ការិយាល័យសន្ដិសុខនៃការដឹកជញ្ជូនតាមសមុទ្ររបស់អូស្រ្ដាលីពុំចាត់ទុករបស់របរទាំងឡាយដែលរកឃើញនៅមាត់ច្រាំងសមុទ្រនាភាគនិរតីអូស្រ្ដាលីខាងលិចថាមានទំនាក់ទំនងជាមួយយន្ដហោះបាត់ដានម៉ាឡេស៊ីជើងហោះហើរ MH370 ឡើយ ។ យោងតាមវិទ្យុ ABC ថា អ្នកនាំពាក្យរបស់ការិយាល័យនេះបានបដិសេធរាល់លទ្ធភាពនៃការទាក់ទិនរវាងរបស់របរទាំងនោះ និងយន្ដហោះបាត់ដាន រួចអ្នកនាំពាក្យរូបនេះគូសបញ្ជាក់កាលពីព្រឹកថ្ងៃទី២៤ មេសា ថា យើងបានពិនិត្យដោយម៉ត់ចត់នូវរូបភាពទាំងឡាយដែលប៉ូលិសបានថត ហើយយើងជឿជាក់ថាវាពុំមែនជារបស់របរទាក់ទិននឹងយន្ដហោះបាត់ដានទេ ។
ប៉ូលិសអូស្រ្ដាលីខាងលិចបានទទួលព័ត៌មាននានាដែលថារបស់របរទាំងឡាយត្រូវបានគេប្រទះឃើញមកទើរនៅកន្លែងមួយចម្ងាយ១០គីឡូម៉ែត្រខាងកើតទីក្រុង AUGUSTA ជាទីក្រុងមួយនៅភាគខាងត្បូងទីក្រុង PERT ។ ការិយាល័យសន្ដិសុខដឹកជញ្ជូនសមុទ្រអូស្រ្ដាលី BAST បានធ្វើការវិភាគរូបថតទាំងឡាយនៃរបស់របរទាំងនោះ កាលពីយប់ថ្ងៃទី២៣មក២៤មេសា ។
ចំណែករដ្ឋមន្ដ្រីដឹកជញ្ជូនម៉ាឡេស៊ីលោក ហ៊ីសាមបូឌីន ហ៊ូសេន ថ្លែងកាលពីថ្ងៃទី២៣ មេសា នៅទីក្រុងគូឡាឡាំពួរថា រដ្ឋាភិបាលម៉ាឡេស៊ីប្រកាសពីការបង្កើតក្រុមស៊ើបអង្កេតអន្ដរជាតិមួយដែលនឹងទទួលបន្ទុកតាមដានស្រាវជ្រាវការបាត់ដានយន្ដហោះជើងហោះហើរ MH370 នោះ ។ រដ្ឋមន្ដ្រីរូបនោះនិយាយថា គោលបំណងសំខាន់របស់ក្រុមស៊ើបអង្កេតអន្ដរជាតិនោះគឺធ្វើការវាយតម្លៃនានា រួចស៊ើបអង្កេត ហើយនឹងកំណត់មូលហេតុពិតប្រាកដនៃគ្រោះថ្នាក់នេះដើម្បីចៀសវាងកុំឱ្យមានគ្រោះថ្នាក់បែបនោះទៀតនាពេលអនាគត ៕
ចែករំលែកព័តមាននេះ