"ការប្រមាថដ៏រោលរាល" សង្ឃប្រកាស ៖ សុនធិ លឹមថងគុន ជាបុគ្គលពាលនិងមិច្ឆាទិដ្ឋិ គួរតែត្រូវកាត់ទោស
ដោយ ៖ អប្សរា
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ០៩:៥០
អ៊ុយសុង
ព្រះរាជអធិបតីភាពសម្តេចព្រះអគ្គមហាសង្ឃរាជាធិបតី ទេព វង្ស ធ្វើសង្ឃប្រកាស
រាជធានីភ្នំពេញ ៖ ពាក្យសំដីអសុរសរបស់បុគ្គលសុនធិ ដែលជាមេដឹកនាំក្រុមអាវលឿងសៀមជ្រុលនិយម ដែលបាននិយាយប្រមាថកាតទានយ៉ាងអសីលធម៌បំផុត មកលើបុគ្គលជាទីគោរពសំរាប់ជនកម្ពុជា ដ៏ច្រើនលើសលុប គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តឱ្យមានការឆាបឆេះក្នុងអារម្មណ៍ខ្មែរទូទៅ ឥតស្រាកស្រាន្តព្រោះថា ពាក្យសំដីដែលមិនអាចទទួលយកបានដូចជា ប្រើពាក្យ «កុំថាតែយកឈាមមកលាងជើងស្តេចថៃ ត្រូវកាត់ក្បាលដោតផ្ចាញ់ផ្ចាលថែមទៀត» ។
នៅវត្តឧណ្ណាលោម កាលពីថ្ងៃទី៤ កញ្ញា មានរៀបចំពិធីសង្ឃប្រកាសក្រោមព្រះរាជអធិបតីភាពសម្តេចព្រះអគ្គមហាសង្ឃរាជាធិបតី ទេព វង្ស ក្នុងនាមជាសហប្រធានអន្តរសាសនាពិភពលោក ។ នៅក្នុងសង្ឃប្រកាសដែលបានប្រកាស ដោយសម្តេចព្រះអគ្គមហាសង្ឃរាជាធិបតី ទេព វង្ស មានខ្លឹមសារទាក់ទិនទៅនឹងការប្រើពាក្យប្រមាថនេះ របស់បុគ្គលសុនធិ លឹមថងគុន ។ សង្ឃប្រកាសមានខ្លឹមសារទាំងស្រុងថា សម្តេចព្រះអគ្គមហាសសង្ឃរាជាធិបតី ទេព វង្ស ក្នុងនាមជាសហប្រធានអន្តរសាសនាពិភពលោកសំរេចធ្វើសង្ឃប្រកាសបំភ្លឺដល់បុគ្គល សុនធិ លឹមថងគុន មេដឹកនាំក្រុមសម្ព័ន្ធមិត្តអាវលឿងថៃ ដែលជាអ្នកវង្វេងប្រវត្តិសាស្ត្រ ហើយប្រព្រឹត្តអំពើពាលាជាជនពាលក្នុងសង្គមថៃ ។ សម្តេចព្រះមហាសង្ឃរាជ នៃព្រះរាជាណាចក្រកម្ពុជា ចំរើនពរជំរាបប្រាប់ដល់អ្នកដឹកនាំព្រះរាជាណាចក្រថៃ ឱ្យបានជ្រាបផងដែរថា សម្តេចសហប្រធានអន្តរសាសនាពិភពលោកបានសហការជាមួយនឹងសាខាអង្គការសហប្រជាជាតិប្រចាំនៅទីក្រុងបាងកក បានប្រារព្ធពិធីបុណ្យវិសាខបូជាប្រចាំឆ្នាំ ក្នុងសមាគមប្រទេសអាស៊ានទាំង១០ ហើយបានសំរេចប្រគេនដល់ព្រះធម្មឃោសាចារ្យ ប៉ាយួន ធម្មចិត្តោ ជាប្រធានសមាគម