ស្ត្រីចំណាស់ម្នាក់ជាប់ចោទពីបទជួញដូរកុមារត្រូវប៉ូលិសចាប់ខ្លួន
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៧:១៩
រក្សា
ស្ត្រីចំណាស់ម្នាក់ត្រូវបានសមត្ថកិច្ចចាប់់ខ្លួនជាប់ចោទពីបទជួញដូរមនុស្ស(កុមារ)
ខេត្តបន្ទាយមានជ័យ ៖ ស្ត្រីចំណាស់ម្នាក់ត្រូវបានសមត្ថកិច្ចចាប់់ខ្លួនកាលពីវេលាម៉ោង៥ និង២០នាទីល្ងាចថ្ងៃទី៦ ខែកញ្ញា ឆ្នាំ២០១០ ដោយជាប់ចោទពីបទជួញដូរមនុស្ស(កុមារ) នៅគ្លីនិកទេវិនវិសាលសុខ ស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។ លោកវរសេនីយ៍ទោ សិទ្ធ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា ស្ត្រីចំណាស់រូបនេះឈ្មោះអែម ចន្ធូ ហៅយាយម៉ាប់ អាយុ៥០ឆ្នាំ នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។ ការចាប់ឃាត់ខ្លួនស្ត្រីចំណាស់រូបនេះ ខណៈពេលទទួលបានពាក្យបណ្តឹងរបស់ស្ត្រីឈ្មោះណយ ពៅ អាយុ៣៧ឆ្នាំ នៅភូមិជាមួយគ្នាបានចោទថា យាយម៉ាប់នេះបានពកូនរបស់គាត់ដើរអំពាវនាវលក់ដូចទំនិញ ។ កូនគាត់គឺជាទារិកាទើបតែមានអាយុ១០ថ្ងៃប៉ុណ្ណោះ ។
ក្នុងកិច្ចប្រតិបត្តិការនេះ ដោយអនុវត្តតាមបទបញ្ជារបស់លោកឧត្តមសេនីយ៍ស្នងការ កំលាំងជំនាញការិយាល័យប្រឆាំងការជួញដូរមនុស្ស និងការពារអនីតិជន បានចុះសហការជាមួយកំលាំងជំនាញអធិការដ្ឋាននគរបាលក្រុងប៉ោយប៉ែតចាប់ស្ត្រីត្រូវចោទបញ្ជូនទៅកាន់ស្នងការដ្ឋានខេត្ត ។ លោកវរសេនីយ៍ទោ សិទ្ធ ឡោះ បានឱ្យដឹងទៀតថា តាមការបំភ្លឺរបស់ស្ត្រីម្នាក់ឈ្មោះក្តាម សាវ៉េត អាយុ៤៧ឆ្នាំ មុខរបរលក់ត្រីនៅផ្សាររ៉ា បានប្រាប់សមត្ថកិច្ចថា នៅថ្ងៃទី៦ ខែកញ្ញា វេលាម៉ោង៤និង៣០នាទីរសៀល យាយម៉ាប់ដើរពទារិកាតូចមកសួរគាត់ថាតើចង់បានទារិកានេះទេ ព្រោះម្តាយគ្មានលុយឱ្យថ្លៃពេទ្យ ។ ពេលនោះគាត់ក៏បានទទួលយកទារិកានោះដោយឱ្យតំលៃ៣ពាន់បាត រួចហើយនាំទារកនោះទៅពិនិត្យឈាមរកមេរោគនៅគ្លីនិកទេវិនវិសាលសុខក៏ត្រូវសមត្ថកិច្ចរកឃើញ និងចាប់ខ្លួនតែម្តង ។
លោកឧត្តមសេនីយ៍ត្រី ហ៊ុន ហ៊ាន ស្នងការនគរបាលខេត្តបន្ទាយមានជ័យមានប្រសាសន៍ថា ផ្អែកតាមបណ្តឹងរបស់ស្ត្រីឈ្មោះណយ ពៅ និងចំលើយរបស់ស្ត្រីចំណាស់ឈ្មោះអែម ចន្ធូ ហៅយាយម៉ាប់ អាចសន្និដ្ឋានថា ឈ្មោះអែម ចន្ធូ ពិតជាបានប្រព្រឹត្តនូវអំពើលក់ដូរមនុស្សឱ្យទៅស្រ្តីឈ្មោះក្តាម សាវ៉េត ប្រាកដមែន ។ បច្ចុប្បន្នស្ត្រីត្រូវចោទត្រូវបានសមត្ថកិច្ចជំនាញរៀបចំសំណុំរឿងបញ្ជូនទៅសាលាដំបូងចាត់ការតាមច្បាប់ ៕
