កីឡាករអាហ្សង់ទីន ត្រូវដឹកតាមឧទ្ធម្ភាគចក្រ ខណៈផ្លូវទាំងអស់កកស្ទះដោយហ្វូងអ្នកគាំទ្រជាង៤លាននាក់(វីដេអូ)
អាហ្សង់ទីន ៖ ក្រុមបាល់ទាត់ជម្រើសជាតិអាហ្សង់ទីន ម្ចាស់ជើងឯក FIFA World Cup 2022 នៅកា
អាហ្សង់ទីន ៖ ក្រុមបាល់ទាត់ជម្រើសជាតិអាហ្សង់ទីន ម្ចាស់ជើងឯក FIFA World Cup 2022 នៅកាតា ត្រូវបង្ខំចិត្តបោះបង់ការធ្វើដំណើរដោយក្បួនដង្ហែរឡានក្រុង នៅក្នុងរដ្ឋធានីប៊ុយណូស៊ែ (Buenos Aires) កាលពីថ្ងៃទី២០ ខែធ្នូ កន្លងទៅ បន្ទាប់ពីអ្នកគាំទ្រដ៏រំភើបរាប់លាននាក់ បានចេញមកស្វាគមន៍ក្រុមជម្រើសជាតិខ្លួនយ៉ាងកកកុញជាទីបំផុត នៅក្នុងរដ្ឋធានីធំបំផុតរបស់អាហ្សង់ទីនមួយនេះ។ ជាលទ្ធផលប្រធានក្រុម Lionel Messi និងមិត្តរួមក្រុមរបស់គេ ត្រូវបានដឹកចេញតាមឧទ្ធម្ភាគចក្រ ដើម្បីបញ្ចប់ការប្រារព្ធពិធី ដែលបានគ្រោងទុក។
សមាជិកទាំងអស់នៃក្រុមអាហ្សង់ទីន ដែលឈ្នះជើងឯក World Cup 2022 កាលពីថ្ងៃទី១៨ ខែធ្នូ កន្លងទៅ មិនអាចធ្វើដំណើរទៅដល់វិមានប្រវត្តិសាស្ត្រជាតិ Obelisco កណ្តាលរដ្ឋធានីប៊ុយណូស៊ែ ដូចដែលបានគ្រោងទុកនោះទេ។ ដោយសារតែផ្លូវទាំងអស់ ត្រូវបានបិទទាំងស្រុងដោយហ្វូងអ្នកគាំទ្រដ៏ច្រើនលើសលុប ដែលតាមការប៉ាន់ស្មានដោយប្រព័ន្ធផ្សព្វផ្សាយក្នុងស្រុក បានរាយការណ៍ថា មានរហូតដល់៤លាននាក់ឯណោះ។
ជាមួយនឹងរូបភាពជាច្រើនតាមប្រព័ន្ធផ្សព្វផ្សាយសង្គម ដែលបង្ហាញពីអ្នកគាំទ្រមួយចំនួនបានព្យាយាមលោតឡើងលើឡានក្រុងរបស់ក្រុម នៅពេលដែលឆ្លងកាត់ក្រោមស្ពាន។ ការធ្វើដំណើររយៈពេល៨ម៉ោង ដែលបានគ្រោងទុក ត្រូវបានរំសាយចោល ដោយសារការភ័យខ្លាចពីសុវត្ថិភាពសមាជិកនៃក្រុមអាហ្សង់ទីន ហើយជាលទ្ធផលប្រធានក្រុម Lionel Messi និងមិត្តរួមក្រុមរបស់គេ ត្រូវបានផ្ទេរចេញពីឡានក្រុងក្បួនដង្ហែ និងចូលទៅក្នុងឧទ្ធម្ភាគចក្រ ដើម្បីធ្វើដំណើរហោះឆ្វែលជុំវិញវិមាន Obelisco។
ជាមួយគ្នានោះ លោកស្រី Gabriela Cerruti អ្នកនាំពាក្យប្រធានាធិបតីអាហ្សង់ទីន បានសរសេរនៅលើគណនី Twitter ផ្ទាល់ខ្លួនថា «ជើងឯកពិភពលោក កំពុងហោះហើរពីលើផ្លូវទាំងអស់នៅក្នុងឧទ្ធម្ភាគចក្រ ព្រោះពួកគេមិនអាចបន្តដំណើរនៅលើដី ដោយឡានក្រុងបាន ដោយសារការកកស្ទះពីអ្នកគាំទ្រ ដែលមានសេចក្តីអំណរដ៏ខ្លាំងក្លាបំផុត។ សូមបន្តការអបអរដោយសន្តិភាព និងបង្ហាញក្តីស្រឡាញ់ និងការកោតសរសើរដល់ពួកគេ!»។
គួររំលឹកថា ក្រុមជម្រើសជាតិអាហ្សង់ទីន បានធ្វើមាតុភូមិនិវត្តន៍ដល់ប្រទេសកំណើតវិញ នៅព្រឹកព្រលឹមថ្ងៃទី២០ ខែធ្នូ នៅឯអាកាសយានដ្ឋាន Ezeiza ខណៈទោះបីជាមកដល់នៅម៉ោងប្រហែល៣ទៀបភ្លឺយ៉ាងណាក៏ដោយ ក៏មនុស្សរាប់ពាន់នាក់បានរង់ចាំរួចទៅហើយ នៅក្រៅព្រលានយន្តហោះ ដោយដៃកាន់ផ្ទាំងបដា ទង់ជាតិ និងដុតកាំជ្រួច លាយឡំនិងការយំដោយសេចក្តីរំភើប និងមោទនភាពជាទីបំផុត។
ការពិតទៅ រដ្ឋធានីប៊ុយណូស៊ែ បានស្ថិតក្រោមអបអរ និងភាពកកស្ទះ ចាប់តាំងពីថ្ងៃទី១៨ ខែធ្នូ មកម្ល៉េះ នៅពេលដែលអាហ្សង់ទីនបានយកឈ្នះលើបារាំង នៅវគ្គផ្តាច់ព្រ័ត្រ ដោយការទាត់បាល់ប៉េណាល់ទីកាត់សេចក្តីលទ្ធផល ៤-២ ក្រោយចប់ ១២០នាទី បានត្រឹមស្មើគ្នា ៣-៣ ដើម្បីក្លាយជាម្ចាស់ជើងឯក World Cup ជាលើកទី៣ ក្រោយខកខានអស់រយៈពេល៣៦ឆ្នាំ ចាប់តាំងពីការឈ្នះចុងក្រោយ នៅក្នុងឆ្នាំ១៩៨៦។
ជាមួយនឹងសមិទ្ធផលដ៏ធំធេងនេះ រដ្ឋាភិបាលអាហ្សង់ទីន បានអនុញ្ញាតឱ្យឈប់សម្រាក១ថ្ងៃនៅទូទាំងប្រទេស សម្រាប់ថ្ងៃទី២០ ខែធ្នូ កន្លងទៅ ដើម្បីអនុញ្ញាតឱ្យអ្នកគាំទ្រទាំងអស់អបអរជ័យជម្នះនេះ៕ (ដកស្រង់ចេញពី ESPN និង AP)
ចែករំលែកព័តមាននេះ