ព័ត៌មានអន្តរជាតិ
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៧:២៧
លោកនាយករដ្ឋមន្ត្រីចិន Wen Jiabao និយាយនៅថ្ងៃសុក្រថា ប្រទេសចិនក៏គ្មានបំណងក្នុងការបង្កើនការទិញអឺរ៉ុបទេ ។ គាត់ថ្លែងបញ្ជាក់ពីការព្រួយបារម្ភទៅលើការបង្កើតការវិនិយោគរបស់ប្រទេសក្នុងតំបន់សេដ្ឋកិច្ចអឺរ៉ូដែលជាប់ប្រាក់បំណុល ។ ប្រទេសចិនមានបំណងចូលរួមកិច្ចសហប្រតិបត្តិការជាមួយអឺរ៉ុបដើម្បីប្រយុទ្ធប្រឆាំងជាមួយវិបត្តិនាពេលបច្ចុប្បន្ន។ មនុស្សខ្លះនិយាយថា ចិនចង់ទិញទ្វីបអឺរ៉ុប។ នេះបើតាមលោកនាយករដ្ឋមន្ត្រីនិយាយក្នុងវេទិកាជំនួយក្នុងទីក្រុង Guangzhou ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៧:១៨
ប្រភពយោធាមួយរបស់កូរ៉េខាងត្បូងឱ្យដឹងកាលពីថ្ងៃទី៥ កុម្ភៈ ថា ប្រទេសកូរ៉េខាងជើងបច្ចុប្បន្នបានផលិតយន្តហោះប្រយុទ្ធគ្មានមនុស្សបើកយកគំរូពីយន្តហោះ គ្មានមនុស្សបើកទាំងឡាយរបស់អាមេរិកដែលទិញមកពីមជ្ឈិមបូព៌ា។ ប្រភពនេះគូសបញ្ជាក់ថា យន្តហោះនេះពិតណាស់ផលិតសម្រាប់គោលដៅវាយប្រហារកូរ៉េខាងត្បូង។ ប្រភពមិនបញ្ចេញឈ្មោះនេះនិយាយថា ប្រទេសកូរ៉េខាងជើងបានទិញនាពេលថ្មីៗនេះនូវយន្តហោះគ្មានមនុស្សបើកអាមេរិកធុន MQR-107D STREAKER ជាច្រើនគ្រឿងពីប្រទេសមួយនៅមជ្ឈិមបូព៌ា ប្រហែលជាស៊ីរី
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៦:៤៤
ប៉ូលិសបានកម្ទេចកាលពីថ្ងៃទី៤ កុម្ភៈ នូវផ្នែកមួយយ៉ាងធំនៃជំរំ ដែលកាន់កាប់ចាប់តាំងពីខែតុលាមក ដោយពួកបាតុករប្រឆាំងមូលធននិយមនៃចលនា OCCUPY WASHINGTON ក្នុងឱកាសនៃការបង្ហាញកម្លាំងមួយរបស់អាជ្ញាធរ ដើម្បីឱ្យពួកបាតុករគោរពបទបញ្ជាដែលហាមឃាត់ការដេកនៅក្នុងជំរំនេះ។ អ្នកនាំពាក្យរបស់ប៉ូលិស លោក DAVID SCHLOSSER គូសបញ្ជាក់ថា ប៉ូលិសបានចាប់ខ្លួនមនុស្ស៤នាក់ ដែលបដិសេធមិនគោរពបទបញ្ជា ហើយក្រាញតោងរូបចម្លាក់នៅកណ្តាលទីលានមួយ ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៦:១១
ប៉ូលិសរាយការណ៍កាលពីថ្ងៃទី៥ កុម្ភៈ ថា ប៉ូលិសអាហ្វហ្គានីស្ថានកាលពីយប់ថ្ងៃទី៤ កុម្ភៈ បានសម្លាប់មេបញ្ជាការពួកតាលីបង់ម្នាក់ ក្នុងឱកាសនៃប្រតិបត្តិការមួយនៅខេត្តគុនឌុស ចម្ងាយប្រមាណជា២៥០គីឡូម៉ែត្រ ខាងជើងក្រុងកាប៊ុល។ អ្នកនាំពាក្យប៉ូលិសខេត្តគូសបញ្ជាក់ថា ក្រោយពីទទួលបានព័ត៌មាននានាមក ប៉ូលិសបានវាយប្រហារកន្លែងលាក់ខ្លួនមួយនៅភូមិ HAQTASH ស្រុកខាណាបាដ កាលពីយប់ថ្ងៃទី៤ កុម្ភៈ ហើយបានសម្លាប់នឹងកន្លែងនូវមេបញ្ជាការម្នាក់របស់ពួកតាលីបង់ ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៥:៣៦
រដ្ឋាភិបាលរបស់ប្រធានាធិបតីហ្វ៊ីលីពីន លោកបេនីញ៉ូ អាគីណូ ពុំប្រឆាំងជំទាស់ឡើយ ចំពោះ ការពន្យារពេលស្នាក់នៅក្នុងមន្ទីរពេទ្យក្រោមការតាមឃ្លាំមើលរបស់អតីតប្រធានាធិបតី លោកស្រីក្លូរៀ អារ៉ូយ៉ូ ។ អ្នកនាំពាក្យរងរបស់ប្រធានាធិបតីគូសបញ្ជាក់ថា លោកប្រធានាធិបតីអាគីណូ បានឱ្យក្រសួងមហាផ្ទៃ និងប៉ូលិសជាតិហ្វ៊ីលីពីនសម្រេចលើកន្លែងយ៉ាងសមស្រប ដើម្បីឃុំឃាំងលោកស្រីអារ៉ូយ៉ូ ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៥:៤៨
ប្រភពសន្តិសុខមូលដ្ឋានគូសបញ្ជាក់ថា បំពង់បង្ហូរឧស្ម័នមួយដែលបញ្ជូនឧស្ម័នទៅអ៊ីស្រាអែល និងហ្ស៊កដានី ជាគោលដៅនៃការវាយប្រហារដោយគ្រាប់បែកមួយកាលពីព្រឹកថ្ងៃទី៥ កុម្ភៈ នៅឧបទ្វីបស៊ីណៃ របស់អេហ្ស៊ីប។ ប្រភពនេះបញ្ជាក់ថា ជនប្រដាប់អាវុធប្រមាណជា១០នាក់បាននាំគ្នាដាក់គ្រឿងផ្ទុះពីក្រោមបំពង់ឧស្ម័ននេះនៅភាគខាងលិចទីក្រុង EL-ARISH ខាងជើងឧបទ្វីបស៊ីណៃ ហើយពួកគេធ្វើឱ្យផ្ទុះនាវេលាម៉ោង១រំលងអធ្រាត្រម៉ោងក្នុងស្រុក។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៥:១៧
បណ្តាអង្គការប្រឆាំងស៊ីរីអះអាងថា មនុស្សដល់ទៅជាង២០០នាក់បានស្លាប់ក្នុងការវាយប្រហារប្រឆាំងទីក្រុងហូម កាលពីយប់ថ្ងៃទី៣ កុម្ភៈ ដោយកងទ័ពស៊ីរី។ ចាប់តាំងពីចាប់ផ្តើមចលនាបះបោរនៅស៊ីរីពីខែមីនា ឆ្នាំទៅមិញមកពួកប្រឆាំងពុំដែលលើកឡើងពីតុល្យការធ្ងន់ធ្ងរបំផុតបែបនេះឡើយ ។ ក៏ប៉ុន្តែអាជ្ញាធរស៊ីរីបានបដិសេធពីការវាយប្រហារលើទីក្រុងហូមនេះ ហើយអះអាងថា វីដេអូទាំងឡាយដែលបង្ហាញបណ្តាសាកសពជនរងគ្រោះគឺជារូបភាពប្រឌិត។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៤:២៦
