ថៃ ៖ រឿងរ៉ាវដែលម្ចាស់កសិដ្ឋានចិញ្ចឹមក្រពើមួយកន្លែង ក្នុងខេត្ត Lamphun ប្រទេសថៃ សម្រេចចិត្តកម្ទេចសត្វក្រពើធំៗជិត១០០ក្បាលរបស់ខ្លួន ដោយសារក្តីបារម្ភពីទឹកជំនន់ដែលអាចប្រឈមនឹងការលិចលង់ ហើយភ័យខ្លាចថា ក្រពើទាំងនោះអាចរួចពីទ្រុងដែលអាចនឹងបង្កគ្រោះថ្នាក់ដល់អ្នកដទៃនោះ…
ថៃ ៖ រឿងរ៉ាវដែលម្ចាស់កសិដ្ឋានចិញ្ចឹមក្រពើមួយកន្លែង ក្នុងខេត្ត Lamphun ប្រទេសថៃ សម្រេចចិត្តកម្ទេចសត្វក្រពើធំៗជិត១០០ក្បាលរបស់ខ្លួន ដោយសារក្តីបារម្ភពីទឹកជំនន់ដែលអាចប្រឈមនឹងការលិចលង់ ហើយភ័យខ្លាចថា ក្រពើទាំងនោះអាចរួចពីទ្រុងដែលអាចនឹងបង្កគ្រោះថ្នាក់ដល់អ្នកដទៃនោះ កំពុងអង្រួនចិត្តអ្នក ប្រើប្រាស់បណ្តាញសង្គមទាំងក្នុងប្រទេស និងក្រៅប្រទេស ។
ម្ចាស់កសិដ្ឋានចិញ្ចឹមក្រពើរូបនេះ មានឈ្មោះថា Natthapak Khumkad ដោយលោកបានប្រកាសរឿងនេះតាមរយៈគណនីហ្វេសបុកផ្ទាល់ខ្លួន ដោយរៀបរាប់ទាំងសោកស្តាយយ៉ាងដូច្នេះថា «ថ្ងៃនេះខ្ញុំសម្រេចចិត្តកម្ចាត់ក្រពើដែលនៅជាមួយខ្ញុំ តាំងពី១៧ឆ្នាំចេញពីស្រះទាំងអស់ ដោយសារតែកត្តាគ្រោះធម្មជាតិឆ្នាំនេះ ហាក់មានសភាពធ្ងន់ធ្ងរពេក ។ ខ្ញុំត្រូវធ្វើការសម្រេចចិត្តជាបន្ទាន់បំផុត ការពារប្រសើរជាងព្យាបាល និងវិប្បដិសារីនៅពេលក្រោយ ។ វាជាការសម្រេចចិត្តផ្ទាល់ខ្លួនរបស់ខ្ញុំ បន្ទាប់ពីខ្ញុំបានពិភាក្សាជាមួយប្រពន្ធខ្ញុំ និងមនុស្សជិតស្និទ្ធ ។ ជាធម្មតាខ្ញុំមិនងាយចុះចាញ់ និងបោះបង់អ្វីមួយនោះទេ ប៉ុន្តែខ្ញុំបានគិតពីទិដ្ឋភាពជាច្រើន ។ ខ្ញុំបានអត់ធ្មត់ជាយូរណាស់មកហើយ វាជាជម្រើសដ៏ល្អបំផុតនៅពេលនេះ ហើយជាការចងចាំអស់មួយជីវិត ។»
យ៉ាងណាក៏ដោយ ក្រោយពីបង្ហោះមួយនេះល្បីសុះសាយ ត្រូវបានចែករំលែកពីមនុស្សរាប់ម៉ឺននាក់នោះ ក៏ដូចជា ចុះផ្សាយ តាមសារព័ត៌មានថៃល្បីៗនោះ ម្ចាស់កសិដ្ឋានចិញ្ចឹមក្រពើ លោកNatthapak Khumkad បានបញ្ជាក់ប្រាប់សារព័ត៌មាន Khaosod ថា ក្រពើដែលគាត់កម្ទេច គឺជាក្រពើមេពូជធំចំនួន៩០ក្បាល ដែលគាត់ចិញ្ចឹមប្រហែល១៧ឆ្នាំមកហើយ ប៉ុន្តែកសិដ្ឋានរបស់គាត់នៅមានកូនក្រពើតូចៗចំនួន៥០០ក្បាលទៀត ។
ជុំវិញរឿងរ៉ាវខាងលើ ម្ចាស់កសិដ្ឋានចិញ្ចឹមក្រពើរូបនេះ បានជ្រើសរើសប្រើពាក្យ«គ្រប់គ្រង ឬកម្ចាត់ ឬដកហូត» ដោយអំពាវនាវដល់មហាជន កុំអោយប្រើពាក្យ«សម្លា.ប់» ព្រោះវាសាហា.វឃោឃៅពេក ។ ក្រោយពីជួបបទពិសោធន៍ទឹកជំនន់លើកនេះ លោកNatthapak អះអាងថា ចាប់ពីឆ្នាំក្រោយ កសិដ្ឋានរបស់លោកនឹងមិនប្រមូលពងក្រពើ ឬភ្ញាស់កូនក្រពើបន្តទៅទៀតឡើយ ប៉ុន្តែគាត់មាននៅតែមានជំនឿដូចពាក្យចាស់ពោលថា« ក្រោយភ្លៀងមេឃស្រលះ» ៕
ចែករំលែកព័តមាននេះ