រាជធានីភ្នំពេញ ៖ បញ្ហាប្រាក់ឈ្នួលកម្មករនិយោជិតដែលក្លាយជារឿងចម្រូងចម្រាសអស់រយៈពេលច្រើនខែមកនោះ បានធ្វើឱ្យក្រសួងការងារ និងបណ្តុះបណ្តាលវិជ្ជាជីវៈ និងអង្គការពលកម្មអន្តរជាតិ បានធ្វើសិក្ខាសាលាពិគ្រោះយោបល់ត្រីភាគីពីការពង្រឹងដំណើរការនៃការកែសម្រួលប្រាក់ឈ្នួលអប្បរមានៅកម្ពុជាជាថ្មីដែលមានរយៈពេលពីរថ្ងៃ ចាប់ពីថ្ងៃទី២៤ដល់២៥មេសា នៅសណ្ឋាគារភ្នំពេញ ។
លោក អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍បើកអង្គសិក្ខាសាលានេះថា ការរៀបចំសិក្ខាសាលាពិគ្រោះយោបល់ត្រីភាគីថ្នាក់ជាតិស្តីពីការពង្រឹងដំណើរការនៃការកែសម្រួលប្រាក់ឈ្នួលអប្បបរមានៅកម្ពុជាក្នុងគោលបំនងដើម្បី ៖ ១-កំណត់ប្រព័ន្ធគណនាប្រាក់ឈ្នួលអប្បបរមាដែលអាចទទួលយកបានពីគ្រប់ភាគី ។ ២-ឆ្លុះបញ្ចាំងឱ្យឃើញពីហានិភ័យនៃការកំណត់ប្រាក់ឈ្នួលអប្បបរមាទាបពេកឬខ្ពស់ពេក និង៣-ការកំណត់លក្ខណៈវិនិច្ឆ័យនៃការកំណត់ប្រាក់ឈ្នួលអប្បបរមាដែលអាចប្រើប្រាស់ជាសារវ័ន្ត ។
លោករដ្ឋមន្ត្រីបានឱ្យដឹងទៀតថា ចំពោះការទាមទាររបស់សហជីពដែលប្រកាន់ជំហរថា ទាមទារប្រាក់ឈ្នួល១៦០ដុល្លារអាមេរិកក្នុងមួយខែនោះ ក្រសួងការងារមិនទាន់កំណត់ថា យល់ព្រមយា៉ងណានោះទេ គឺត្រូវពិភាក្សាក្នុងយន្តការជាត្រីភាគី ថាភាគីនីមួយៗអាចមានលទ្ធភាពដោះស្រាយបានចំនួនប៉ុន្មាន ដែលសមរម្យសម្រាប់បងប្អូនកម្មករក្នុងជីវភាពរស់នៅ ។ លោកថា ទាំងរដ្ឋាភិបាល និងសហជីព និងភាគីពាក់ព័ន្ធសុទ្ធតែចង់បានច្រើន ហេតុដូចនេះមានកត្តាជាច្រើនសម្រាប់យកមកពិភាក្សាក្នុងសិក្ខាសាលារយៈពេល២ថ្ងៃនេះ ។ ក្នុងការកំណត់ប្រាក់ឈ្នួលកម្មករនិយោជិតទាបឬខ្ពស់នោះ មានហានិភ័យអ្វីខ្លះ ដូច្នេះយើងត្រូវតែរកចំណុចមួយដែលសមស្រប ។
លោកបន្តទៀតថា ទោះបីជាកន្លងមកមានការកំណត់ប្រាក់ឈ្នួល៤០ដុល្លាររហូត១០០ដុល្លារក្តី ក៏នៅតែមានការតវា៉ពីកម្មករនិយោជិត ប៉ុន្តែការតវា៉នោះស្ថិតក្នុងគំនាបនយោបាយមកលាយឡំ ។ ជារៀងរាល់ឆ្នាំក្រសួងការងារតែងតែដំឡើងប្រាក់ឈ្នួលជូនកម្មករនិយោជិតចាប់ពី១០ភាគរយ ប៉ុន្តែក្នុងឆ្នាំ២០១៣នេះ មានការដំឡើងប្រាក់ឈ្នួលអប្បបរមារហូតដល់២៥ភាគរយ នៅតែមិនទាន់មានសុខដុមនីយកម្ម ។ លោករដ្ឋមន្ត្រីចោទថា បញ្ហានេះបានភ្ជាប់នឹងនយោបាយរបស់គណបក្សប្រឆាំង ។ លោក អិុត សំហេង បានបញ្ជាក់ទៀតថា ការដំឡើងប្រាក់ឈ្នួលដែលតាមការទាមទាររបស់កម្មករនិយោជិតនោះអាចដំឡើងបានឬមិនបាន មិនអាស្រ័យលើលោកទេ គឺអាស្រ័យលើការពិគ្រោះយោបល់ត្រីភាគី ។ ត្រឹមខែធ្នូឆ្នាំ២០១៣ វិស័យឧស្សាហកម្មផ្នែកវាយនភ័ណ្ឌកាត់ដេរ និងផលិតស្បែកជើង បានកើនឡើងដល់ចំនួន៩៦០រោងចក្រ និងមានកម្មករនិយោជិតប្រមាណ៦២០.០០០នាក់ ប្រាក់ឈ្នួលជាមធ្យមក្នុងខែប្រមាណ៧០លានដុល្លារ និងក្នុង១ឆ្នាំ ប្រមាណ៨៧០លានដុល្លារ ។
តម្លៃនៃការនាំចេញសរុបមានការកើនឡើងជារៀងរាល់ឆ្នាំ ចាប់ពីឆ្នាំ២០០៨ មានចំនួនប្រមាណ២.៨០០លានដុល្លារ រហូតដល់ចំនួនប្រមាណ៤.៦០០លានដុល្លារ នៅឆ្នាំ២០១៣ (១១ខែ) ។
រាជរដ្ឋាភិបាលកម្ពុជា បាននិងកំពុងផ្តោតការយកចិត្តទុកដាក់យ៉ាងខ្លាំងលើការអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ សំដៅធ្វើឱ្យប្រសើរឡើងនូវលក្ខខណ្ឌការងារ បង្កើនឱកាសការងារ បង្កើតបរិយាកាសការងារ ពង្រឹងភាពសុខដុមរមនានៃទំនាក់ទំនងវិជ្ជាជីវៈ និងពង្រឹងការបណ្តុះបណ្តាលបច្ចេកទេស និងវិជ្ជាជីវៈឱ្យសមស្របតាមតម្រូវការទីផ្សារការងារ ដើម្បីចូលរួមចំណែកក្នុងការកាត់បន្ថយភាពក្រីក្រ លើកស្ទួយជីវភាពប្រជាពលរដ្ឋ និងអភិវឌ្ឍសេដ្ឋកិច្ចប្រកបដោយចីរភាព ដូចដែលរំលេចឡើងនៅក្នុងយុទ្ធសាស្ត្រចតុកោណដំណាក់កាលទី៣ ដើម្បីកំណើនការងារ សមធម៌ និងប្រសិទ្ធភាពនៅកម្ពុជា របស់រាជរដ្ឋាភិបាលកម្ពុជានៃរដ្ឋសភានីតិកាលទី៥ ។
ផែនការយុទ្ធសាស្ត្រអភិវឌ្ឍវិស័យការងារ និងបណ្តុះបណ្តាលវិជ្ជាជីវៈឆ្នាំ២០១៤-២០១៨ ក្រសួងការងារ បានដាក់ចេញនូវឧបករណ៍គន្លឹះដ៏សំខាន់ ក្នុងការបន្តអភិវឌ្ឍវិស័យការងារ និងបណ្តុះបណ្តាលវិជ្ជាជីវៈ ដោយផ្តោតលើការងារអាទិភាព៥ រួមមាន ៖ ទី១៖ បន្តលើកកម្ពស់លក្ខខណ្ឌការងារឱ្យកាន់តែប្រសើរឡើង ពង្រឹងភាពសុខដុមរមនានៃទំនាក់ទំនងវិជ្ជាជីវៈរវាងកម្មករនិយោជិត និងនិយោជក