ខេត្តស្ទឹងត្រែង​ ៖ កងរាជអាវុធហត្ថ​ខេត្តស្ទឹងត្រែង​ប្រចំាស្នាក់ការ៧៤៨​ ស្ថិតក្នុងភូមិណាអូង​ ឃុំស្រែប្ញស្សី ​ស្រុកសៀមប៉ាង ​បានធ្វើការ​ឃាត់ចាប់ខ្លួន​ជនជាតិឡាវ​ម្នាក់ពីបទជួញដូរ​គ្រឿងញៀន ។

បើតាមអ្នក​ឆ្លើយឆ្លង​ព័ត៌មា​ន​កោះសន្តិភាព​បានឲ្យដឹងជំហាន​ដំបូងទៀតថា​ ការឃាត់ខ្លួន​ជនជាតិឡាវនេះ​ បានធ្វើឡើង​នៅម៉ោង៩និង៤៥នាទី​ព្រឹកថ្ងៃទី២៥​ មេសា​ ២០១៤ ​នៅចំណុច​វាលប៉ារ៉ា​ ស្ថិតក្នុងភូមិ-ឃុំខាងលើ ​ហើយថាក្នុងការ​ឃាត់ខ្លួននេះដែរ ​កងរាជអាវុធហត្ថ​ដកហូតបានម៉ាទឹកកក​ប្រមាណ ១គីឡូក្រាម ។

សេចក្តីរាយការណ៏​បានបញ្ជាក់ទៀតថា ​មកដល់ម៉ោង១១និង៣៧នាទី​ថ្ងៃត្រង់ថ្ងៃសុក្រដដែលនេះ ​សមត្ថកិច្ចកងរាជអាវុធហត្ថ​បានបញ្ជូនជនជាតិ​ឡាវឈ្មោះ​ ស៊ុមវំាង​ ភេទប្រុស ​អាយុ៤២ឆ្នាំ ​រស់នៅភូមិ​ប៉ាក់សង​ ស្រុកសងខន​ ខេត្តសុវណ្ណ ​មកទីបញ្ជាការដ្ឋាន​កងរាជអាវុធខេត្តស្ទឹងត្រែង​ ដើម្បីកសាងសំណុំរឿង​បញ្ជូនទៅសាលាដំបូង​ខេត្តផ្តន្ទាទោស​តាមច្បាប់ ។