ខេត្តប៉ៃលិន ៖ ស្ត្រីជាមន្ត្រីសុរិយោដីម្នាក់ត្រូវបានព្រះរាជអាជ្ញាអមសាលាដំបូងខេត្តដឹកនាំកម្លាំងគរបាលព្រហ្មទណ្ឌកម្រិតស្រាលខេត្តចាប់ឃាត់ខ្លួន ដោយសារតែពេលស្ត្រីរូបនេះខឹងលោក ហ៊ុន ចិត្រា ដែលជានាយកក្រឡាបញ្ជីអមសាលាដំបូងខេត្តមិនព្រមបោះត្រាលើពាក្យស្នើសុំអនុវត្តសាលដីកាស្ថាពររបស់តុលាការកំពូលដែលខ្លួនកាន់ឯកសារចូលទៅស្នើសុំជាច្រើនថ្ងៃមិនបាន ក៏ក្រហមមុខចូលទៅជេរប្រមាថនិងអុកឡុកក្នុងសាលាដំបូងខេត្ត ។
លុះពេលត្រឡប់មកផ្ទះវិញ ស្រាប់តែលោក ជុំ សែនសទ្ធា ព្រះរាជអាជ្ញាអមសាលាដំបូងខេត្តបញ្ជាឱ្យកម្លាំងនគរបាលខេត្ត និងកម្លាំងប៉ុស្ដិ៍រដ្ឋបាលសង្កាត់អូរតាវ៉ៅ អមដំណើរដោយក្រឡាបញ្ជីមួយចំនួនទៅដល់ផ្ទះរបស់ស្ត្រីរូបនេះដើម្បីធ្វើការចាប់ឃាត់ខ្លួន ។ ពេលប្រឈមនឹងការចាប់ខ្លួន ស្ត្រីរូបនេះបានរត់ចូលទៅក្នុងបន្ទប់ចាក់សោជាប់សម្ងំស្ងាត់ឈឹង ។ ប៉ុន្តែត្រូវនគរបាលម្នាក់យកដែកស្បែងគាស់គន្លឹះទា្វាររហូតដល់របើក រួចនាំខ្លួនយកទៅស្នងការដ្ឋាននគរបាលខេត្ត ។ ហេតុការណ៍នេះធ្វើឱ្យមានការភ្ញាក់ផ្អើលដល់អ្នកភូមិទាំងកណ្ដាលថ្ងៃត្រង់ព្រោះនឹកស្មានថាសមត្ថកិច្ចដេញចាប់ចោរ ។
ការចាប់ឃាត់ខ្លួនស្ត្រីរូបនេះបានធ្វើឡើងកាលពីវេលាម៉ោង១២ និង៣០នាទីថ្ងៃត្រង់ថ្ងៃទី២៣ មេសា នៅផ្ទះស្ត្រីខាងលើក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ។ ស្ត្រីដែលត្រូវសមត្ថកិច្ចចាប់ឃាត់ខ្លួនឈ្មោះរឿន ចរិយា អាយុ២៩ឆ្នាំ ជាមន្ត្រីនៅមន្ទីររៀបចំដែនដីខេត្ត មានទីលំនៅភូមិប៉ាហីុត្បូង សង្កាត់ប៉ៃលិន ក្រុងប៉ៃលិន ប៉ុន្តែបច្ចុប្បន្នរស់នៅក្នុងភូមិកើតហេតុខាងលើ ។ សូមបញ្ជាក់ថា ខណៈអ្នកកាសែត អ្នកថតទូរទស្សន៍ និងអង្គការសិទ្ធិមនុស្សសរុបមានចំនួន៥ទៅ៦នាក់ថតសកម្មភាពសមត្ថកិច្ចចូលចាប់ឃាត់ខ្លួនស្ត្រីខាងលើ ត្រូវបានក្រឡាបញ្ជីម្នាក់នៃសាលាដំបូងខេត្ត