តាមរបាយការណ៍របស់វិទ្យាស្ថានស្រាវជ្រាវHurun បានបង្ហាញថា ប្រទេសចិនមានមហាសេដ្ឋីចំនួន១១រូបជាអ្នកមានទ្រព្យសម្បត្តិស្ដុកស្ដម្ភបំផុតនៅក្នុងឧស្សាហកម្មរថយន្តនៅលើពិភពលោក ។ ក្នុងចំណោមមហាសេដ្ឋីទាំងនោះលោកWei Jianjun ដែលជាស្ថាបនិកនិងជាប្រធានក្រុមហ៊ុនរថយន្តGreat Wall ដែលជាអ្នកផលិតរថយន្តSUV លក់ដាច់ជាងគេបំផុតនៅក្នុងប្រទេសចិនជាអ្នកនាំមុខគេក្នុងចំណោមមហាសេដ្ឋីជនជាតិចិនទាំង១១នោះ ។
ដោយឡែកនៅលើពិភពលោកលោកWei បានជាប់ចំណាត់ថ្នាក់ទី៥ ជាមួយនឹងទឹកប្រាក់៧,៦ពាន់លានដុល្លារ ។ ជាងនេះទៅទៀតលោកក៏ជាអ្នកកាន់កាប់តំណែងសហគ្រិនផលិតរថយន្តដែលមានលុយច្រើនបំផុតលើពិភពលោកផងដែរ ។ ចំណែកអ្នកបន្ទាប់គឺលោកLu Guanqiu និងក្រុមហ៊ុនWanxiang Group របស់គ្រួសារលោកដែលជាអ្នកផលិតគ្រឿងបន្លាស់រថយន្តធំបំផុតនៅក្នុងប្រទេសចិនជាមួយនឹងទឹកប្រាក់ដែលមាន៤,៥ពាន់លានដុល្លារ ។
លោកLuបានទិញក្រុមហ៊ុនរថយន្តFisker Automotive កាលពីដើមឆ្នាំ២០១៤ នេះដោយចំណាយទឹកប្រាក់២៥លានដុល្លារ ហើយថែមទាំងបានទិញក្រុមហ៊ុនផលិតអាគុយលីធៀមអាយអនរបស់សហរដ្ឋអាមេរិកទៀតផង ។ រីឯអ្នកទី៣គឺ លោកWangChuanfu ដែលជាស្ថាបនិករបស់ក្រុមហ៊ុនផលិតរថយន្តយីហោBYD មានប្រាក់៤ពាន់លានដុល្លារអាមេរិក ។ ទោះបីជាយ៉ាងណាក៏ដោយអាល្លឺម៉ង់និងសហរដ្ឋអាមេរិកបានថ្ពក់ជាប់នូវកៅអីទី២ជាមួយនឹងការនាំមកនូវមហាសេដ្ឋីក្នុងវិស័យនេះចំនួន៨រូបរៀងៗខ្លួនផងដែរ ។
ចំណែកប្រទេសជប៉ុនឯណោះវិញថ្វីបើឧស្សាហកម្មរថយន្តរបស់ខ្លួនមានលក្ខណៈខ្លាំងក្លាពិតមែន ប៉ុន្តែបែរជាពុំមានអ្នកមានលុយលំដាប់មហាសេដ្ឋីពិភពលោកទៅវិញដែលជារឿងគួរឱ្យភ្ញាក់ផ្អើលមួយពីព្រោះទ្រព្យសម្បត្តិជាមធ្យមរបស់មហាសេដ្ឋីរថយន្តត្រឹមតែ៣,៧៥ពាន់លានដុល្លារគឺគ្រប់គ្រាន់ជាប់ក្នុងបញ្ជីទៅហើយ ។
គួរបញ្ជាក់ថា មហាសេដ្ឋីមកពីក្រុមហ៊ុនផលិតរថយន្តBMW របស់អាល្លឺម៉ង់ដែលជាប់ក្នុងចំណាត់ថ្នាក់កំពូលទាំង៣រួមមានលោកSusanne Klatten លោកStefan Quant និងលោកJohanna Quantare ។ រីឯលោកElon Musk ស្ថាបនិកនិងជានាយកប្រតិបត្តិរបស់ក្រុមហ៊ុនរថយន្តប្រើថាមពលអគ្គិសនី Tesla របស់សហរដ្ឋអាមេរិកជាអ្នកបង្កើនទ្រព្យសម្បត្តិលឿនបំផុតនៅក្នុងឧស្សាហកម្មរថយន្ត ។ លោកមានទ្រព្យសម្បត្តិរហូតដល់ទៅ៦,៦ពាន់លានដុល្លារកាលពីឆ្នាំ២០១៣ដែលគេចាត់ចូលក្នុងចំណាត់ថ្នាក់ទី៧ក្នុងបញ្ជី៕
ចែករំលែកព័តមាននេះ