ខេត្តបាត់ដំបង ៖ ដីភ្នំមួយកន្លែងស្ថិតនៅក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង ត្រូវបានក្រុមជនខិលខូចយកគ្រឿងចក្រកាយយកអាចម៌ដី និងថ្ម ទៅធ្វើអាជីវកម្មយ៉ាងអនាធិបតេយ្យ ដោយគ្មានអាជ្ញាធរមានសមត្ថកិច្ច ឬក៏មន្ត្រីជំនាញស្ថាប័នពាក់ព័ន្ធណាមួយចាត់វិធានការទប់ស្កាត់ឡើយ ។
តាមប្រភពពីប្រជាពលរដ្ឋនៅជិតកន្លែងកើតហេតុបានបង្ហើបឱ្យដឹងថា គ្រឿងចក្រដែលកំពុងកាប់កាយយកអាចម៌ដី និងថ្មភ្នំទាំងអស់នេះ ជាកម្មសិទ្ធិរបស់លោកងិន វិត ជាមេបញ្ជាការរងប៉េអឹមស្រុកសំពៅលូន ដោយបានឃុបឃិតគ្នាជាមួយនឹងអាជ្ញាធរមូលដ្ឋាន ។
ប្រភពបន្តថា ក្នុងមួយថ្ងៃៗគ្រឿងចក្រទាំងនេះ បានកាប់កាយបំផ្លាញព្រៃភ្នំ ដឹកជញ្ជូនអាចម៌ដី និងថ្មភ្នំយកទៅលក់ធ្វើអាជីវកម្មយ៉ាងគគ្រឹកគគ្រេងរបៀបអនាធិបតេយ្យ ហើយមិនដែលឃើញអស់លោកអាជ្ញាធរមានសមត្ថកិច្ចពាក់ព័ន្ធស្ថាប័នជំនាញណាមួយ ចុះមកទប់ស្កាត់ម្តងណាឡើយ ។ កាលពីមុនដីភ្នំមួយកន្លែងនេះ សំបូរទៅដោយព្រៃព្រឹក្សា និងសំបូរទៅដោយទឹកភ្លៀងធ្លាក់ច្រើន អាចឱ្យប្រជាពលរដ្ឋធ្វើស្រែចំការ បង្កបង្កើនផលដំណាំដាំដុះបានយ៉ាងរលូនផងដែរ ។ ប្រជាពលរដ្ឋបានបញ្ជាក់បន្ថែមថា ក្រោយមកដីភ្នំមួយកន្លែងនេះ ត្រូវពួកជនខិលខូចកាប់បំផ្លាញព្រៃ និងកាយយកអាចម៌ដីទៅលក់ធ្វើអាជីវកម្ម ធ្វើមានធ្វើបានផ្ទាល់ខ្លួននោះមក ទឹកភ្លៀងក៏មិនសូវសំបូរដែរ នាពេលបច្ចុប្បន្ននេះ ។
លោកងិត វិត មេប៉េអឹមស្រុកសំពៅលូន ដែលរងការរិះគន់ពីប្រជាពលរដ្ឋ បានប្រាប់តាមទូរស័ព្ទកាលពីរសៀលថ្ងៃទី២២ មេសា នេះឱ្យដឹងថា គ្រឿងចក្រទាំងអស់នោះជារបស់លោកពិតមែន តែលោកមិនបានកាប់កាយដីភ្នំនោះទេ គឺគ្រាន់តែកាប់កាយអាចម៌ដីជាយៗជើងភ្នំនោះ ដើម្បីដាំពោតតែប៉ុណ្ណោះ ហើយការកាប់កាយអាចម៌ដីទាំងអស់នេះ គឺមានច្បាប់ត្រឹមត្រូវ ។ ចំណែកលោកជុំ ស៊ីប ចៅហ្វាយស្រុកសំពៅលូន មិនអាចសុំការបំភ្លឺបានទេ ដោយទូរស័ព្ទរបស់លោកមិនអាចភ្ជាប់ទំនាក់ទំនងបាន ។
ប្រជាពលរដ្ឋជាច្រើនរស់នៅស្រុកសំពៅលូន បាននាំគ្នាសំណូមពរដល់អាជ្ញាធរមានសមត្ថកិច្ច និងមន្ត្រីជំនាញពាក់ព័ន្ធ ក៏ដូចជាថ្នាក់ដឹកនាំ មេត្តាជួយចាត់វិធានការទប់ស្កាត់នូវបទល្មើសខាងលើនេះ ឱ្យបានទាន់ពេលវេលាផង ចៀសវាងកុំឱ្យពួកក្រុមជនខិលខូចទាំងនេះកាប់បំផ្លាញធនធានធម្មជាតិតទៅទៀត ៕
ចែករំលែកព័តមាននេះ