ពួកប្រឆាំង និងពួកអ្នកគាំទ្រនាយករដ្ឋមន្ត្រីរុស្ស៊ី លោកវ៉្លាឌីមៀរ ពូទីន ជាច្រើនពាន់នាក់បានលើកគ្នាធ្វើបាតុកម្មកាលពីថ្ងៃទី៤ កុម្ភៈ នៅទីក្រុងមូស្គូ។ បាតុកម្មគាំទ្រលោកពូទីន ប្រមូលផ្តុំគ្នាប្រមាណជា១៣៨.០០០នាក់នៅសង្កាត់មួយនាភាគខាងលិចក្រុងមូស្គូ ចំណែកបាតុកម្មប្រឆាំងដែលតាមប៉ូលិសថា ប្រមូលផ្តុំមនុស្សប្រមាណជា៣៦.០០០នាក់ នៅក្បែរវិមានក្រឹមឡាំង ក៏ប៉ុន្តែពួកអ្នករៀបចំបាតុកម្មប្រឆាំងអះអាងថា មានមនុស្សចូលរួមដល់ជាង១២០.០០០នាក់។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៤:០៧
តុល្យការនៃរលកធាតុអាកាសត្រជាក់ខ្លាំងបំផុត ដែលរាតត្បាតចាប់តាំងពី១សប្តាហ៍មកហើយនៅអឺរ៉ុបអ្នកស្លាប់ឡើងដល់យ៉ាងតិច២៦០នាក់ មកដល់ថ្ងៃទី៤ កុម្ភៈ ពិសេសនៅភាគខាងកើតអឺរ៉ុប ដែលប្រទេសអ៊ុយក្រែន និងប៉ូឡូញរងការប៉ះពាល់ខ្លាំងជាងគេជាមួយមនុស្សស្លាប់ដល់១៦៧នាក់។ នៅអ៊ុយក្រែនពេលនេះគេរាប់ឃើញអ្នកស្លាប់១២២នាក់ ។ សីតុណ្ហភាពក្នុងប្រទេសនេះធ្លាក់ដល់២១អង្សាសេ ក្រោមសូន្យនាពេលថ្ងៃ និងដល់៣០អង្សាសេក្រោមសូន្យនាពេលយប់ ក៏ប៉ុន្តែអាចធូរស្រាលខ្លះវិញនាថ្ងៃទី៤ កុម្ភៈ ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១០:២៩
ប្រទេសរុស្ស៊ី និងចិន កាលពីថ្ងៃទី៤ កុម្ភៈ បានប្រើវេតូប្រឆាំងនឹងដំណោះស្រាយដាក់ដោយបណ្តាប្រទេសអឺរ៉ុប និងអារ៉ាប់ស្តីពីស៊ីរីដែលគាំទ្រវិធានការសម្ព័ន្ធអារ៉ាប់ឱ្យមានការផ្លាស់ប្តូររបបនៅស៊ីរី ដែលនេះជាលើកទី២ហើយ ចាប់តាំងពីខែតុលា ឆ្នាំ២០១១ មក។ គម្រោងដំណោះស្រាយរបស់ក្រុមប្រឹក្សាសន្តិសុខ អ.ស.ប ដាក់ដោយប្រទេសម៉ារ៉ុក ហើយគាំទ្រដោយសហរដ្ឋអាមេរិក និងពួកមហាអំណាចអឺរ៉ុបទទួលការគាំទ្រ១៣សំឡេង ក្នុងពេលបោះឆ្នោត។ ដើម្បីអាចអនុម័តគម្រោងដំណោះស្រាយមួយត្រូវទទួលការគាំទ្រដោយ៩សំឡេង
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១៣:៣៦
ទីភ្នាក់ងារព័ត៌មានបរទេសផ្សាយថ្ងៃទី២ កុម្ភៈ ឱ្យដឹងថា អ្នករួចផុតពីសេចក្តីស្លាប់មួយក្រុមត្រូវបានជួយសង្គ្រោះក្រោយពីកើតហេតុនាវា«MV Rabaul Queen»លិចនៅក្រៅឆ្នេរភាគខាងជើងប្រទេសប៉ាពូអាស៊ីនូវែលហ្គីណេ ខណៈពេលមានអ្នកដំណើរប្រហែល៣៥០នាក់ និងសហនាវឹក១២នាក់ នៅលើនាវានោះ ។ ក្នុងអំឡុងពេលចុងក្រោយនេះ
