ក្នុងសេចក្តីប្រកាសយ៉ាងខ្លីមួយតាមទូរស័ព្ទប្រាប់ដល់ AFP លោកយូ៉រូ៉ អាប់ឌុលសាឡាម អ្នកទទួលខុសត្រូវម្នាក់នៃចលនាដើម្បីឯកភាព និងជីហាដនៅអាហ្វ្រិកខាងលិច MUJAO ជាក្រុមជីហាដនិយមម៉ាលីមួយអះអាងកាលពីថ្ងៃទី២២ មេសា ពីការស្លាប់នៃចំណាប់ខ្មាំងជនជាតិបារាំងលោក RODRIGUES LEAL ។
លោកអាប់ឌុលសាឡាម និយាយថា ចំណាប់ខ្មាំងរូបនោះស្លាប់ព្រោះតែបារាំងជាសត្រូវរបស់យើង ។ ចំណែកអ្នកនាំពាក្យក្រសួងការបរទេសបារាំងលោក ROMAIN NADAL គូសបញ្ជាក់ថា លោកថ្កោលទោសយ៉ាងម៉ឺងម៉ាត់បំផុតចំពោះអំពើរបស់ក្រុមភេរវកម្មនេះ ។ លោកបន្តថា សេចក្តីប្រកាសខាងលើនេះរបស់ក្រុម MUJAO ជាអ្នកទទួលខុសត្រូវលើការចាប់ចំណាប់ខ្មាំងនេះនាំឱ្យយើងយល់ថា លោក RODRIGUES LEAL ប្រហែលជាត្រូវស្លាប់ប្រាកដហើយ ទោះបីពុំទាន់មានភស្តុតាងបញ្ជាក់ក្តី ។
យោងតាមព័ត៌មាននានារបស់ FRANCE-2 ទទួលបានពីអាជ្ញាធរបារាំងថា លោក GILBERTO RODRIGUES LEAL អាយុ៦២ឆ្នាំបានស្លាប់ចាប់តាំងពីច្រើនខែមកហើយដោយសារគ្មានការព្យាបាលជំងឺលោក ។លោក RODRIGUES LEAL កើតនៅប្រទេសព័រទុយហ្គាល់ បុ៉ន្តែមានសញ្ជាតិបារាំង ត្រូវចាប់ពង្រត់កាលពីខែវិច្ឆិកា ឆ្នាំ២០១២ នៅតំបន់មួយក្បែរព្រំដែនសេណាហ្គាល់ និងម៉ូរីតានី។ ក្រុម MUJAO បានប្រកាសទទួលខុសត្រូវពីការចាប់ខ្លួនលោក ៕
ចែករំលែកព័តមាននេះ