ដេញចាប់យកម៉ាសីុនថតដោយហាមមិនឱ្យថតយកព័ត៌មានទៅផ្សាយឡើយដែលទង្វើនេះហាក់ដូចជាមានរឿងអ្វីលាក់បាំង ។ ចំណែកយុវជនម្នាក់ឈ្មោះរឿន សក្ដា អាយុ១៩ឆ្នាំ ត្រូវជាប្អូនប្រុសរបស់ស្ត្រីខាងលើខណៈដើរចូលទៅក្នុងផ្ទះ ស្រាប់តែលោកមាស សុផុន នាយការិយាល័យនគរបាលព្រហ្មទណ្ឌកម្រិតស្រាលដាល់ត្រូវមុខផ្នែកខាងឆ្វេង១ដៃពេញទំហឹង បណ្ដាលឱ្យជាំនិងក្រៀកកចេញពីក្នុងផ្ទះ ។
លុះនៅរសៀលថ្ងៃដដែល ជនរងគ្រោះបានទៅដាក់ពាក្យបណ្ដឹងនៅអង្គការសិទ្ធិមនុស្ស ។ ប្រភពព័ត៌មានបានឱ្យដឹងថា មុនពេលកើតហេតុស្ត្រីឈ្មោះរឿន ចរិយា អាយុ២៩ឆ្នាំ ជាមន្ត្រីនៅមន្ទីររៀបចំដែនដីខេត្តបានយកឯកសារសុំអនុវត្តដោយបង្ខំលើសាលដីកាដែលបានប្ដឹងកូនបំណុលឈ្មោះលឿង វ៉ាន់ និងប្ដីឈ្មោះឡេង សីុថា អាយុ៥០ឆ្នាំ រស់នៅភូមិអូរតាប្រាង សង្កាត់បៃ៉លិន ក្រុងប៉ៃលិន ចុះថ្ងៃទី១១ មីនា ឆ្នាំ២០១៤ របស់តុលាការកំពូលទៅដាក់ឱ្យលោកហ៊ុន ចិត្រា នាយកក្រឡាបញ្ជីអមសាលាដំបូងខេត្តបោះត្រា កាលពីថ្ងៃទី១០ មេសា ។ លុះពេលទៅដល់ គេឱ្យបង់ប្រាក់៣០ដុល្លាររួចហើយ តែមិនព្រមបោះត្រាឱ្យនោះទេ ដោយប្រាប់ថា រង់ចាំដល់ព្រឹកស្អែក ហើយស្ត្រីខាងលើក៏ត្រឡប់ទៅផ្ទះវិញ ។ លុះព្រឹកស្អែកនិងថ្ងៃ បន្តបន្ទាប់ជាប់ៗគ្នាមកទៀត ក៏បានយកឯកសារទៅដាក់ជូននាយកក្រឡាបញ្ជី ស្រាប់តែត្រូវប្រាប់ថា មិនបោះត្រាឱ្យទេ បើចង់ទៅប្ដឹងឯណាក៏ទៅប្ដឹងចុះ ។
ពេលនោះស្ត្រីខាងលើខឹងយ៉ាងខ្លាំងទើបទប់កំហឹងមិនបានក៏ប្រើពាក្យសម្ដីជេរប្រមាថនាយកក្រឡាបញ្ជីនិងនិយាយដៀមដាមដល់មន្ត្រីមួយចំនួនទៀតនៅក្នុងសាលាដំបូងខេត្ត ទើបឈានដល់លោកព្រះរាជអាជ្ញាខឹងក៏បញ្ជាឱ្យសមត្ថកិច្ចតាមចាប់ឃាត់ខ្លួនដល់លំនៅឋាន ហើយបានឃុំខ្លួនមួយយប់នៅស្នងការដ្ឋាននគរបាលខេត្ត ។ លុះព្រឹកឡើងថ្ងៃទី២៤ មេសា ទើបបញ្ជូនបន្តទៅសាលាដំបូង ។ បើតាមស្ត្រីខាងលើបានឱ្យដឹងថា កាលពីវេលាម៉ោង៨និង៣០នាទីព្រឹកថ្ងៃទី២៣ មេសា