រាជធានីភ្នំពេញ ៖ យុវជនម្នាក់ត្រូវគេប្រទះឃើញស្លាប់ក្នុងទឹកត្រពាំងជម្រៅត្រឹមជង្គង់ បង្កឱ្យមានការភ្ញាក់ផ្អើល កាលពីវេលាម៉ោង៦ព្រឹកថ្ងៃទី២៤ មេសា នៅចំណុចជិតភូមិមុខ៤ សង្កាត់ពន្សាំង ខណ្ឌពោធិ៍សែនជ័យ បន្ទាប់ពីជននេះបាត់ខ្លួនពីផ្ទះមួយយប់ លុះព្រឹកឡើងត្រូវគេប្រទះឃើញសព ។
យុវជនរងគ្រោះត្រូវគេស្គាល់ឈ្មោះ វ៉ាត ណាវី អាយុ២៤ឆ្នាំ មុខរបររៀនជាងចម្លាក់នៅក្នុងភូមិកើតហេតុ ។ បើតាមម្តាយជនរងគ្រោះឈ្មោះ ភឿន កត់ អាយុ៤៥ឆ្នាំ បានឱ្យដឹងថា កូនប្រុសរបស់គាត់ដែលស្លាប់នេះទំនងជាមានវិបត្តិផ្លូវចិត្ត ព្រោះកន្លងមកជនរងគ្រោះបានឱ្យគាត់ចូលស្តីដណ្តឹងកូនក្រមុំគេនៅខេត្តតាកែវ ដោយគេបង្គាប់ថ្លៃទឹកដោះ១៣០០ដុល្លារ ប៉ុន្តែកូនប្រុសគាត់មានតែ១០០០ដុល្លារ ទើបគេផ្តាច់ពាក្យវិញ ។ ប្រភពបន្តថា តាំងពីថ្ងៃនោះមកជនរងគ្រោះតែងដើរប្រាប់គេឯងថា ពិបាកចិត្ត មិនចង់រស់នៅទេ រហូតដល់ថ្ងៃកើតហេតុបាត់ខ្លួនពីផ្ទះមួយយប់ ហើយត្រូវគេប្រទះឃើញសពតែម្តង ។
មកដល់ពេលនេះ សមត្ថកិច្ចកំពុងចុះត្រួតពិនិត្យ ដោយមិនទាន់ដឹងថា ជាករណីសម្លាប់ខ្លួន ឫយ៉ាងណានោះនៅឡើយ ។
ចែករំលែកព័តមាននេះ