អ្នកណាក៏ដឹងដែរថា «សាច់លោកគ្រូថាងចេង» មានតម្លៃបំផុតនៅក្នុងរឿងបុរាណ «ថាងចេងទៅចម្លងធម៌» ។ បិសាចប្រភេទណា ក៏ស្រក់ ទឹកមាត់ចង់ស៊ីសាច់ថាងចេងដែរ ព្រោះមិនត្រឹមតែឆ្ងាញ់ និងធ្វើឱ្យមានជីវិតអមតៈប៉ុណ្ណោះទេ ថែមទាំងប៉ូវវិសេសវិសាលទៀត ។ ប៉ុន្តែពេលនេះ សិស្សលោកគ្រូថាងចេង គឺ ស៊ុនអ៊ូខុង និងប៉ាចេ នាំគ្នាអាំងសាច់លោកគ្រូរបស់ខ្លួន លក់ពាសពេញខេត្ត-ក្រុង
អ្នកណាក៏ដឹងដែរថា «សាច់លោកគ្រូថាងចេង» មានតម្លៃបំផុតនៅក្នុងរឿងបុរាណ «ថាងចេងទៅចម្លងធម៌» ។ បិសាចប្រភេទណា ក៏ស្រក់ ទឹកមាត់ចង់ស៊ីសាច់ថាងចេងដែរ ព្រោះមិនត្រឹមតែឆ្ងាញ់ និងធ្វើឱ្យមានជីវិតអមតៈប៉ុណ្ណោះទេ ថែមទាំងប៉ូវវិសេសវិសាលទៀត ។ ប៉ុន្តែពេលនេះ សិស្សលោកគ្រូថាងចេង គឺ ស៊ុនអ៊ូខុង និងប៉ាចេ នាំគ្នាអាំងសាច់លោកគ្រូរបស់ខ្លួន លក់ពាសពេញខេត្ត-ក្រុង សឹងទូទាំងប្រទេសចិន។ ពួកគេលក់សាច់លោកគ្រូថាងចេង តាមតូប តូចៗកៀកចិញ្ចើមថ្នល់ក៏មាន លក់តាមរទេះចល័តក៏មាន ខ្លះទៀតរែកលក់គ្រប់ច្រកល្ហក ។
នៅគ្រប់ទីកន្លែង ពួកអ្នកលក់សាច់អាំងច្រនួចទាំងនោះ ខ្លះតែងខ្លួនជាស៊ុនអ៊ូខុង ខ្លះតែងខ្លួនជាប៉ាចេ មាត់ស្រែក កោកៗ «សាច់អាំងលោកគ្រូថាងចេងឈ្ងុយឆ្ងាញ់ និងប៉ូវខ្លាំងណាស់ សូមអញ្ជើញទិញពិសា… ឆ្ងាញ់ណាស់ ! ប៉ូវណាស់ !…» ។
ព័ត៌មានពីបណ្តាញសង្គមចិន ឱ្យដឹងថា ចលនា «លក់សាច់អាំងលោកគ្រូថាងចេង» នេះ ផ្ទុះឡើងដំបូងនៅក្រុងខេលីម ខេត្តក្វាងស៊ី នាចុងឆ្នាំ២០១៣ ។ ដំបូងឡើយមានតែអ្នកលក់សាច់អាំងច្រនួចពីរបីនាក់ប៉ុណ្ណោះដែលនឹកឃើញរបៀបនេះ ។ មិននឹកស្មានសោះថាវារាលដាលរហ័សដូចទឹកបាក់ទំនប់ តែប៉ុន្មានខែសោះវាមានវត្តមានសឹងគ្រប់ខេត្ត-ក្រុងទូទាំងប្រទេសចិន ។
«សាច់អាំងលោកគ្រូថាងចេង» ថ្លៃ១០យ័នសម្រាប់៦ឬ៨ច្រនួច ។ នៅកន្លែងខ្លះ ដូចជាក្រុងក្នុងខេត្តហាយណានជាដើម ស៊ុន អ៊ូខុង និងប៉ាចេ ថែមទាំងចាក់ភ្លេង ឮៗ ហើយឈរញាក់បណ្តើរ អាំងសាច់បណ្តើរ ។ មនុស្សភាគច្រើនចាត់ទុកថា ការធ្វើរបៀបនេះគ្រាន់តែជាវិធីទាក់ទាញភ្ញៀវប៉ុណ្ណោះ សាច់ដោតច្រនួចអាំងធម្មតា បែរជាតុបតែងខ្លួនជាស៊ុនអ៊ូខុង និងប៉ាចេ ហើយស្រែកពពាយនាយថាសាច់អាំងលោកគ្រូថាងចេងទៅវិញ ។ ប៉ុន្តែទោះបីរិះគន់ថាគ្រាន់តែជាវិធីសាស្ត្រទាក់ទាញក្តី ក៏គ្មានអ្នកណាបដិសេធពីប្រសិទ្ធភាពរបស់វិធីនេះដែរ ។ វាមិនត្រឹមតែបង្កើតការចាប់អារម្មណ៍ប៉ុណ្ណោះទេ មនុស្សមួយចំនួនធំថែមទាំងទប់ចិត្តមិនហូបសាច់អាំងលោកគ្រូថាងចេងមិនបានទៀតផង ពិសេសពួក ក្មេងៗ ៕
ចែករំលែកព័តមាននេះ