គាត់បានយកឯកសារទៅសាលាដំបូងខេត្តដើម្បីសួរនាំប្រធានក្រឡាបញ្ជីពីរឿងហេតុអ្វីបានជាមិនបោះត្រាឱ្យគាត់ ពីរឿងពាក្យសុំអនុវត្តសាលដីកាស្ថាពររបស់តុលាការកំពូល ព្រោះបានដាក់ទៅខាងក្រឡាបញ្ជីនេះចាប់តាំងពីថ្ងៃទី១០ មេសា មកម្លេ៉ះ តែគេមិនព្រមបោះត្រាឱ្យសោះដោយឆ្លើយថាជាប់រវល់នេះរវល់នោះឥតឈប់ ។
ប្រភពបានបន្តទៀតថា ដោយគាត់ខឹងខ្លាំងពេកទ្រាំនឹងទង្វើឆ្មើងកន្ត្រើងមិនបានក៏ជេររួចក៏ចេញទៅផ្ទះ។ លុះបានមួយសន្ទុះស្រាប់តែឃើញព្រះរាជអាជ្ញាដឹកនាំកម្លាំងសមត្ថកិច្ចមកផ្ទះគាត់តែម្ដង ព្រោះថ្លើមធំពេកហ៊ានប្រមាថអ្នកច្បាប់ ។ ទាក់ទិននឹងបញ្ហារហូតឈានដល់ការចាប់ឃាត់ខ្លួនស្ត្រីមន្ត្រីមន្ទីររៀបចំដែនដីរូបនេះលោក ជុំ សែនសទ្ធា ព្រះរាជអាជ្ញាអមសាលាដំបូងខេត្តបានឱ្យកោះសន្ដិភាពដឹងតាមទូរស័ព្ទកាលពីវេលាម៉ោង៥និង៣នាទីល្ងាចថ្ងៃទី២៣ មេសា ថា ស្ត្រីខាងលើបានមកជេរប្រមាថកាតទាននៅក្នុងបរិវេណសាលាដំបូងដល់មន្ត្រីនៅតុលាការចំនួនពីរថ្ងៃជាប់ៗគ្នា ហើយបាននិយាយប្រាប់គេឯងតាមតុកាហ្វេ គុយទាវ ស្ទើរតែគ្រប់ទីកន្លែងដែលជាហេតុធ្វើឱ្យប៉ះពាល់ដល់ស្ថាប័នរបស់តុលាការដូច្នេះខាងលោកមិនអនុញ្ញាតឱ្យស្ត្រីរូបនេះបន្តធ្វើបែបនេះតទៅទៀតបានទេ ទើបបញ្ជាឱ្យសមត្ថកិច្ចធ្វើការចាប់ខ្លួនតែម្ដង ។ ប្រភពបន្តទៀតថា ពេលនោះអ្នកសារព័ត៌មានសួរនាំមូលហេតុអ្វីបានជាគាត់ចូលទៅជេរដល់ក្នុងសាលាដំបូងខេត្ត ហើយលោកប្រាប់ថា មានរឿងសីុជម្រៅច្រើនជាងនេះ បើចង់ដឹងសូមទាក់ទងសួរទៅលោកក្រឡាបញ្ជី ។
ចំណែកលោក ហ៊ុន ចិត្រា នាយកក្រឡាបញ្ជីអមសាលាដំបូងខេត្តមិនអាចធ្វើការបំភ្លឺបានទេ ខណៈអ្នកសារព័ត៌មានទូរស័ព្ទចូលកាលពីវេលាម៉ោង៥និង២០នាទីល្ងាចថ្ងៃដដែល បែរជាមានអ្នកផ្សេងលើកជំនួសវិញហើយប្រាប់ថា លោកមិននៅទេចេញទៅក្រៅបាត់ហើយ ។ លុះក្រោយមកអ្នកសារព័ត៌មានទាក់ទងទៅលេខទូរស័ព្ទរបស់លោកមួយខ្សែទៀត ពេលនោះចូលដែរ តែអត់មានអ្នកទទួល ៕
ចែករំលែកព័តមាននេះ