សារព័ត៌មានបរទេសកាលពីថ្ងៃទី១៩ ឧសភា ២០១៤ ផ្សាយថា លោកជេសុន ភួនេល អាយុ២៧ឆ្នាំ ជនជាតិអង់គ្លេសបានចំណាយប្រាក់ជួលជាងសាក់លើខ្នងរបស់ខ្លួនពីប្រវត្តិរបស់ក្រុមសម្ព័ន្ធមិត្តបើកការវាយលុកលើកងទ័ពណាហ្សុីនៅក្នុងសង្គ្រាមលោកលើកទី២ ។ ស្នាមសាក់បង្ហាញរូបយន្តហោះ Spitfire របស់កងទ័ពអង់គ្លេស ព្រមទាំងរូបកងទ័ព និងកងរថក្រោះអង់គ្លេសសម្រុកឡើងគោកនៅតំបន់ឆ្នេរន័រម៉ង់ឌីរបស់បារាំងដើម្បីវាយប្រហារកងទ័ពអីុទ្លែរ ។
លោកជេសុនបានចំណាយប្រាក់ជាង១.៦០០ផោន ដើម្បីសាក់រូបភាពនៃការលើកទ័ពរបស់ក្រុមសម្ព័ន្ធមិត្តទៅតំបន់ឆ្នេរន័រម៉ង់ឌីរបស់បារាំងដើម្បីវាយប្រហារទ័ពណាហ្សុីរបស់អីុទ្លែរនៅថ្ងៃទី៦ មិថុនា ១៩៤៤នៃសង្គ្រាមលោកលើកទី២ ។ ការសាក់រូបនេះខណៈជិតដល់គម្រប់ខួប៧០ឆ្នាំ នៃប្រវត្តិសាស្ត្រនោះនៅដើមខែក្រោយ ។
ជាងប្រើពេលជិត១ឆ្នាំដើម្បីសាក់រូបភាពលម្អិតនោះ ។ លោជេសុន ភួនេល ប្រាប់ថា ក្រុមគ្រួសាររបស់លោកពេញចិត្តស្នាមសាក់នេះយ៉ាងខ្លាំងព្រោះពួកគេចាប់អារម្មណ៍ប្រវត្តិសង្គ្រាមលោកលើកទី២ ។ នៅក្នុងថ្ងៃកងទ័ពសម្ព័ន្ធមិត្តវាយលុកនោះគឺ មានទ័ពអង់គ្លេស កាណាដា ចំនួន៧៥.២១៥នាក់ និងអាមេរិក៥៧.៥០០នាក់ ។ កងទ័ពទាំងអស់បានសម្រុកចូលទៅតំបន់ឆ្នេរន័រម៉ង់ឌី រួមទាំងទ័ពអាកាសជាង២៣.៤០០នាក់វាយលុកលើទ័ពណាហ្សុីរបស់អីុទ្លែរ ។ នោះជាប្រតិបត្តិការសឹកដ៏ធំបំផុតនៅក្នុងប្រវត្តិសាស្ត្រ ៕
ចែករំលែកព័តមាននេះ