វិសាខបូជា និងបានថ្វាយព្រះបរមនាមសម្តេចព្រះពុទ្ធាចារ្យវត្តស្រះកេត ជាសម្តេចព្រះសង្ឃរាជគណៈមហានិកាយនៃព្រះរាជាណាចក្រថៃ ព្រមទាំងបានថ្វាយព្រះរាជសទ្ធាព្រះករុណា ភូមិបុលអាឌុលយ៉ាដេត ធ្វើអង្គព្រះកឋិនទានជារៀងរាល់ឆ្នាំ ដើម្បីវេរថ្វាយព្រះសង្ឃគង់ចាំព្រះវស្សាក្នុងព្រះរាជាណាចក្រកម្ពុជា នេះគឺជាឆន្ទៈរបស់សម្តេចសហប្រធានអន្តរសាសនា ដើម្បីសន្តិភាពរវាងកម្ពុជា និងថៃឡង់ ។
ប៉ុន្តែបច្ចុបុ្បន្ននេះ សកម្មភាពមួយដែលប្រាសចាកក្រមសីលធម៌របស់មនុស្សទូទៅ ជាពិសេសសកម្មភាពរបស់មនុស្សអាវាសែច្រឡោងខាមមិនដឹងទិសតំបន់ បានលេចធ្លោឡើងជាទ្រង់ទ្រាយធំ ដែលបង្កឡើងដោយជនពាល ជនអគតិ រង្វេងប្រវត្តិសាស្ត្រឈ្មោះសុនធិ លឹមថងគុន ចំកណ្តាលដួងព្រលឹងនៃទឹកដីសន្តិភាពក្រុងបាងកកតែម្តង ។ បុគ្គលរូបនេះឯងបានប្រព្រឹត្តអំពើបំពានច្បាប់រដ្ឋដោយបានប្រើពាក្យសំដី និងធ្វើនូវកាយវិការប្រមាថមើលងាយមើលថោកដែលយើងទាំងអស់គ្នាមិនអាចទទួលយកបានមកលើថ្នាក់ដឹកនាំកំពូលប្រទេសកម្ពុជា ពិសេសមកលើសម្តេចអគ្គមហាសេនាបតីតេជោ ហ៊ុន សែន តែម្តង ដែលជាអ្នកដឹកនាំប្រកបដោយគុណធម៌ និងជាទីគោរពស្រឡាញ់ដ៏ខ្ពង់ខ្ពស់របស់ប្រជាជនកម្ពុជាទូទាំងប្រទេស ។ សម្តេចហ៊ុន សែន ជាមេដឹកនាំមួយរូបដែលស្រឡាញ់ សុខសន្តិភាព និងមានគុណធម៌សេចក្តីថ្លៃថ្នូរដ៏ខ្ពង់ខ្ពស់ណាស់ ។ ទោះបីជាមានជនពាលអគតិជេរប្រមាថយ៉ាងណាក៏ដោយ ក៏សម្តេចមិនមានសេចក្តីក្រោធខឹង ដោយខ្វះការពិចារណានោះឡើយ សម្តេចតែងតែមានសេចក្តីសន្តោសប្រណីដល់ជនគ្រប់រូប សម្តេចមិនប្រកាន់យកនូវការបៀតបៀនចងអាឃាតព្យាបាទគ្នានោះឡើយ ដោយសម្តេចយកព្រះពុទ្ធឱវាទដ៏ស័ក្តិសិទ្ធិមកអនុវត្តគឺ «វេរានិ អវេនានិ» មានន័យថា ពៀររំងាប់ដោយការមិនចងពៀរ ហើយការឆ្លើយតបរបស់សម្តេច គឺធ្វើឡើងសមហេតុសមផល និងប្រកបដោយគុណធម៌ និងសេចក្តីថ្លៃថ្នូរជាទីបំផុត ។ ដោយប្រើពាក្យប្រមាថ ចំដោយផ្ទាល់ថា «កុំថាតែយកឈាមមកលាងជើងស្តេចថៃ ត្រូវកាត់ក្បាលដោតផ្ចាញ់ផ្ចាលថែមទៀត» ពាក្យសំដី និងទង្វើបែបនេះ ចាត់ទុកជាអ្នកមិនគោរពនូវពុទ្ធោវាទ ដែលព្រះអង្គតែងតែសម្តែងអប់រំទូន្មានដល់ពុទ្ធសាសនិករបស់ព្រះអង្គថា «ចូរអ្នកទាំងឡាយកុំប្រមាថ សេចក្តីប្រមាថនាំឱ្យវិនាស» ។ សូមបញ្ជាក់ថា គំនិតផ្តួចផ្តើមដ៏ឆ្កួតលីលារបស់លោក សុនធិ លឹមថងគុន បែបនេះ មិនមែនប៉ះពាល់ត្រឹមតែសម្តេចហ៊ុន សែន ប៉ុណ្ណោះទេ វាថែមទាំងប៉ះពាល់ ដល់ព្រះករុណាភូមិបុលអាឌុលយ៉ាដេតទៀតផង ដែលព្រះអង្គជាពុទ្ធសាសនិកមួយអង្គជឿជាក់លើព្រះពុទ្ធសាសនា ហើយដែលប្រជាពលរដ្ឋថៃគោរពបូជាយ៉ាងខ្លាំង និងជាងនេះទៅទៀត បានធ្វើឱ្យប្រទេសថៃ បាក់មុខមាត់នៅលើឆាកអន្តរជាតិ ។
សម្តេចព្រះមហាសង្ឃរាជនៃព្រះរាជាណាចក្រកម្ពុជា ក្នុងនាមជាសហប្រធានអន្តរសាសនាពិភពលោក បានទ្រង់យល់ថា សកម្មភាពរបស់លោកសុនធិ លឹមថងគុន គឺជាសកម្មភាពរបស់បុគ្គលពាល បុគ្គលមិច្ឆាទិដ្ឋិ ដែលព្រះពុទ្ធជាម្ចាស់ តែងទ្រង់ប្រៀនប្រដៅប្រាប់ដល់សាវ័ករបស់ព្រះអង្គមិនឱ្យទៅសេពគប់ និងឱ្យចៀសចេញឱ្យឆ្ងាយថែមទៀតផង ព្រោះខ្លាចវិនាសដល់ខ្លួន ។ អាជ្ញាធរមានសមត្ថកិច្ចថៃត្រូវតែចាប់ខ្លួនបុគ្គលរូបនេះ យកមកកាត់ទោសតាមច្បាប់ ដើម្បីឱ្យបុគ្គលនេះរាងចាល និងយកមកធ្វើការអប់រំ តាមច្បាប់ពុទ្ធសាសនា ហើយដើម្បីកែលំអរដល់បុគ្គលអគតិរូបនេះ ឱ្យក្លាយទៅជាជនបណ្ឌិតជាបន្ទាន់ ។ ជាមួយគ្នានេះកាលពីថ្ងៃទី៤ កញ្ញា សមាគមសិស្ស-និស្សិត បញ្ញវន្តក្មេងវត្ត និងសមាគមយុវជនកម្ពុជា-អាស៊ានក៏បានថ្កោលទោសដល់សុនធិ លឹមថងគុន ដែរ ។ តាមសមាគមសិស្ស និស្សិតបញ្ញវន្តក្មេងវត្តបានចេញសេចក្តីថ្លែងការណ៍ថា នៅពេលថ្មីៗនេះតាមរយៈការផ្សព្វផ្សាយតាមប្រព័ន្ធអ៊ីនធើណេត សមាគមសិស្ស និស្សិតបញ្ញវន្តក្មេងវត្តក៏ដូចជាសាធារណជនទូទៅបានឃើញនូវទង្វើរបស់ជនអគតិស៊ុនធិ លឹមថងគុន ដែលជាជនជាតិសៀម បានប្រើពាក្យអគុណធម៌ទៅលើសម្តេចអគ្គមហាសេនាបតីតេជោ ហ៊ុន សែន ជាទីគោរពរបស់ប្រជាជនកម្ពុជា ដោយចង់កាត់ក្បាលយកឈាមទៅលាងជើង ហើយយកក្បាលទៅដោតដើម្បីផ្ចាញ់ផ្ចាល មិនតែប៉ុណ្ណោះថែមទាំងធ្វើមន្តអាគមថែមទៀតផង ។