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១១:០៨
រដ្ឋមន្ត្រីក្រសួងប្រេងកាតអ៊ីរ៉ង់ លោករ៉ូស្តាម កាសឺមី ថ្លែងកាលពីថ្ងៃទី៤ កុម្ភៈ ថា អ៊ីរ៉ង់នឹងបញ្ឈប់ជាស្ថាពរនូវការនាំចេញប្រេងរបស់ខ្លួនទៅកាន់ប្រទេសអឺរ៉ុបមួយចំនួន។ លោកកាសឺមី ពុំបានបញ្ជាក់ពីឈ្មោះរបស់ប្រទេសទាំងនេះឡើយ ក៏ប៉ុន្តែសេចក្តីថ្លែងការណ៍របស់លោកនេះធ្វើឡើងក្រោយការព្រមព្រៀងគ្នារបស់បណ្តាមេដឹកនាំសហភាពអឺរ៉ុប លើការដាក់ទណ្ឌកម្មថ្មីៗប្រឆាំងការនាំចេញប្រេងអ៊ីរ៉ង់ ហើយទណ្ឌកម្មបែបនេះត្រូវបានអនុម័តដោយបណ្តារដ្ឋមន្ត្រីការបរទេសសហភាពអឺរ៉ុប កាលពីថ្ងៃទី២៣ មករា ។
ថ្ងៃអាទិត្យ ទី៥ ខែកុម្ភៈ ឆ្នាំ២០១២ ម៉ោង ១០:៣៨
មនុស្ស៥នាក់ទៀតស្លាប់ក្នុងការប៉ះទង្គិចគ្នារវាងពួកបាតុករ និងកងកម្លាំងប៉ូលិស នៅមុខក្រសួងមហាផ្ទៃនាទីក្រុងគែរ ធ្វើឱ្យចំនួនអ្នកស្លាប់ក្នុងប្រទេសដោយសារបាតុកម្មហិង្សាឡើងដល់១២នាក់ហើយ ។ នេះជាតុល្យការថ្មីមួយប្រកាសកាលពីថ្ងៃទី៤ កុម្ភៈ ដោយក្រសួងសុខាភិបាលអេហ្ស៊ីប។ មនុស្សទាំង៥នាក់នេះស្លាប់កាលពីថ្ងៃទី៤ កុម្ភៈ ក្នុងពេលមានការប៉ះទង្គិចគ្នារវាងពួកបាតុករ និងប៉ូលិសនៅមុខអគារក្រសួងមហាផ្ទៃ ។ មនុស្ស២នាក់ស្លាប់កាលពីថ្ងៃទី៣ កុម្ភៈ ក្នុងការប៉ះទង្គិចគ្នានៅមុខក្រសួងមហាផ្ទៃដែរ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៧:៣៦
រថយន្តជប៉ុនដែលលក់ចេញកើនឡើងជាង៤០ភាគរយក្នុងខែមករា ឆ្នាំនេះ បន្ទាប់ពីរដ្ឋាភិបាលស្តារប្រាក់ជំនួយសម្រាប់រថយន្តការពារបរិស្ថានឬរថយន្តមិត្តល្អនឹងបរិស្ថាន។ ការលក់រថយន្តដែលមានកម្លាំងលើសពី ៦៦០cc មានចំនួន២៦៣.២៦៧គ្រឿងក្នុងខែ មករា គឺកើនឡើង៤០,៧ភាគរយ ធៀបជាមួយឆ្នាំមុន នេះបើតាម ការឱ្យដឹងរបស់សមាគមចែកចាយរថយន្តជប៉ុន។ តួលេខលក់ដាច់ខ្លាំងនោះ រួមមានរថយន្តប្រភេទធំដូចជារថយន្តដឹកទំនិញ និងរថយន្តប៊ើសជាដើម ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៧:៣០ 
