ខេត្តសៀមរាប ៖ ប្រជាពលរដ្ឋប្រមាណ១៣០នាក់ មកពីភូមិត្រពាំងក្រសាំង ឃុំស្រែណូយ ស្រុកវ៉ារិន ដែលកើតមានជម្លោះដីធ្លីដ៏រុាំរ៉ៃ ជាមួយអង្គភាពយោធាកងពលតូចអន្តរាគមន៍លេខ៥ កាលពីព្រឹកថ្ងៃទី២៣ មេសា បាននាំគ្នាជិះគោយន្តកន្ត្រៃចំនួន១០គ្រឿង បើកសំដៅមកកាន់សាលាខេត្តសៀមរាប ដើម្បីបង្ខំឱ្យអាជ្ញាធរខេត្តពន្លឿនការដោះស្រាយប្រគល់កម្មសិទ្ធិដីធ្លីជូនពួកគាត់នៅគ្រារដូវបង្កបង្កើនផលកាន់តែខិតជិតមកដល់នោះ ។
ទោះជាយ៉ាងនេះក្តី ការលើកគ្នាមកកាន់សាលាខេត្តនេះ មិនបានដល់គោលដៅដូចបំណងទេ ដោយសារអាជ្ញាធរបានប្រឹងប្រែងរាំងខ្ទប់ដំណើររបស់ពួកគាត់ជាច្រើនកន្លែង មុននឹងបញ្ជូនលោកអភិបាលរងខេត្តមួួយរូបមកជួបចរចាគ្នានៅពាក់កណ្តាលផ្លូវ (រង្វង់មូលស្រុកបន្ទាយស្រី) ជាមួយនឹងការសន្យាថានឹងចុះអន្តរាគមន៍ពិនិត្យដល់ទីតាំងទំនាស់នៅព្រឹកស្អែក (២៤ មេសា) ។ អភិបាលរងខេត្ត និងជាអ្នកនាំពាក្យសាលាខេត្តសៀមរាប លោកប៊ុន ថាឫទ្ធិ ដែលបានចុះទៅអន្តរាគមន៍សម្របសម្រួលជាមួយក្រុមអ្នកតវ៉ាបានថ្លែងនៅរសៀលថ្ងៃទី២៣ មេសា នោះថា ក្បួនតវ៉ារបស់អ្នកភូមិត្រូវបានបញ្ឈប់នៅពាក់កណ្តាលផ្លូវកាលពីវេលាម៉ោងប្រមាណ២រសៀលថ្ងៃនោះ បន្ទាប់ពីតំណាងអង្គភាពកងពលតូចលេខ៥ ដែលមានទំនាស់ជាមួយពួកគាត់ បានយល់ព្រមចុះហត្ថលេខាប្រគល់ដីជូនពួកគាត់ទៅតាមការស្នើសុំរបស់អាជ្ញាធរខេត្ត ។
លោកបញ្ជាក់ថា ដើម្បីបញ្ឈប់ដំណើរឆ្ពោះមកកាន់សាលាខេត្តនោះដែរ លោកក៏សន្យាជាមួយពួកគាត់ (អ្នកភូមិ) ថា ថ្ងៃស្អែក (២៤ មេសា) ក្រុមការងារវាស់វែងដីធ្លីនឹងធ្វើដំណើរទៅកាន់កន្លែងទំនាស់ដើម្បីសិក្សា និងពង្រីកផែនទីដីទៅតាមការកាន់កាប់ជាក់ស្តែងរបស់ប្រជាពលរដ្ឋឱ្យមានលទ្ធភាពផ្តល់កម្មសិទ្ធិជូនឱ្យបានឆាប់ ។ តំណាងអ្នកភូមិមួយរូប គឺលោកភុង សុរីយា អាយុ៤៣ឆ្នាំ អះអាងតាមទូរស័ព្ទថា ការសម្រេចចិត្តលើកគ្នាមកធ្វើការតវ៉ានៅមុខសាលាខេត្តនេះ ដោយសារតែមិនអាចរង់ចាំដំណោះស្រាយបាន ខណៈរដូវបង្កបង្កើនផលកាន់តែខិតជិតមកដល់ ជាមួយនឹងការញាំញីកាន់តែខ្លាំងពីសំណាក់កម្លាំងយោធាកងពលលេខ៥ ទៅលើផ្ទះ និងផលដំណាំរបស់ប្រជាពលរដ្ឋ ។ តំណាងអ្នកភូមិរូបនោះបានបញ្ជាក់ថា ប្រជាពលរដ្ឋដែលលើកគ្នាមកតវ៉ានេះមានចំនួនប្រមាណ១៣០នាក់ សុទ្ធសឹងតែជាអ្នករងគ្រោះដោយសារការរំលោភបំពានដីធ្លីពីសំណាក់កម្លាំងយោធាកងពលលេខ៥ ចាប់តាំងពីឆ្នាំ២០១២ រហូតមក ។
