់កំពុងសង្គ្រោះនៅមន្ទីរពេទ្យ ។មុននេះមន្ត្រីស៊ីម៉ាក់បានពន្យល់ពីបញ្ហាដែលកំណត់ថា ភូមិ ឃុំ ស្រុក ខេត្តអស់មីន គឺសំដៅលើការអស់គ្រាប់មីនប្រឆាំងមនុស្សគ្រប់ប្រភេទ ខណៈគ្រាប់មីនតោន គ្រាប់បែកចង្កោម គ្រាប់ទម្លាក់ពីយន្តហោះ គ្រាប់មិនទាន់ផ្ទុះដែលជាសំណល់សង្គ្រាមគ្រប់ប្រភេទ គឺជាសំណល់សង្គ្រាម មិនស្ថិតក្នុងនិយមន័យភូមិ ឃុំ ស្រុក ខេត្តអស់មីននោះទេ ។
ការលើកឡើងរបស់មន្ត្រីស៊ីម៉ាក់ បន្ទាប់ពីមានករណីបុរសម្នាក់ បានស្លាប់ក្នុងហេតុការណ៍ផ្ទុះមីនតោន នៅខេត្តត្បូងឃ្មុំ ខណៈខេត្តមួយនេះបានប្រកាសថាជាខេត្តអស់មីន ។តាមការបង្ហោះសារនៅលើហ្វេកប៊ុកអង្គភាពស៊ីម៉ាក់បានឱ្យដឹងថា ការប្រកាសថាភូមិ ឃុំ ស្រុក ខេត្តអស់មីន គឺសំដៅអស់គ្រាប់មីនប្រឆាំងមនុស្សគ្រប់ប្រភេទ ដូច្នេះសម្រាប់ខេត្តបន្ទាយមានជ័យនិងខេត្តដែលនៅជាប់ព្រំដែនថៃភាគខាងលិចប្រទេស គឺមិនទាន់កំណត់បានថាជាខេត្តអស់មីនទេ ។ តែស្ថិតក្រោមអនុសញ្ញាមីនអន្តរជាតិអូតាវ៉ា និងនៅតាមគ្រប់ទីតាំងភូមិសាស្ត្រដែលបានដឹង ដោយមានកំណត់ត្រាក្នុងទិន្នន័យជាតិប៉ុណ្ណោះ ។
ដូច្នេះ គ្រាប់មីនតោន គ្រាប់បែកចង្កោម គ្រាប់ទម្លាក់ពីយន្តហោះ គ្រាប់មិនទាន់ផ្ទុះសំណល់សង្គ្រាមគ្រប់ប្រភេទ មិនស្ថិតក្នុងនិយមន័យភូមិឃុំស្រុកខេត្តអស់មីននោះទេ សូម្បីតែគ្រាប់មីនប្រឆាំងមនុស្សដែលស្ថិតនៅរ៉ាយប៉ាយដោយគ្មានព័ត៌មាន និងកំណត់ត្រាក្នុងប្រព័ន្ធទិន្នន័យជាតិក៏គ្មានក្នុងយុទ្ធសាស្ត្រប្រកាសអស់មីននេះដែរ ៕
ចែករំលែកព័តមាននេះ