អត្រាអ្នកអត់ការងារធ្វើក្នុងប្រទេសជប៉ុនកើនឡើង៤,៦ភាគរយក្នុងខែវិច្ឆិកា ឆ្នាំមុន នេះបើតាមមន្រ្តីរដ្ឋាភិបាលនិយាយកាលពីថ្ងៃអង្គារ ទី៣១ មករា ។ ចំនួនអ្នកអត់ការងារធ្វើស្ថិតនៅត្រឹម២,៧៥លាននាក់ ធ្លាក់ចុះចំនួន២៤០.០០០នាក់ធៀបជាមួយឆ្នាំ២០១០ ។ នេះបើតាមតួលេខផ្តល់ពីក្រសួងទូរគមនាគមន៍ និងកិច្ចការផ្ទៃក្នុង ។ ប៉ុន្តែស្របពេលអាយុកាលនៃចំនួនប្រជាជនសកម្មជប៉ុនក៏ធ្លាក់ចុះ នោះមានន័យថា អត្រាអ្នកអត់ការងារនឹងកើនឡើងខ្ពស់ ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៧:២០
មានមនុស្សប្រមាណជាង៨.៣២៤នាក់បានរងការប៉ះពាល់ដោយសារការពុលអាហារក្នុងឆ្នាំ ២០១១ ហើយក៏មានមនុស្ស១៣៧នាក់ក្នុងចំ ណោមនោះស្លាប់ ។ នេះបើតាមក្រសួងសុខាភិបាល។ ចំនួននោះត្រូវបានដកស្រង់តាមរបាយការណ៍ក្នុងត្រីមាសទី៤ ដែលទើបតែចេញផ្សាយថ្មីៗក្នុងគេហទំព័រក្រសួងកាលពីថ្ងៃព្រសហ្បតិ៍។ បន្ថែមលើសពីនេះ ក៏មានករណីពុលអាហារចំនួន១៨៩ករណីដែរក្នុងឆ្នាំ២០១០។ សម្រាប់ឆ្នាំ២០១១ ចំនួនអ្នកពុលអាហារធ្លាក់ចុះ១៤ភាគរយធៀបនឹងឆ្នាំ២០១០។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៧:១៨
ស្រ្តីម្នាក់នៅវៀតណាមខាងត្បូង បានក្លាយជាមនុស្សទី២ហើយ ដែលស្លាប់ដោយសារជំងឺផ្តាសាយបក្សីនៅប្រទេសវៀតណាមក្នុងឆ្នាំ២០១២។ មន្ត្រីក្រសួងសុខាភិបាលនិយាយថា ស្រី្តវ័យ១៦ឆ្នាំ មកពីខេត្ត Soc Trang ស្លាប់កាលពីថ្ងៃសៅរ៍សប្តាហ៍មុន បន្ទាប់ពីសម្រាកព្យាបាលជំងឺក្អកនិងក្តៅខ្លួនខ្លាំង។ វិទ្យាស្ថានស្រាវជ្រាវក្នុងទីក្រុងហូជីមិញ រកឃើញថា មានឆ្លងជំងឺផ្តាសាយបក្សី H5N1 ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៧:១៦
កងយោធាអ៊ិស្លាមនិយាយថា ក្នុងការបើកការវាយប្រហារតាមផ្លូវអាកាសបានសម្លាប់យោធាអ៊ិស្លាមជ្រុលនិយមចំនួន១៥នាក់ ។ ពួកគេជាក្រុមជាប់ពាក់ព័ន្ធនឹងបណ្តាញភេរវករអន្តរជាតិអាល់កៃដា។ យោធានិយាយថា យន្តហោះចំបាំងបានទម្លាក់គ្រាប់ បែកលើជំរំយោធាអ៊ិស្លាមនាព្រឹកថ្ងៃព្រហស្បតិ៍ លើកោះ Jolo ភាគខាងត្បូងប្រទេសហ្វ៊ីលីពីន ។ យោធាបន្តថា ការវាយប្រហារបានសម្លាប់ មេដឹកនាំ និងសមាជិក Abu Sayyaf ចំនួន១២នាក់ និងពីរនាក់ទៀតមកពីក្រុមJemaah Islamiyah ដែលជាបណ្តាញភេរវករអាស៊ីអាគ្នេយ៍។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៦:៥៧