លោកបានបន្ថែមថា ដីទំនាស់នោះមានចំនួនពីរកន្លែងផ្សេងគ្នា គឺមួយនៅម្តុំវាលសង្កែធំ ទំហំ៣២១ហិកតា ដោយមានប្រជាពលរដ្ឋចំនួន៩៥គ្រួសារ និងមួយកន្លែងទៀតនៅអូរដៃអាវ ទំហំ៣៥០ហិកតា មានប្រជាពលរដ្ឋចំនួន១៣០គ្រួសារ ។ ទីតាំងទំនាស់ទាំងពីរកន្លែងនោះស្ថិតនៅក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន ។ ទីតាំងទំនាស់នោះ ត្រូវបានពួកគាត់ចូលកាន់កាប់អាស្រ័យផលតាំងពីអំឡុងឆ្នាំ២០០៥ មកម៉្លេះ ដោយពុំមានអ្នកណាមកហាមឃាត់ទេ ទើបតែនៅឆ្នាំ២០១២ ស្រាប់តែមានកម្លាំងយោធាអង្គភាពកងពលតូចចំណុះកងពលធំអន្តរាគមន៍លេខ២ មករារាំងថា ដីនោះជាដីអភិវឌ្ឍន៍របស់កងទ័ពទៅវិញ ហើយចាប់តាំងពីពេលនោះមក ក៏មានការតវ៉ាជាច្រើនលើកច្រើនសា ។
តំណាងអ្នកភូមិបានបន្តថា ចាប់តាំងពីកើតមានទំនាស់ជាមួយអង្គភាពយោធាមក ប្រជាពលរដ្ឋបានធ្វើការតវា៉ជាច្រើនលើកច្រើនសាមកហើយ ដោយបានដាក់ពាក្យបណ្តឹងតាមលំដាប់លំដោយចាប់ពីថ្នាក់ខេត្តរហូតថ្នាក់ខុទ្ទកាល័យនាយករដ្ឋមន្ត្រី ប៉ុន្តែនៅតែគ្មានដំណោះស្រាយ។ លោក នូ ពុទ្ធិ ប្រធានអង្គការលីកាដូ ប្រចាំខេត្តសៀមរាប ដែលបានចុះទៅតាមដានសកម្មភាពតវា៉នោះថ្លែងថា នៅក្នុងសកម្មភាពលើកគ្នាមកតវា៉នោះឃើញថា ពុំមានអំពើហិង្សាណាមួយកើតឡើងរវាងមន្ត្រីកងកម្លាំងអាជ្ញាធរខេត្ត ជាមួយក្រុមអ្នកភូមិទេ បើទោះជាឃើញមានកងកម្លាំងស្ថិតក្នុងឯកសណ្ឋានប៉ូលិស និងកងរាជអាវុធហត្ថជាច្រើននាក់ត្រូវបានបញ្ជូនទៅស្ទាក់ក្បួនគោយន្តអ្នកភូមិជាច្រើនកន្លែងក្តី ។
លោកបានបន្ថែមថា ទំនាស់ដីធ្លីរវាងក្រុមអ្នកភូមិជាមួយអង្គភាពយោធាខាងលើបានផ្ទុះឡើងយា៉ងស្រួចស្រាល់ក្នុងអំឡុងឆ្នាំ២០១២ ហើយចាប់តាំងពីពេលនោះរហូតមក ប្រជាពលរដ្ឋបានលើកគ្នាមកតវា៉ជាច្រើនលើករួចមកហើយ ប៉ុន្តែទំនងជាអាជ្ញាធរមានការរវល់ពេក ទើបការដោះស្រាយត្រូវបានអូសបន្លាយពេល ។ មិនអាចស្វែងរកការបំភ្លឺបន្ថែមពីភាគីកងពលតូចលេខ៥បានទេ នារសៀលថ្ងៃដដែលនោះ ៕
ចែករំលែកព័តមាននេះ