កាត់បន្ថយវិវាទការងារ កូដកម្ម បាតុកម្ម ពង្រឹងការអនុវត្តច្បាប់ បន្តសិក្សាលទ្ធភាពដំឡើងប្រាក់ឈ្នួលអប្បបរមាជូនកម្មករ-និយោជិត បន្តពង្រឹងប្រព័ន្ធអនាម័យ និងសុវត្ថិភាពការងារនៅកន្លែងធ្វើការ បន្តពង្រឹង និងពង្រីកសេរីភាព និងអង្គការវិជ្ជាជីវៈ និងបន្តការទប់ស្កាត់ការប្រើប្រាស់កម្លាំងពលកម្មកុមារក្នុងវិស័យឧស្សាហកម្ម ។
ទី២៖ការអភិវឌ្ឍការបណ្តុះបណ្តាលបច្ចេកទេស និងវិជ្ជាជីវៈធ្វើការសម្របសម្រួលឱ្យស៊ីសង្វាក់គ្នារវាងវិស័យអប់រំ និងវិស័យបណ្តុះបណ្តាលបច្ចេកទេស និងវិជ្ជាជីវៈ បន្តអភិវឌ្ឍធនធានមនុស្សលើផ្នែកបច្ចេកទេសតាមរយៈការហ្វឹកហ្វឺនកូនជាងធានានិរន្តរភាពនៃការអប់រំបណ្តុះបណ្តាលបច្ចេកទេស និងវិជ្ជាជីវៈ បង្កើនបរិមាណ និងគុណភាពនៃការបណ្តុះបណ្តាលវិជ្ជាជីវៈឆ្លើយតបនឹងតម្រូវការទីផ្សារការងារ និងការធ្វើសមាហរណកម្មអាស៊ានឆ្នាំ២០១៥ ។ ទី៣៖ ការអភិវឌ្ឍសេវាមុខរបរ និងការងារបន្តផ្តល់សេវារកការងារ និងអភិវឌ្ឍប្រព័ន្ធព័ត៌មានទីផ្សារការងារ បន្តបើកទូលាយទីផ្សារការងារសម្រាប់ពលករខ្មែរទៅក្រៅប្រទេស និងបង្កើនកិច្ចសហការល្អជាមួយក្រុមហ៊ុនផ្តល់សេវាការងារក្រៅប្រទេស ពង្រឹងការការពារសិទ្ធិពលករខ្មែរ ដែលធ្វើការនៅបរទេស និងបង្កើនការគ្រប់គ្រងពលករបរទេសនៅកម្ពុជា ។
ទី៤៖ ការអភិវឌ្ឍរបបសន្តិសុខសង្គម ដោយបន្តពង្រឹងនិងពង្រីកការអនុវត្តរបបធានា រ៉ាប់រងហានិភ័យការងារ ជំរុញការរៀបចំដាក់ឱ្យដំណើរការរបបធានារ៉ាប់រងសុខភាព និងរៀបចំដាក់ឱ្យដំណើរការរបបប្រាក់សោធន ។ ទី៥-ពង្រឹងអភិបាលកិច្ចល្អ បង្កើនប្រសិទ្ធភាពនៃសេវាសាធារណៈ ពង្រីកកិច្ចសហប្រតិបត្ដិការជាមួយដៃគូអភិវឌ្ឍន៍ អង្គការមិនមែនរដ្ឋាភិបាល ជាពិសេសផ្នែកឯកជនក្នុងការអភិវឌ្ឍវិស័យការងារនិងបណ្ដុះបណ្ដាលវិជ្ជាជីវៈ ។
ចាប់តាំងពីឆ្នាំ២០០០ រហូតមកដល់បច្ចុប្បន្នក្រសួងការងារនិងបណ្ដុះបណ្ដាលវិជ្ជាជីវៈ និងគណៈកម្មការប្រឹក្សាការងារក្នុងការដំឡើងប្រាក់ឈ្នួលអប្បបរមាជូនកម្មករនិយោជិតផ្នែកវាយនភ័ណ្ឌកាត់ដេរ និងផលិតផលស្បែកជើងបានចំនួន៩លើក ពោលគឺចាប់ពី៤០ដុល្លាររហូតដល់ចំនួន១០០ដុល្លារ ក្នុង១ខែ បន្ថែមលើប្រាក់អត្ថប្រយោជន៍ផ្សេងៗទៀតដែលមានស្រាប់ ហើយទឹកប្រាក់បន្ថែមនេះត្រូវបានផ្ដល់ជូនកម្មករនិយោជិតគ្រប់ៗគ្នាលើប្រាក់ឈ្នួលដែលកំពុងទទួលបាន ។
