Euro 2024 ៖ Mbappe រកគ្រាប់ជួយបារាំងផ្តួលក្រិករក្សាកំណត់ត្រាល្អឥតខ្ចោះក្នុងពូល
បារាំង ៖ កំពូលខ្សែប្រយុទ្ធ Kylian Mbappe បានស៊ុតបាល់ប៉េណាល់ទីបញ្ចូលទី ជួយក្រុមជម្រើសជាតិ
បារាំង ៖ កំពូលខ្សែប្រយុទ្ធ Kylian Mbappe បានស៊ុតបាល់ប៉េណាល់ទីបញ្ចូលទី ជួយក្រុមជម្រើសជាតិបារាំងផ្តួលក្រិក កាលពីថ្ងៃទី១៩ ខែមិថុនា ឆ្នាំ២០២៣ ដើម្បីរក្សាកំណត់ត្រាល្អឥតខ្ចោះរបស់ពួកគេ នៅក្នុងការប្រកួតវគ្គជម្រុះពានរង្វាន់ UEFA Euro 2024 ។
ជំនួបនៅក្នុងពូល B ដែលធ្វើឡើងនៅកីឡដ្ឋានជាតិ Stade de France ដែលមានមូលដ្ឋាននៅភាគខាងជើងទីក្រុងប៉ារីស ស្ថិតក្រោមក្រសែភ្នែកអ្នកទស្សនាប្រមាណ ៧៦,៥០០នាក់ គ្រាប់បាល់ជ័យជម្នះរបស់ក្រុមម្ចាស់ផ្ទះមាន់គកបារាំង ដែលសម្រេចបានដោយប្រធានក្រុម Kylian Mbappe កើតឡើងនៅនាទី៥៥ ក្នុងវគ្គទី២ ហើយលទ្ធផលនេះ បានរក្សារហូតដល់បញ្ចប់ការប្រកួត។
ជាមួយជ័យជម្នះនេះ មានន័យថា បារាំងបានឈ្នះការប្រកួតវគ្គជម្រុះទាំងអស់ ក្រោយឆ្លងកាត់៤ប្រកួតកន្លងទៅ ហើយថែមទាំងមិនរបូតគ្រាប់បាល់សោះ និងស៊ុតបញ្ចូលទីលើគូប្រកួតចំនួន៩គ្រាប់ ដើម្បីបន្តកាន់កាប់កំពូលតារាងពូល B ដោយមាន ១២ពិន្ទុតាមពីក្រោយដោយក្រិកដែលមាន ៦ពិន្ទុ។ សាធារណរដ្ឋអៀរឡង់ និងហូឡង់មាន ៣ពិន្ទុដូចគ្នា ចំណែកឯហ្គីប្រាលតា (Gibraltar) នៅបាតតារាងគ្មានពិន្ទុរាប់ ខណៈដែលនៅសល់៥ប្រកួតទៀត ដែលត្រូវបន្តប្រកួតប្រជែងគ្នា៕ (ប្រភពពី BBC)
ចែករំលែកព័តមាននេះ