ខេត្តកំពង់ចាម៖ ទុរគតជនមិនស្គាល់អត្តសញ្ញាណ អាយុប្រហែល៤០ ឆ្នាំ ត្រូវបានគេឃើញដេកស្លាប់នៅក្នុងដីចំការរបស់អាជីវករលក់មាសម្នាក់ ទល់មុខហ្គោលក្លឹបស្ថិតនៅភូមិបឹងស្នាយ សង្កាត់សំបួរមាស ក្រុងកំពង់ចាម ។ ហេតុការណ៏ភ្ញាក់ផ្អើលនេះ នៅវេលាម៉ោង៣ និង៣០នាទី រសៀលថ្ងៃទី២៤មេសា ហើយត្រូវបានកម្លាំងសមត្ថកិច្ចចុះទៅពិនិត្យសព មិនឃើញមានស្លាកស្នាមលើរាងកាយនោះទេគឺប្រជាពលរដ្ឋនាំគ្នានិយាយថា ស្លាប់ដោយដាច់បាយតែម្តង ។
សាក្សីបានប្រាប់ឲ្យដឹងថា បុរសមិនស្គាល់អត្តសញ្ញាណរូបនេះ ត្រូវបានប្រជាពលរដ្ឋប្រទះឃើញនៅ៣ទៅ៤ថ្ងៃមកហើយ នៅត្រង់ចំនុចក្បែរកន្លែងស្លាប់ហ្នឹង សូម្បីតែសំលៀកបំពាក់ក៏គ្មានទៀតពេលនោះហេតុតែមានក្តីអាណិតអាសូរ ប្រជាជនឲ្យយកខោអាវទៅស្លៀកពាក់ឲ្យ ។ ក្រោយពីមេឃបានបង្អុរភ្លៀងធ្លាក់មួយមេធំ បុរសនេះមានអាការៈរងាញាក់មើលទៅគួរឲ្យអាណិតណាស់ ។
សាក្សីបានប្រាប់បន្តថា ក្នុងពេលនោះបានឲ្យបបរហូបអស់១ចាន បុរសនោះលើកហូបទាំងញ័រដៃពេលសួរនាំទៅថា មានកូនរស់នៅម្តុំផ្សារដើមគ រាជធានីភ្នំពេញ តែមិនបានប្រាប់ឈ្មោះអ្វីនោះទេ ។ហើយរហូតដល់ម៉ោងប្រហែលជា ២ រសៀលថ្ងៃទី ២៣ មេសា បុរសនោះបានឃើញដេកនៅនឹងចញ្ចើមថ្នល់ជាតិលេខ៧ ដោយឃើញមានស្នាមរបកដៃជើង ទំនងជាត្រូវគេបុកដោយគ្រោះថ្នាក់ចរាចរណ៏ ។ស្រាប់តែនៅវេលាម៉ោង៣និង៣០នាទី រសៀលថ្ងៃទី ២៤ មេសា ក៏ឃើញដេកស្លាប់ពោះបាក់ឲ្យកាក្លបនៅក្នុងដីចំការរបស់គេ ស្ថិតនៅភូមិបឹងស្នាយ សង្កាត់សំបួរមាស បង្កឲ្យមានការភ្ញាក់ផ្អើលដល់កម្លាំងសមត្ថកិច្ចមូលដ្ឋានចុះទៅពិនិត្យសពផងដែរ ។
ចំណែកលោក ស៊ឹង ចាន់អូន នាយប៉ុស្តិ៍រដ្ឋបាលសង្កាត់សំបួរមាស បានប្រាប់ឲ្យដឹងដែរថា ទុរគតជននេះបានស្លាប់មិនមានពាក់ព័ន្ធនិងឃាតកម្មណាមួយនោះទេ ក្នុងនោះម្ចាស់ក្លឹបបានជួយឧបត្ថម្ភក្តាមឈូសដាក់សពសំរាប់យកទៅបូជានៅវត្តដីដុះ ក្រុងកំពង់ចាម ។ លោកយ៉េន ថុល ចៅសង្កាត់សំបួរមាសក៏មានវត្តមានចុះមកដល់កកន្លែងកើតហេតុ បានជួយជ្រោមជ្រែងចាត់ចែង ដោយបានហៅតាអាចារ្យមកសូត្រធម៌តាមប្រពៃណី ដើម្បីបណ្តេញនូវឧបទ្រប់ចង្រៃចេញ មិនឲ្យមានត្រង់ដីចំការនោះផងដែរ។
ចែករំលែកព័តមាននេះ