តាមការសិក្សាស្រាវជ្រាវទៅលើប្រាក់ឈ្នួលអប្បបរមារបស់កម្មករតាមបណ្ដាប្រទេសកំពុងអភិវឌ្ឍន៍នៅអាស៊ី គឺមានភាពខុសគ្នាពីមួយទៅមួយអាស្រ័យលើកម្រិតសេដ្ឋកិច្ចនិងផលទុនជាតិ ក្នុងស្រុកសរុបសម្រាប់មនុស្សម្នាក់ ជាក់ស្ដែងការស្រាវជ្រាវតាមបណ្ដាប្រទេសមួយចំនួនដូចជា ប្រទេសមីយ៉ាន់ម៉ាចំនួន៦០ដុល្លារ ប្រទេសបង់ក្លាដេសចំនួន៦៨ដុល្លារ ប្រទេសឡាវចំនួន៧៨ដុល្លារ ប្រទេសវៀតណាមចំនួន១១១ដុល្លារ ប្រទេសឥណ្ឌូណេស៊ីចំនួន១៨៤ដុល្លារ ប្រទេសចិនចំនួន២៣១ដុល្លារ ប្រទេសថៃចំនួន២៤៤ដុល្លារ ប្រទេសហ្វ៊ីលីពីនចំនួន២៧៤ដុល្លារ និងប្រទេសម៉ាឡេស៊ីចំនួន២៨១ដុល្លារ ។ ការកំណត់ប្រាក់ឈ្នួលអប្បបរមារបស់កម្មករនិយោជិតកម្ពុជាផ្អែកលើថ្លៃដើមផលិតផល ថ្លៃកំណត់ដោយអ្នកបញ្ជាទិញ ព្រមជាមួយនោះក៏ត្រូវថ្លឹងថ្លែងដល់ការប្រកួតប្រជែងជាមួយបណ្ដាប្រទេសជាច្រើនក្នុងតំបន់ដើម្បីធានានិរន្ដរភាពរបស់រោងចក្រ និងការងារធ្វើរបស់កម្មករនិយោជិត និងប្រជាពលរដ្ឋរាប់លាននាក់ដែលកំពុងទទួលផលពីវិស័យនេះ ។
លោក អាត់ ធន់ ប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា និងជាតំណាងសហជីពកម្ពុជាមានប្រសាសន៍ថា តាមស្ថានភាពសង្គមបច្ចុប្បន្ន កម្មករនិយោជិតអាចទទួលបានប្រាក់ខែ១៦០ដុល្លារគឺដូចអ្វីដែលតំណាងសហជីពបានពិភាក្សាគ្នានោះ និងមួយទៀត អ្នកដែលបញ្ជាទិញបានឯកភាពមួយ ចំនួន ។ លោកបញ្ជាក់ថា ប្រសិនបើការដាក់កំណត់ទាមទារ១៦០ដុល្លារមិនបាននោះ យើងអាចពិភាក្សាគ្នានៅថ្ងៃនេះ ថាតើយើងអាចកំណត់យកប៉ុន្មាន និងតំណាងនិយោជកអាចហា៊នប៉ុន្មាន ។ សិក្ខាសាលានេះគឺមានគោលបំណងឱ្យភាគីទាំងបីកំណត់ឱ្យបានច្បាស់លាស់ពីប្រាក់ឈ្នួលអប្បបរមា ហើយចាប់ផ្ដើមអនុវត្ដនៅឆ្នាំក្រោយទៅ និងមួយទៀតគឺការកំណត់ប្រាក់ឈ្នួលដាច់ខាតត្រូវតែឆ្លើយតបនឹងតម្រូវការសង្គម និងសេដ្ឋកិច្ច និងមួយទៀតត្រូវតែមានការចូលតុចរចាគ្នាជាមួយគណៈកម្មការប្រឹក្សាការងារពីបញ្ហាប្រាក់ឈ្នួលកម្មករដោយគ្មានការគំរាមកំហែង បំភិតបំភ័យ… ។
