រាជធានីភ្នំពេញ ៖ ក្នុងរយៈពេល៣ឆ្នាំចុងក្រោយនេះ បើតាមរបាយការណ៍ដែលកោះសន្តិភាពទទួលបានពីក្រសួងពាណិជ្ជកម្មបង្ហាញថា បរិមាណកង់ដែលកម្ពុជាធ្វើការនាំចេញទៅបរទេសមានការកើនឡើងពីមួយឆ្នាំទៅមួយឆ្នាំ ស្របពេលវិស័យនាំចេញមួយនេះមិនសូវជាមានការចាប់អារម្មណ៍ពីមហាជននៅក្នុងប្រទេស ។ ទន្ទឹមនឹងនេះកម្ពុជា ក៏មានក្រុមហ៊ុនដំឡើងកង់របស់ខ្លួនចំនួន៤កន្លែងនៅទូទាំងប្រទេស ។
ក្នុងឆ្នាំ២០១៣កន្លងទៅនេះ កម្ពុជាបានដំឡើងកង់ និងធ្វើការនាំចេញទៅកាន់បរទេសមានចំនួនសរុប១.៧៣៩.៩៣៧គ្រឿង ក្នុងនោះនាំចេញទៅសហគមន៍អឺរ៉ុបចំនួន១.៤២៩.១៩៦គ្រឿង , សហរដ្ឋអាមេរិកមានចំនួន៧គ្រឿង, ប្រទេសកាណាដាចំនួន៦៩.៧៦១គ្រឿង រួមទាំងទៅប្រទេសផ្សេងៗទៀត មានចំនួន២៤០.៩៧៣គ្រឿង គិតជាទឹកប្រាក់មានទំហំសរុបចំនួន៣៥១.៥៥៥.៣២០ដុល្លារ បើធៀបនឹងឆ្នាំ២០១២ ការនាំចេញកង់ទៅប្រទេសដូចគ្នាខាងលើមានកង់សរុបចំនួន១.២៧៥.៦៥៨គ្រឿង និងមានទំហំទឹកប្រាក់ចំនួន២៥៣.៣៤៥.៣៨៤ដុល្លារ ពោលគឺមានការកើនឡើងប្រមាណ ៣៩% ។
ចំណែកនៅក្នុងឆ្នាំ២០១១ បរិមាណនាំចេញកង់របស់កម្ពុជា ក៏មានសន្ទុះខ្លាំងក្លាផងដែរ កម្ពុជា បានធ្វើការនាំចេញទៅកាន់សហគមន៍អឺរ៉ុប មានចំនួន២៨២.៤០៧គ្រឿង គិតជាទឹកប្រាក់មានចំនួន៥៥.៧០៥.២៤១ដុល្លារ ហើយនាំទៅសហរដ្ឋអាមេរិក មានចំនួន៤២.៩៦៦គ្រឿងគិតជាទំហំទឹកប្រាក់ មានចំនួន៨.៣៨៩.៣៧៥ដុល្លារ រីឯកង់ដែលនាំចេញទៅប្រទេសកាណាដា ចំនួន២១.១៧៤គ្រឿង គិតជាទឹកប្រាក់មានចំនួន៤.៤៥៦.៩៩៧ដុល្លារ ដោយឡែកការនាំចេញទៅប្រទេសផ្សេងៗទៀត មានចំនួន២២៤.៤២៩គ្រឿង ដែលមានទំហំទឹកប្រាក់ចំនួន៤០.៥៦៦.៩៥៩ដុល្លារផងដែរ ។
ចំពោះបរិមាណដែលកម្ពុជា នាំចូលកង់ពីបរទេសវិញ ក្នុងរយៈពេល៣ឆ្នាំចុងក្រោយនេះ មានចំនួនដូចជា ក្នុងឆ្នាំ២០១១ កម្ពុជានាំចូលកង់សរុបចំនួន៥២៨.៦៩៧គ្រឿង គិតជាទឹកប្រាក់មានចំនួន១០.៦៩៨.៥៧៨ដុល្លារ ចំណែកក្នុងឆ្នាំ២០១២ បរិមាណនាំចូលកង់សរុបមានចំនួន៥៦៧.៧២២គ្រឿង គិតជាទឹកប្រាក់សរុបមានចំនួន១១.៥៤១.៣៦១ដុល្លារ តែសម្រាប់ឆ្នាំ២០១៣ បរិមាណនាំចូលកង់ក៏មានការកើនឡើងសរុបមានចំនួន៥៧២.៤៥៧គ្រឿង គិតជាទឹកប្រាក់មានចំនួនសរុបដល់ទៅ១១.៤៣០.៩៨៥ដុល្លារ អាមេរិក ៕
ចែករំលែកព័តមាននេះ