ក្រសួងសភាពការណ៍បន្ទាន់អ៊ុយក្រែនក្នុងសេចក្តីប្រកាសមួយរាយការណ៍កាលពីថ្ងៃទី៣ កុម្ភៈ ថា មនុស្សដល់ទៅ១០១នាក់ ហើយត្រូវស្លាប់ ដោយសាររលកធាតុអាកាសត្រជាក់ខ្លាំងក្នុងប្រទេសនេះ ចាប់តាំងពីថ្ងៃទី២៧ មករា មក។ តុល្យការប្រកាសនាពេលមុននេះរៀបរាប់ពីមនុស្សស្លាប់ត្រឹម៦៣នាក់ប៉ុណ្ណោះ ។ សីតុណ្ហភាពនៅអ៊ុយក្រែន ធ្លាក់ដល់២៥អង្សាសេ ក្រោមសូន្យ ធ្វើឱ្យស្ទះដល់ការផ្គត់ផ្គង់នានា និងដល់ការធ្វើចរាចរណ៍របស់រថយន្ត ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៤:២៥
ម៉ាស៊ីនឃោសនាក្នុងស្រុករាយការណ៍កាលពីថ្ងៃទី២ កុម្ភៈ ថា ប្រេងដល់ទៅជិត២៤០តោន បានកំពប់កាលពីថ្ងៃទី៣១ មករា កន្លងមកនេះ ក្រោយពីរថភ្លើងមួយខ្សែធ្លាក់ពីផ្លូវដែកនៅចុងបូព៌ារុស្ស៊ី។ រថភ្លើងដែលរត់ពីទីក្រុងស្កូវ៉ូរ៉ូឌីណូ ទៅកាន់កំពង់ផែណាខូដា មានទូ ស៊ីទែន ដល់ទៅ៦៨ ក្នុងនោះ១៧បានធ្លាក់ពីផ្លូវដែក កាលពីព្រឹកថ្ងៃទី៣១ មករា ក្នុងតំបន់អាមួរ ដោយក្នុងចំណោមទូទាំង១៧ ដែលត្រឡប់ទូស៊ីទែន១៣ ត្រូវភ្លើងឆាបឆេះ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៦:០៩
យោងតាមទីភ្នាក់ងារព័ត៌មានកូរ៉េខាងត្បូង YONHAP ថា កូរ៉េខាងជើងហាក់ដូចជាចង់ប្រកាន់យកគោលការណ៍បែបមូលធននិយម ដើម្បីជួយសង្គ្រោះសេដ្ឋកិច្ចរបស់ខ្លួន ដែលស្រុតចុះហើយកែលម្អស្តង់ដាជីវភាពរបស់ពលរដ្ឋខ្លួន។ កាសែតប្រចាំត្រីមាសមួយអំពីសេដ្ឋកិច្ចរបស់កូរ៉េខាងជើងគូសបញ្ជាក់ពីសារសំខាន់នៃការផ្សាយពាណិជ្ជកម្ម ដើម្បីជួយជំរុញការនាំចេញរបស់ប្រទេស ដែលពឹងផ្អែកយ៉ាងខ្លាំងលើប្រទេសចិន ។ ប្រទេសកូរ៉េខាងជើងនាំចេញជាពិសេសនូវធនធានរ៉ែផ្សេងៗទៅកាន់ប្រទេសចិន។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៥:៣២