លោក អាត់ ធន់ បន្ថែមថា ដើម្បីចង់មានការចូលរួមជជែកគ្នារវាងត្រីភាគី ដែលងាយទទួលបានលទ្ធផលផ្លែផ្កានោះ មានតែបញ្ឈប់បញ្ហាមួយចំនួនដែលកំពុងកើតមានសេសសល់ក្នុងនោះ ពាក់ព័ន្ធនឹងការបាញ់សម្លាប់កម្មករ ការចាប់ខ្លួនកម្មករ ដោយមិនទាន់បានដោះលែងវិញ និងស្នើដំឡើងប្រាក់ឈ្នួល១៦០ដុល្លារដែលមិនទាន់មានការឆ្លើយតប ។ ក្នុងករណីដែលតួលេខ១៦០ដុល្លារ ដែលយកទៅពិភាក្សាឱ្យបានឆាប់ ឬដោះស្រាយបញ្ហានៅសេសសល់មួយចំនួនឱ្យចប់សព្វគ្រប់់នោះ យើងជាតំណាងសហជីព និងចូលរួមក្នុងតុចរចាពិភាក្សាគ្នាពីបញ្ហាប្រាក់ឈ្នួលរយៈពេលវែង ។ ករណីដែលជជែកដោះស្រាយគ្នាឱ្យបានចប់នោះ ធ្វើឱ្យអ្នកបញ្ជាទិញមានទំនុកចិត្តក្នុងការបញ្ជាទិញផលិតផលពីកម្ពុជាយើង ហើយធ្វើកុំឱ្យដូចសព្វថ្ងៃនេះ ពួកគេមិនទាន់មានជំនឿ និងហ៊ានបញ្ជាទិញទំនិញពីកម្ពុជា ដែលមានទ្រង់ទ្រាយធំដូចមុននោះទេ ។
យ៉ាងណាក្តី លោក អាត់ ធន់ បានបញ្ជាក់បន្ថែមថា ក្នុងការដាក់តម្លៃទាមទារ១៦០ដុល្លារនោះ មិនមែនតួលេខដាច់ខាតទេ ព្រោះថាតាមការស្រាវជ្រាវរបស់ក្រុមប្រឹក្សាការងារថា កម្មករអាចទទួលបានប្រាក់ឈ្នួលប្រមាណ១៥០ ទៅ១៧០ដុល្លារ ក្នុងមួយខែរួចទៅហើយ ។ លោក អាត់ ធន់ បានស្នើឱ្យមានគណៈកម្មការប្រឹក្សាការងារមួយ ដែលអាចផ្តល់ប្រឹក្សាការងារដល់រដ្ឋមន្ត្រី ក្នុងការដំឡើងប្រាក់ឈ្នួលកម្មករនិយោជិតឱ្យបានត្រឹមត្រូវ និងមានសមត្ថភាពពេញលេញពីគ្រប់ភាគីផងដែរ ។ ចំពោះលទ្ធផលនៃសិក្ខាសាលា ដែលនិយាយពីការពង្រឹងប្រាក់ឈ្នួលអប្បបរមាកម្មករនិយោជិតមិនទាន់ដឹងពីលទ្ធផលយ៉ាងណានោះទេ ខណៈសិក្ខាសាលាបន្តធ្វើនៅថ្ងៃនេះទៀត ។
ក្នុងសិក្ខាសាលានេះ គេសង្កេតឃើញមានការចូលរួមពីតំណាងសហជីព ដែលមាននិន្នាការគាំទ្ររដ្ឋាភិបាល និងតំណាងសហជីពមិនគាំទ្ររដ្ឋាភិបាល តំណាងអង្គការពលកម្មអន្តរជាតិ(ILO) និងមន្ត្រីជំនាញជាច្រើនរូប និងតំណាងនិយោជក និងសមាគមជាច្រើនទៀត ៕
ចែករំលែកព័តមាននេះ