រាជធានីភ្នំពេញ ៖ នាអំទ្បុងដើមខែឧសភា ប៉ុន្មានថ្ងៃទៀតនេះ នឹងមានព្រឹត្តិការណ៍ប្រកួតចំបាប់ធំ២ នៅក្នុងប្រទេសថៃ ហើយកីទ្បាករ-កីទ្បាការិនីចំបាប់កម្ពុជាចំនួន៤រូប ត្រូវបានសហព័ន្ធកីទ្បាចំបាប់កម្ពុជាត្រៀមបញ្ជូនចេញឱ្យទៅប្រកួតធ្វើតំណាងឱ្យជាតិទាំងមូល ក្នុងព្រឹត្តិការណ៍ជើងឯកអាស៊ី និងការប្រកួតជម្រុះយុវជនអូទ្បាំពិកនៅក្នុងប្រទេសថៃ ។
រាជធានីភ្នំពេញ ៖ នាអំទ្បុងដើមខែឧសភា ប៉ុន្មានថ្ងៃទៀតនេះ នឹងមានព្រឹត្តិការណ៍ប្រកួតចំបាប់ធំ២ នៅក្នុងប្រទេសថៃ ហើយកីទ្បាករ-កីទ្បាការិនីចំបាប់កម្ពុជាចំនួន៤រូប ត្រូវបានសហព័ន្ធកីទ្បាចំបាប់កម្ពុជាត្រៀមបញ្ជូនចេញឱ្យទៅប្រកួតធ្វើតំណាងឱ្យជាតិទាំងមូល ក្នុងព្រឹត្តិការណ៍ជើងឯកអាស៊ី និងការប្រកួតជម្រុះយុវជនអូទ្បាំពិកនៅក្នុងប្រទេសថៃ ។
លោក ធិន វិចិត្រ អគ្គលេខាធិការសហព័ន្ធកីទ្បាចំបាប់កម្ពុជា បានប្រាប់ដូចគ្នានឹងការបញ្ជាក់ឱ្យដឹងនៅតាមបណ្តាញសារព័ត៌មានក្នុងស្រុកថា កីទ្បាករ-កីទ្បាការិនីចំនួន៤រូប ដែលខាងសហព័ន្ធប្រកាសចាត់តាំងឱ្យចេញទៅប្រកួតចំបាប់តំណាងប្រទេសកម្ពុជានោះ បានត្រៀមខ្លួនរួចរាល់អស់ហើយ ដោយក្នុងពេលនេះ ពួកគេកាន់តែមមាញឹកខ្លាំងទ្បើងក្នុងការហ្វឹកហាត់ និងថែបំប៉នសុខភាព ។ កីទ្បាករ-កីទ្បាការិនីចំបាប់ទាំង៤រូបនោះ រំពឹងថា ពេលត្រទ្បប់មកវិញ នឹងនាំមកជាមួយពាន ឬមេដាយដូចគ្នានឹងព្រឹត្តិការណ៍ស៊ីហ្គេម ដែលបានធ្វើទ្បើងនៅប្រទេសមីយ៉ានម៉ា កាលពីចុងឆ្នាំ២០១៣ ។ កីទ្បាករ-កីទ្បាការិនី ដែលត្រូវបញ្ជូនចេញទាំងអស់នោះ គេតម្រូវយកតែអាយុក្រោម១៧ឆ្នាំប៉ុណ្ណោះ ទើបកីទ្បាករ-កីទ្បាការិនីខ្លាំងៗមួយចំនួនផ្សេងទៀត ប្រចាំនៅក្នុងសហព័ន្ធ ដែលខាងចំបាប់មានការរំពឹងខ្លាំងថា នឹងឈ្នះច្រើនជាងចាញ់នោះ មិនត្រូវបានបញ្ជូនចេញ ។
យ៉ាងណាក៏ដោយ កីទ្បាករ-កីទ្បាការិនីទាំង៤រូបនោះ មិនមែនជាកីទ្បាករជើងថ្មី ដែលគ្មានបទពិសោធន៍នោះទេ ទោះបីអ្នកខ្លះមិនមែនជាកីទ្បាករដែលធ្លាប់ទទួលបានមេដាយនៅក្រៅប្រទេស ក៏ជាកីទ្បាករឆ្នើមៗប្រចាំសហព័ន្ធ ដែលមានសមត្ថភាពក្តោបក្តាប់កេរ្តិ៍ឈ្មោះ និងមេដាយផ្នែកចំបាប់ក្នុងស្រុកនាពេលកន្លងមកនោះដែរ ។ ក្នុងនោះ ក៏មានកីទ្បាការិនីដែលជាម្ចាស់មេដាយស៊ីហ្គេម ដែលខាងសហព័ន្ធកំពុងមានជំនឿយ៉ាងមុតមាំថា នាងនឹងធ្វើបានសាជាថ្មីនោះផងដែរ ។ កីទ្បាករ-កីទ្បាការិនីទាំង៤រូបនោះ គឺកីទ្បាករ ងួន មករា ចេញប្រកួតក្នុងប្រភេទទម្ងន់៦៣គីទ្បូក្រាម កីទ្បាករ ម៉ុល រស្មី ចេញប្រកួតក្នុងប្រភេទទម្ងន់៥៥គីទ្បូក្រាម កីទ្បាការិនី ឌន ស្រីម៉ៅ ចេញប្រកួតក្នុងប្រភេទទម្ងន់៥២គីទ្បូក្រាម និងកីទ្បាការិនី នី សំណាង ដែលជាម្ចាស់មេដាយមាស SEA Games លើកទី២៧ នៅប្រទេសមីយ៉ាន់ម៉ា ត្រូវចេញប្រកួតក្នុងប្រភេទទម្ងន់៦៣គីទ្បូក្រាម ។