អនុរដ្ឋមន្ត្រីការពារប្រទេសរុស្ស៊ី លោកអាណាតូលី អានតូណូវ ថ្លែងកាលពីថ្ងៃទី២ កុម្ភៈ ថា រុស្ស៊ីនឹងបន្តផ្តល់អាវុធឱ្យដល់កងទ័ពស៊ីរី។ ក្នុងសន្និសីទសារព័ត៌មានមួយនាទីក្រុងមូស្គូលោកអាតូណូវ អះអាងថា រុស្ស៊ីប្រកាន់ខ្ជាប់កាតព្វកិច្ចអន្តរជាតិខាងការផ្គត់ផ្គង់អាវុធធម្មតា។ យើងពុំបានរំលោភបំពានលើបណ្តាកាតព្វកិច្ចអន្តរជាតិឡើយ ។ លោកបន្តថា រុស្ស៊ីពុំបានផ្តល់ឱ្យក្រុងដាម៉ាស់នូវអាវុធសម្លាប់រង្គាលឡើយ ។ ស៊ីរីពេញចិត្តចំពោះកិច្ចសហប្រតិបត្តិការយោធា-បច្ចេកទេសជាមួយរុស្ស៊ី ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១៥:១៤
ពលរដ្ឋអូស្ត្រាលីជាច្រើនពាន់នាក់ត្រូវជាប់ក្នុងផ្ទះទៅណាមិនរួច កាលពីថ្ងៃទី៣ កុម្ភៈ នៅភាគខាងត្បូងប្រទេស ដោយសារទឹកជំនន់ ធ្វើឱ្យសហគមន៍ជាច្រើនអាចធ្វើដំណើរបានតែតាមឧទ្ធម្ភាគចក្រប៉ុណ្ណោះ។ យោងតាមអាជ្ញាធរថា មនុស្សប្រមាណជា៧.២០០នាក់ ត្រូវស្ថិតនៅឯកោដាច់ពីគេក្នុងរដ្ឋនូវែលហ្គាល់ ខាងត្បូង និងក្នុងរដ្ឋគ្វីនឡែន ។ បើមើលពីលើយន្តហោះតំបន់ទាំងនេះ ហាក់ដូចជាកោះ ។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១១:១៩
ប្រភពការទូតលោកខាងលិចនៅទីស្នាក់ការ អ.ស.ប រាយការណ៍ថា រុស្ស៊ីប្រកាសថា ខ្លួននឹងប្រើវេតូប្រសិនបើគម្រោងដំណោះស្រាយស្តីពីស៊ីរីគាំទ្រដោយពួកលោកខាងលិច និងសម្ព័ន្ធអារ៉ាប់ត្រូវដាក់នាថ្ងៃទី៣ កុម្ភៈ ឱ្យក្រុមប្រឹក្សាសន្តិសុខ អ.ស.ប អនុម័ត។ ឯកអគ្គរដ្ឋទូតរុស្ស៊ីប្រចាំ អ.ស.ប លោកវីតាលីឈួរ គីន ឱ្យដឹងពីជំហរនេះក្នុងឱកាសនៃកិច្ចប្រជុំសម្ងាត់មួយរបស់ក្រុមប្រឹក្សាសន្តិសុខ ខណៈដែលសមាជិកជាច្រើនរបស់ក្រុមប្រឹក្សានេះ និយាយថា មានការរីកចម្រើននានាក្នុងពេលពិភាក្សា។
ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ១១:១៥
កាសែតអាមេរិកវ៉ាស៊ីនតោនប៉ុស្តិ៍រាយការណ៍កាលពីថ្ងៃទី២ កុម្ភៈ ថា រដ្ឋមន្ត្រីការពារប្រទេសអាមេរិក លោក LEON PANETTA ថ្លែងថា អ៊ីស្រាអែលនឹងអាចវាយប្រហារអ៊ីរ៉ង់នារដូវផ្ការីកខាងមុខនេះ។ យោងតាមកាសែតនេះ លោក PANETTA យល់ថា មានលទ្ធភាពខ្ពស់ដែលអ៊ីស្រាអែលវាយប្រហារអ៊ីរ៉ង់ក្នុងខែមេសា ឧសភា ឬមិថុនាខាងមុខនេះ មុនពេលអ៊ីរ៉ង់ចាប់ផ្តើមផលិតគ្រាប់បែកនុយក្លេអ៊ែរមួយគ្រាប់។