លិចនាវា2នៅកុងហ្គោកាលពីចុងសប្តាហ៍ស្លាប់270នាក់
ដោយ ៖ ប្រុសកោះ
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១០:៣៧
ទីភ្នាក់ងារព័ត៌មានក្នុងស្រុករាយការណ៍ថា មនុស្សយ៉ាងហោចណាស់៧០នាក់ត្រូវបានគេគិតថា ស្លាប់នៅក្នុងហេតុការណ៍លិចនាវាមួយនៅក្នុងប្រទេសកុងហ្គោ កាលពីល្ងាចថ្ងៃទី៥ កញ្ញា កន្លងមក ។ ទីភ្នាក់ងារព័ត៌មានដដែលនេះបានផ្សាយព័ត៌មានដោយដកស្រង់សំដីអាជ្ញាធរដែលនិយាយថា នាវានេះបានបើកបុកថ្មយ៉ាងធំ បណ្តាលឱ្យលិចនៅក្នុងទន្លេមួយនាភាគពាយ័ព្យប្រទេសកុងហ្គោ ។
ការលិចនាវានេះជាគ្រោះថ្នាក់តាមផ្លូវទឹកធ្ងន់ធ្ងរបំផុតទី២ កាលពីចុងសប្តាហ៍កន្លងមក ដោយកាលពីល្ងាចថ្ងៃទី៤ កញ្ញា នាវាមួយគ្រឿងទៀតបានលិចក្រោយពីម៉ាស៊ីនផ្ទុះឆេះ ខណៈពេលកំពុងបើកនៅក្នុងទន្លេ Kasia ដែលក្នុងហេតុការណ៍នេះមនុស្សជិត២០០នាក់ ត្រូវបានគេគិតថាស្លាប់ ។ សរុបមក ការលិចនាវា២នៅក្នុងប្រទេសកុងហ្គោកាលពីចុងសប្តាហ៍កន្លងមក បណ្តាលឱ្យស្លាប់មនុស្ស២៧០នាក់ ៕
