រាជធានីភ្នំពេញ ៖ បុរសម្នាក់ត្រូវបាននគរបាលល្បាតខណ្ឌឬស្សីកែវឃាត់ខ្លួន កាលពីវេលាម៉ោង១០និង១០នាទីព្រឹកថ្ងៃទី២៤ ខែមេសា ឆ្នាំ២០១៤តាមបណ្តោយផ្លូវជាតិលេខ៥ ស្ថិតក្នុងភូមិលូ សង្កាត់ស្វាយប៉ាក ខណ្ឌឬស្សីកែវ ខណះពេលជិះម៉ូតូមកពីទិញគ្រឿងញៀនយកទៅឱ្យមិត្តភក្តិ ។
ជនសង្ស័យដែលត្រូវចាប់ខ្លួន ឈ្មោះ ស៊ុំ ហ៊ីង ហៅម៉ៅ ភេទប្រុស អាយុ២៦ឆ្នាំ ជាជាងក្រឡឹង ស្នាក់នៅក្នុងភូមិកន្លែងចាប់ខ្លួនខាងលើ។ ក្រោយពីឃាត់ខ្លួននគរបាលដកហូតថ្នាំញៀនប្រភេទម៉ាទឹកកក មួយកញ្ចប់ ដែលជននោះលាក់ទុក នៅក្នុងកញ្ចប់បារី ។
តាមនគរបាលខណ្ឌឫស្សីកែវបានអោយដឹងថា នៅព្រឹកមុនពេលចាប់ខ្លួនកម្លាំងនគរបាលខណ្ឌបានជិះល្បាតនៅតាមផ្លូវជាតិលេខ៥ក៍បានប្រទះឃើញ ជនសង្ស័យជិះម៉ូតូម៉ាកវីវ៉ាពណ៌ខ្មៅមួយគ្រឿងមានការសង្ស័យក៍បានហៅឈប់ត្រួតពិនិត្យ ក៍បានរកឃើញគ្រឿងញៀនមួយកញ្ចប់ក៍បានឃាត់ខ្លួនតែម្តង។នៅចំពោះមុខជនសង្ស័យបានសារភាពអោយដឹងថា គ្រឿងញៀន១កញ្ចប់នោះត្រូវបានរូបគេទិញក្នុងតម្លៃ៨ម៉ឺនរៀល នៅក្នុងភូមិលូ ហើយក៍បានជិះម៉ូតូយកទៅអោយមិត្តភក្កិឈ្មោះលីមនៅម្តុំគីឡូម៉ែត្រលេខ៧ ពេលជិះម៉ូតូតាមផ្លូវត្រូវកម្លាំងនគរបាលឃាត់ខ្លួន។
ដោយឡែកកាលពីព្រឹកថ្ងៃទី២៣ខែមេសាឆ្នាំ២០១៤ជនសង្ស័យជួញដូរគ្រឿងញៀនម្នាក់ជាជនជាតិវៀតណាមត្រូវបាននគរបាលរដ្ឋបាល ស្វាយប៉ាកឃាត់ខ្លួននៅមូលដ្ឋានសង្កាត់ស្វាយប៉ាក ហើយដកហូតបានគ្រឿងញៀនចំនួន១៣កញ្ចប់។
ជនសង្ស័យដែលត្រូវចាប់ខ្លួនឈ្មោះង្វៀង យ៉ាំងហឿង ភេទប្រុសអាយុ២៨ឆ្នាំ ស្នាក់នៅភូមិលូ សង្កាត់ស្វាយប៉ាក ខណ្ឌឫស្សីកែវ។
តាមនគរបាលបានឱ្យដឹងថា នៅវេលាម៉ោង១០និង៣០នាទីព្រឹកថ្ងៃទី២៣ ខែមេសា កម្លាំងនគរបាលរដ្ឋបាលស្វាយប៉ាកបានជិះល្បាតនៅក្នុងភូមិលូក៍បានប្រទះឃើញជនសង្ស័យកំពុងតែចែកចាយគ្រឿងញៀនហើយក៍ បានឃាត់ខ្លួនដកហូតបានគ្រឿងញៀនចំនួន១៣កញ្ចប់តែម្តង ។
ចែករំលែកព័តមាននេះ