ក្រសួងមហាផ្ទៃអេហ្ស៊ីបរាយការណ៍ថា ប៉ូលិសម្នាក់ និងសកម្មជនអ៊ិស្លាមម្នាក់ បានត្រូវស្លាប់កាលពីថ្ងៃទី២៣ មេសា ពេលមានប្រតិបត្តិការមួយរបស់កងកម្លាំងសន្តិសុខនៅជិតទីក្រុងអាឡិចសាន់ឌ្រី ហើយឧត្តមសេនីយ៍ប៉ូលិសម្នាក់ ស្លាប់ដោយសារការផ្ទុះគ្រាប់បែក១គ្រាប់ ដាក់ក្រោមរថយន្តរបស់គេ នៅតំបន់ជាយក្រុងគែរមួយ ។
ពួកសកម្មប្រយុទ្ធនៃក្រុម Ansar Bital Makdis បានបាញ់ប្រហារមកលើកងកម្លាំងសន្តិសុខ ដែលធ្វើអន្តរាគមន៍ប្រឆាំងទីតាំងរបស់ពួកគេនៅ Borg El Arab ចម្ងាយប្រមាណជា៤៥គីឡូម៉ែត្រ ភាគនិរតីក្រុងអេឡិចសាន់ឌ្រី ។ អនុសេនីយ៍ទោប៉ូលិស លោក អាម៉េដ សាអាដ និងជនសកម្មប្រយុទ្ធឈ្មោះ ហាសាន់ អាប់ដែល អាអាល់ បានត្រូវស្លាប់ក្នុងការប៉ះទង្គិចគ្នា ។ ចំណែកជនសកម្មប្រយុទ្ធ២នាក់ទៀតត្រូវចាប់ ខ្លួន ។ ក្រសួងមហាផ្ទៃអេហ្ស៊ីបគូសបញ្ជាក់ទៀតថា ប៉ូលិសរឹបអូសបានអាវុធនានាព្រមទាំងគ្រឿងផ្ទុះ ដោយក្នុងនោះមានកាំភ្លើងស្វ័យប្រវត្តិ គ្រាប់បែកដៃ ព្រមទាំងគ្រាប់រំសេវ ។
ចំណែកឧត្តមសេនីយ៍ប៉ូលិសម្នាក់ លោក អាម៉េដ ហ្សានី បានត្រូវស្លាប់ក្នុងការផ្ទុះគ្រាប់បែក១គ្រាប់ ដាក់ក្រោមរថយន្តរបស់លោក នៅមុខផ្ទះរបស់លោក ស្ថិតនៅទីក្រុង ៦ តុលា ចម្ងាយ៣២គីឡូម៉ែត្រ ពីទីក្រុងគែរ ។ នេះជាសេចក្តីរាយការណ៍របស់ទូរទស្សន៍រដ្ឋអេហ្ស៊ីប Nile News ។ ប៉ូលិស២នាក់ទៀត ត្រូវរបួសក្នុងការផ្ទុះនេះ ។
ការវាយប្រហារនោះប្រកាសទទួលខុសត្រូវតាម Facebook ដោយក្រុម Adjnad Misr ដែលចាត់ទុកឧត្តមសេនីយ៍រូបនោះថាជាឧក្រិដ្ឋជនសម្លាប់បាតុករជាច្រើននាក់ ។ការវាយប្រហារភេរវកម្មពីសំណាក់ពួកសកម្មប្រយុទ្ធអ៊ិស្លាម បណ្តាលឱ្យមនុស្សស្លាប់ប្រមាណជា៥០០នាក់ ភាគច្រើនគឺប៉ូលិសនិងទាហាន ចាប់តាំងពីការផ្តួលរំលំប្រធានាធិបតីអ៊ិស្លាមនិយមលោក ម៉ូហាម៉េដ ម័រស៊ី ដោយកងយោធាកាលពីខែកក្កដា ឆ្នាំ២០១៣មក ៕
ចែករំលែកព័តមាននេះ