ពាក់ព័ន្ធនឹងការប្រកួតនៅក្នុងប្រទេសថៃ ដែលនឹងចាប់ផ្តើមក្នុងពេលដ៏ខ្លីនេះ លោក ធិន វិចិត្រ ប្រាប់ថា នឹងធ្វើទ្បើងក្នុងលក្ខខណ្ឌ២ផ្នែក ដោយទ្បែកពីគ្នា ដោយមួយគឺជាការប្រកួតដណ្តើមពានជើងឯកខាងផ្នែកអាស៊ី ដោយមានប្រទេសចូលរួមចំនួនជាង៤០ នៅទូទាំងតំបន់អាស៊ី និងមួយទៀតគឺការប្រកួតជម្រុះផ្នែកយុវជនអូទ្បាំពិក ដែលនោះក៏ជាព្រឹត្តិការណ៍សំខាន់ផងដែរ ។ ចំពោះព្រឹត្តិការណ៍ទី១ កម្ពុជានឹងត្រូវគណៈកម្មការរៀបចំបែងចែកជាក្រុមជាមួយប្រទេសផ្សេង ហើយឱ្យប្រកួតជម្រុះគ្នារហូតរកឃើញអ្នកឈ្នះដើម្បីទទួលបានពានជើងឯកអាស៊ី ដូចគ្នានឹងការប្រកួតនៅក្នុងព្រឹត្តិការណ៍ស៊ីហ្គេមនោះដែរ ។ សម្រាប់ព្រឹត្តិការណ៍ទី២ គឺការប្រកួតកំណត់យកប្រទេសក្នុងចំណោមទាំងជាង៤០ឱ្យមានមុខនៅក្នុងការប្រកួតយុវជនអូទ្បាំពិកខាងផ្នែកចំបាប់ ប្រចាំនៅក្នុងឆ្នាំ២០១៤ ។ ប្រសិនបើកម្ពុជាអាចជម្រុះជាប់នៅក្នុងប្រទេសថៃ នោះនឹងបន្តទៅកាន់ប្រទេសចិនតែម្តង ដើម្បីប្រកួតដណ្តើមពានជើងឯកយុវជនអូទ្បាំពិក ដែលជាការប្រកួតលំដាប់អន្តរជាតិដូចគ្នានឹងការប្រកួតកីទ្បាអូទ្បាំពិកដូច្នេះដែរ ប៉ុន្តែសម្រាប់តែកីទ្បាករដែលមានអាយុក្រោម១៧ឆ្នាំ ។
តាមការបញ្ជាក់ពីមន្ត្រីជាន់ខ្ពស់ប្រចាំសហព័ន្ធកីទ្បាចំបាប់កម្ពុជា លោក ធិន វិចិត្រ នឹងដឹកនាំកីទ្បាករ-កីទ្បាការិនីទាំង៤រូប ចាកចេញទៅកាន់ប្រទេសថៃ នៅថ្ងៃទី៧ ឧសភា ខាងមុខ ដោយលោកមិនត្រឹមតែជាប្រតិភូប៉ុណ្ណោះទេ ប៉ុន្តែក៏ទៅក្នុងនាមជាគ្រូបង្វឹកដើម្បីជួយឱ្យកីទ្បាករ-កីទ្បាការិនីទាំង៤រូប ចេញទៅប្រកួតនៅក្នុងប្រទេសថៃ ប្រកបដោយកម្លាំងចិត្ត និងសន្ទុះខ្លាំងក្លាផងដែរ ។ អុីចឹងហើយ ទើបការប្រកួតទាំង២ព្រឹត្តិការណ៍នៅក្នុងប្រទេសថៃ ត្រូវបានមន្ត្រីសហព័ន្ធកីទ្បាចំបាប់កម្ពុជាចាត់ទុកថា ជារឿងសំខាន់ប្រចាំឆ្នាំ២០១៤ ដែលខាងសហព័ន្ធត្រូវតែរកឱ្យបានមេដាយមាស ឬពានមាសដូចគ្នានឹងលទ្ធផលនៅស៊ីហ្គេម ។ តាមការរំពឹងទុករបស់លោក ធិន វិចិត្រ ក្នុងចំណោមព្រឹត្តិការណ៍ទាំង២ យ៉ាងហោចណាស់ក៏មានកីទ្បាករ ឬកីទ្បាការិនីណាម្នាក់ ទទួលបានផ្លែផ្កាត្រទ្បប់មកវិញដែរ ពីការប្រកួតនៅក្នុងប្រទេសថៃ។ បើកម្ពុជាប្រកួតជម្រុះជាប់ នោះនឹងបន្តទៅប្រកួតនៅក្នុងប្រទេសចិន ក្នុងប៉ុន្មានខែខាងមុខទៀត សម្រាប់ការប្រកួតជម្រុះយុវជនអូទ្បាំពិក។
ក្នុងនោះ កីទ្បាការិនី នី សំណាង គឺជាតួអង្គសំខាន់ម្នាក់ ដែលលោក និងមន្ត្រីសហព័ន្ធទាំងមូលមានជំនឿយ៉ាងខ្លាំងថា នឹងទទួលបានលទ្ធផលវិជ្ជមានត្រទ្បប់មកវិញ ដោយសារតែនាងបានក្តាប់មេដាយមាសនៅស៊ីហ្គេមរួចមកហើយ ៕
ចែករំលែកព័តមាននេះ