ខេត្តប៉ៃលិន ៖ បុរសម្នាក់ដែលត្រូវគេស្គាល់ថា ជាមន្ត្រីនគរបាលការពារព្រំដែនគោកវរៈ៨២១ បានរងការចោទប្រកាន់ពីបទប្រើហិង្សាដោយចេតនាលើស្ត្រីម្នាក់បណ្តាលឱ្យរបួសក្បែរភ្នែកខាងឆ្វេង និងជាំក្បាលផ្នែកខាងក្រោយ ហើយត្រូវបានស្ត្រីរងគ្រោះដាក់ពាក្យប្តឹងទៅអង្គការសិទ្ធិមនុស្សឱ្យជួយអន្តរាគមន៍កាលពីវេលាម៉ោង៤ និង៤០នាទីរសៀល ថ្ងៃទី២៣ មេសា ២០១៤ នៅការិយាល័យអង្គការសិទ្ធិមនុស្សក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន។
ស្ត្រីរងគ្រោះឈ្មោះហ៊ាន សុខុម អាយុ៤៩ឆ្នាំ ជាកសិករ មានស្រុកកំណើតនៅភូមិសង្គមមានជ័យ ឃុំទួលស្នួល ស្រុកក្រូចឆ្មា ខេត្តកំពង់ចាម មានប្តីឈ្មោះមួន ទឹម អាយុ៥០ឆ្នាំ ជាមន្ត្រីនគរបាលការពារព្រំដែនជើងគោកវរៈ៨២១ បច្ចុប្បន្នរស់នៅភូមិបរតាំងស៊ូ សង្កាត់បរយ៉ាខា ក្រុងប៉ៃលិន។ ចំណែកមន្ត្រីនគរបាលដែលរងការចោទប្រកាន់ឈ្មោះជា សុន ភេទប្រុស អាយុប្រហែល៣៨ឆ្នាំ រស់នៅផ្ទះក្បែរស្ត្រីរងគ្រោះក្នុងភូមិខាងលើ ។
ប្រភពព័ត៌មានបានឱ្យដឹងថា មន្ត្រីនគរបាលរូបនេះបានប្រើហិង្សាដោយចេតនាលើស្ត្រីរងគ្រោះកាលពីវេលាម៉ោង៥ និង៣០នាទីល្ងាច ថ្ងៃទី១០ មេសា ២០១៤ នៅលើផ្លូវលំក្នុងចំការ ស្ថិតនៅចំណុចបរថ្មី ភូមិបរតាំងស៊ូ សង្កាត់បរយ៉ាខា ក្រុងប៉ៃលិន ដោយយកដៃវាយទៅលើស្ត្រីរងគ្រោះចំនួន៤ដៃខ្លាំងៗ ត្រូវចំផ្នែកខាងមុខ១ដៃបណ្តាលឱ្យហូរឈាមតាមគ្រាប់ភ្នែកខាងឆ្វេង និងវាយបីដៃទៀតចំក្បាលផ្នែកខាងក្រោយបណ្តាលឱ្យស្ទើរដួលសន្លប់នៅនឹងកន្លែង ដោយសារតែជនបង្កយកត្រាក់ទ័រ២គ្រឿងទៅភ្ជួរលើដីផ្លូវក្នុងចំការរបស់ស្ត្រីរងគ្រោះ លុះពេលគាត់ចេញទៅហាមឃាត់ក៏ត្រូវមន្ត្រីនគរបាលរូបនេះវាយឱ្យរបួសតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