សមាគមសិស្ស និស្សិតបញ្ញវន្តក្មេងវត្តសំដែងនូវការសោកស្តាយយ៉ាងខ្លាំង ចំពោះទង្វើដ៏អគតិរបស់មេដឹកនាំក្រុមអាវលឿងរូបនេះ បានប្រមាថមើលងាយទៅលើប្រមុខដឹកនាំប្រទេសកម្ពុជាដែលជាប្រទេសឯករាជ្យ និងអធិបតេយ្យមួយ ។ យើងខ្ញុំពិនិត្យ និងយល់ឃើញថា ស៊ុនធិ លឹមថងគុន គឺជាមេដឹកនាំសម្ព័ន្ធភាពប្រជាជន ដើម្បីប្រជាធិបតេយ្យនិយមជ្រុលក្រុមអាវលឿង ជាជនវង្វេងប្រវត្តិសាស្ត្រមួយដែលតែងតែប្រើពាក្យសំដី និងទង្វើញុះញង់បង្កឱ្យមានអរិភាពរវាងជនជាតិកម្ពុជា និងជនជាតិសៀម ទង្វើទមិឡឥតសាសនារបស់ជនរូបនេះមកលើប្រមុខរាជរដ្ឋាភិបាលកម្ពុជា ជាទង្វើមិនអាចទទួលយកបានឡើយ ។ អាស្រ័យហេតុនេះយើងខ្ញុំទាំងអស់គ្នាសូមធ្វើការថ្កោលទោសយ៉ាងដាច់អហង្ការចំពោះស៊ុនធិ លឹមថងគុន និងបក្សពួកមួយក្តាប់តូច ហើយនិងឱ្យធ្វើការសុំទោសជាលាយលក្ខណ៍អក្សរ និងជាសាធារណៈចំពោះសម្តេចអគ្គមហាសេនាបតីតេជោ ហ៊ុន សែន ដែលជាមគ្គុទេសដ៏ឆ្នើមរបស់ប្រទេសកម្ពុជា ។
ក្នុងប្រតិកម្មដូចគ្នានេះដែរ ចំណែកសមាគមយុវជន កម្ពុជា-អាស៊ាន ក៏បានប្រកាសកាលពីថ្ងៃទី៤ កញ្ញា សូមធ្វើការបំភ្លឺបកស្រាយពីបញ្ហាសីលធម៌ជនអសីលធម៌ សុនធិ លឹមថងគុន ចំពោះទង្វើរបស់លោកមួយចំនួននាពេលថ្មីៗនេះ ។ ពួកយើងបានកត់សំគាល់ឃើញថា ចាប់តាំងពីថ្ងៃទី១៥ មិថុនា ឆ្នាំ១៩៦២ ដែលតុលាការយុត្តិធម៌អន្តរជាតិទីក្រុងឡាអេ បានសំរេចឱ្យកម្ពុជា ឈ្នះក្តីរឿងប្រាសាទព្រះវិហារ និងព្រឹត្តិការណ៍របស់សៀម ចាប់តាំងពីថ្ងៃទី១៥ កក្កដា ឆ្នាំ២០០៨ ដែលកងទ័ពសៀម បានរំលោភឈ្លានពានលើបូរណភាពទឹកដីកម្ពុជា នៅតំបន់ប្រាសាទព្រះវិហារ និងបានបង្កើតឱ្យមានស្ថានការណ៍តានតឹងរវាងកម្ពុជា និងសៀមមកដល់បច្ចុបុ្បន្ននេះ បានបង្ហាញឱ្យឃើញថា សៀមបានបង្កបញ្ហារំខានភាពសុខសាន្តរបស់កម្ពុជាម្តងហើយម្តងទៀត ដោយមិនមានការខ្មាសអៀន ។ នាពេលចុងក្រោយនេះ មនុស្សគ្មានសីលធម៌ គ្មានគុណធម៌ ជាតិសៀម ស៊ុនធិ លឹមថងគុន ដែលជាមេដឹកនាំសម្ព័ន្ធភាពប្រជាជនដើម្បីប្រជាធិបតេយ្យ (ក្រុមអាវលឿង) និងគូរកនមួយចំនួនបាននិយាយប្រមាថមកលើសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរបៀបមនុស្សព្រៃនោះ យើងខ្ញុំយល់ឃើញថា ការប្រមាថនេះ ជាទង្វើដែលគ្មានវិចារណញាណ និងជាចរឹតពាលរបស់បុគ្គលដែលគ្មានសីលធម៌បន្តិចសោះឡើយ ។ ចំពោះជនជាតិសៀមដែលមានការចេះដឹង យើងខ្ញុំប្រាកដថា ទង្វើនេះ បានធ្វើឱ្យរំខានចិត្តរបស់ជាតិសាសន៍ពួកគេ ឱ្យរឹតតែក្តៅក្រហល់ក្រហាយខ្លាំងឡើងៗ ហើយកម្មពារវេរាពិតនឹងធ្លាក់លើជនកំហូច ស៊ុនធិ លឹមថងគុន វិញជាក់ជាពុំខាន ។ ជាក់ស្តែងកាលពីថ្ងៃព្រហស្បតិ៍ ទី២៦ សីហា ឆ្នាំ២០១០ នគរបាលសៀមបានធ្វើការចោទប្រកាន់លើពួកអ្នកជាតិនិយមជ្រុលក្រុមអាវលឿងរាប់សិបនាក់ ហើយឈ្មោះស៊ុនធិ់ លឹមថងគុន ត្រូវប្រឈមមុខនឹងការចោទប្រកាន់ពីបទភេរវកម្ម ។ កាលពីឆ្នាំ២០០៨ ជាតិសៀម សុនធិ លឹមថងគុន ត្រូវបានឃាតករលួចបាញ់សំលាប់បានរងរបួសស្ទើរស្លាប់នោះ លោកថាក់ស៊ីន អតីតនាយរដ្ឋមន្ត្រីសៀម បានលើកឡើងថា អ្វីដែលកើតឡើងលើលោកសុនធិ លឹមថងគុន គឺដោយសារទង្វើរបស់ខ្លួនមិនត្រឹមត្រូវធ្វើឱ្យភ្នែកមហាជនទូទៅគេមិនសប្យាយចិត្តដែលបានរុញច្រានឱ្យប្រទេសជាតិ ធ្លាក់ទៅក្នុងវិបត្តិនយោបាយ និងធ្វើឱ្យសេដ្ឋកិច្ចសៀម ធ្លាក់ចុះ ។ នេះជាការលើកឡើងរបស់លោកថាក់ស៊ីន ស៊ីណាវាត្រា នៅក្រោយពេលដែលក្រុមមេដឹកនាំសម្ព័ន្ធមិត្តប្រជាជន ដើម្បីប្រជាធិបតេយ្យអាវលឿង បានចោទប្រកាន់ថា លោកថាក់ស៊ីន នៅពីក្រោយសកម្មភាពប៉ុនប៉ុងសំលាប់លោកសុនធិ លឹមថងគុន ។ ដូច្នេះប្រសិនបើប្រទេសសៀម មានមនុស្សឆ្កូតដូចជា សុនធិ លឹមថងគុន ច្រើនឡើងពេលណានោះ សៀមនឹងឈានឆ្ពោះទៅរកការបាត់បង់ទឹកដី និងពូជសាសន៍នាពេលខាងមុខដ៏ខ្លីជាក់ជាមិនខាន ។ យើងខ្ញុំទាំងអស់គ្នាជាតំណាងសមាគមយុវជនកម្ពុជា-អាស៊ាន បានមើលឃើញថា ចរិតច្រឡោងខាមរបស់សុនធិ និងការប្រមាថប៉ះពាល់ដល់កិត្តិយសរបស់សម្តេចអគ្គមហាសេនាបតីតេជោ ហ៊ុន សែន នេះហើយដែលជនពាលម្នាក់នេះ និងគូរកនបានទទួលនូវកម្មពៀរទាន់ហន់ គឺនៅថ្ងៃទី២ កញ្ញា ឆ្នាំ២០១០ តុលាការឧក្រិដ្ឋកម្មក្នុងប្រទេសថៃ បានកាត់ទោសលោកសុនធិ លឹមថងគុន និងលោកសារ៉ូឆាផន ឧត្តមសាក់ ឱ្យជាប់ពន្ធនាគារម្នាក់ៗ៦ខែ និងពិន័យជាប្រាក់២ម៉ឺនបាត ដែលអ្នកទាំងពីរនេះនឹងត្រូវព្យួរទោសរយៈពេល២ឆ្នាំ ពីបទបរិហារកេរ្តិ៍អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ដោយសារតែពួកគេបានចោទប្រកាន់លោកថាក់ស៊ីន ស៊ីណាវ៉ាត្រា ថា បានប្រមាថព្រះមហាក្សត្រ ។
ការជេរប្រមាថរបស់ជាតិសៀម សុនធិ លឹមថងគុន មកលើប្រមុខដឹកនាំកំពូលនៃព្រះរាជាណាចក្រកម្ពុជា យើងខ្ញុំបានកត់សំគាល់ឃើញថា រាជរដ្ឋាភិបាលកម្ពុជា មិនបានធ្វើខ្លួនឱ្យធ្លាក់ចូលទៅក្នុងឧបាយកលណាមួយរបស់សៀមនោះទេ កម្ពុជា នៅតែឈរលើគោលការណ៍សុច្ចរិត អនុវត្តសិទ្ធិអធិបតេយ្យរបស់ខ្លួនដោយមិនជ្រៀតជ្រែកកិច្ចការផ្ទៃក្នុងរបស់ប្រទេសណាមួយឡើយ មិនដូចប្រទេសសៀម ដែលបន្តសកម្មភាពជ្រៀតជ្រែកកិច្ចការផ្ទៃក្នុងកម្ពុជា និងបូរណភាពរបស់អង្គការអន្តររដ្ឋាភិបាលកំរិតពិភពលោក ដែលមានច្បាប់ទំលាក់ និងនីតិវិធីយ៉ាងត្រឹមត្រូវដូចជា ប្រព័ន្ធតុលាការយុត្តិធម៌អន្តរជាតិ អង្គការ UNESCO និងគណៈកម្មាធិការបេតិកភណ្ឌពិភពលោក ហើយសៀមគួរឈប់យកបញ្ហាប្រាសាទព្រះវិហារ និងបញ្ហាព្រំដែនមកប្រើប្រាស់ ដើម្បីការប្រកួតប្រជែងផ្ទៃក្នុងរបស់ខ្លួន ហើយទំលាប់ផលវិបាកមកលើកម្ពុជា ។
ហេតុនេះ យើងខ្ញុំទាំងអស់គ្នាតំណាងយុវជន សិស្ស និស្សិតក្នុងប្រទេសកម្ពុជា ទាំងអស់សូមឱ្យបុគ្គលជាតិសៀម សុនធិ លឹមថងគុន ម្នាក់នេះ ពិនិត្យមើលទង្វើ និងពាក្យសំដីរបស់ខ្លួនរួមទាំងសីលធម៌ជាមនុស្សម្នាក់រស់នៅក្នុងសង្គម ។ ជាមួយនេះដែរ យើងខ្ញុំក៏ស្នើសុំឱ្យរដ្ឋាភិបាលថៃ និងព្រះមហាសក្សត្រថៃ គួរគប្បីមានវិធានការខាងផ្លូវច្បាប់លើបុគ្គល សុនធិ នេះ ។ នៅចុងបញ្ចប់នៃសេចក្តីថ្លែងការណ៍ចែងថា ក្នុងនាមយុវជន យើងទាំងអស់គ្នាមានការគោរពដ៏ខ្ពង់ខ្ពស់ និងមោទនភាពដ៏ធំធេងចំពោះប្រមុខរាជរដ្ឋាភិបាលរបស់យើង ហើយយើងមិនអនុញ្ញាតឱ្យជនណាមួយប្រមាថលើភាពថ្លៃថ្នូររបស់សម្តេចឡើយ ។ ម្យ៉ាងទៀតក្នុងនាមជាប្រទេសជាប់របងជាមួយគ្នា យើងចង់បានទំនាក់ទំនងល្អ និងការសហការគ្នារវាងប្រទេសទាំង២ ៕
