កីឡាការិនីលំដាប់ទី៧ ពិភពលោកម៉ារីយ៉ា សារ៉ាប៉ូវ៉ា កំពុងសម្លឹងរកការគ្រងពានជើងឯកកម្មវិធី Porsche Grand Prix ជាថ្មីម្តងទៀតសម្រាប់ឆ្នាំ២០១៤ នេះ ខណៈកាលពីថ្ងៃព្រហស្បតិ៍ ទី២៤ មេសា នាងដណ្តើមបានជោគជ័យនៅក្នុងជុំទី២ ដែលត្រូវបានរៀបចំធ្វើនៅទីក្រុង Stuttgart ប្រទេសអាល្លឺម៉ង់ ។
សារ៉ាប៉ូវ៉ា ដែលជាជើងឯកឆ្នាំ២០១២ និង ២០១៣ បានប្រឹងប្រែងយ៉ាងអស់ពីសមត្ថភាពរហូតប្រើពេលអស់១ម៉ោង៣៤នាទី ទើបអាចបំបាក់កីឡាការិនីមិត្តរួមជាតិ Anastasia Pavlyuchenkova ក្នុងលទ្ធផល៦-៤ និង ៦-៣។ នៅក្នុងការប្រកួតលើកនេះ នាងធ្វើបានល្អជាងកាលពីជុំបើកឆាកជាមួយនាងសាហ្វារ៉ូវ៉ា ដ្បិតនាងពុំបានធ្វើឱ្យមានកំហុស Double-faults ឡើយ ។ តែយ៉ាងណា ការប្រើសឺវីសខ្លាំងៗបានច្រើនលើកនាំឱ្យនាងមានឱកាសឈ្នះគូប្រកួតដោយងាយស្រួល ។ កីឡាការិនីវ័យ២៧ឆ្នាំរូបនេះបានថ្លែងថា ៖ «ខ្ញុំសប្បាយចិត្តខ្លាំងណាស់ដែលអាចយកឈ្នះ២សិត ។ ទោះជាយ៉ាងនេះក្តី ខ្ញុំមិនដែលពេញចិត្តនឹងបច្ចេកទេសប្រកួតខ្លួនឯងនោះឡើយ ។ ខ្ញុំតែងចង់កែលម្អជានិច្ច»។
នៅវគ្គ១/៤ផ្តាច់ព្រ័ត្រ សារ៉ាប៉ូវ៉ា នឹងប៉ះជាមួយកីឡាការិនីប៉ូឡូញ Agnieszka Radwanska ដែលបានយកឈ្នះកីឡាការិនីអុីតាលី Roberta Vinci ក្នុងលទ្ធផល៦-៣ និង៦-២ ។ ចំណែកអតីតកីឡាការនីលំដាប់ទី១ ពិភពលោកសញ្ជាតិស៊ែប៊ី ២រូបគឺ Jelena Jankovicនិងអាណា អុីវ៉ាណូវិច ក៏បានឡើងទៅវគ្គ១/៤ផងដែរ ។ Jankovic យកឈ្នះនាង Flavia Pennetta មកពីប្រទេសអុីតាលីក្នុងលទ្ធផល៣-៦, ៦-២ និង៦-៣ ខណៈនាងអុីវ៉ាណូវិច យកឈ្នះនាង Julia Goerges មកពីអាល្លឺម៉ង់ក្នុងលទ្ធផល១-៦, ៦-២ និង៦-៣ ។
ដោយឡែកក្នុងថ្ងៃជាមួយគ្នានោះដែរ នៅឯទីក្រុងម៉ាឌ្រីដ ប្រទេសអេស្ប៉ាញវិញ រ៉ាហ្វាអែល ណាដាល់ បានឈានចូលដល់វគ្គ១/៤ផ្តាច់ព្រ័ត្រកម្មវិធី Barcelona Open ក្រោយពីបានយកឈ្នះកីឡាករក្រូអាស៊ី Ivan Dodig ក្នុងលទ្ធផល៦-៣ និង៦-៣ ។ សម្រាប់ណាដាល់ បើគិតតែក្នុងកម្មវិធី Barcelona Open នេះ វាជាជ័យជម្នះលើកទី៤២ ហើយនៅក្នុងការចូលរួម៤៣ប្រកួត ។ ការបរាជ័យ១លើកគត់របស់គេកើតមានកាលឆ្នាំ២០០៣ ដែលពេលនោះគេមានវ័យទើប១៥ឆ្នាំប៉ុណ្ណោះ ។
គេបានថ្លែងថា ៖ «ខ្ញុំគិតថា នេះជាការបោះមួយជំហានទៅមុខ ។ ការប្រកួតនៅថ្ងៃនេះជួបឧបសគ្គខ្លះៗដែរ ខណៈជើងរបស់ខ្ញុំតឹងណែនបន្តិច ។ យ៉ាងណាក៏ដោយ ខ្ញុំចាប់លេងបានល្អនៅសិតទី២ ហើយសប្បាយចិត្តចំពោះជ័យជម្នះលើកនេះ» ។ នៅវគ្គបន្ទាប់ រូបគេនឹងជួបជាមួយកីឡាករមិត្តរួមជាតិ Nicolas Almagro ៕
ចែករំលែកព័តមាននេះ