រាជធានីភ្នំពេញ ៖ ការប្រកួតប្រដាល់អន្ដរជាតិខែទី២របស់ទូរទស្សន៍អាស៊ីអាគ្នេយ៍ នារសៀលថ្ងៃព្រហស្បតិ៍ទី២៤ មេសា ស្អែកនេះ កីឡាករកម្ពុជា៣រូបហាក់មានជំនឿចិត្ដយ៉ាងខ្លាំងថាពួកគេនឹងឈ្នះទាំង៣នាក់ដូចកីឡាករកម្ពុជា៣រូបដំបូង ដែលបានឈ្នះដាច់កាលពីខែទី១ ។ ទោះជាយ៉ាងណា លោកញៀន សុធី ជាមន្ដ្រីអ្នករៀបចំ បែរជាព្យាករផ្ទុយស្រឡះពីការជឿជាក់របស់ពួកគេទៅវិញ ។
ការប្រកួតប្រដាល់អន្ដរជាតិស្អែកនេះ នឹងចាប់ផ្ដើមឡើងនៅវេលាម៉ោង៣ដល់ម៉ោង៥ល្ងាចទៀតហើយ ដោយមានកីឡាករកម្ពុជា៣រូបគឺ កីឡាករផល សោភ័ណ្ឌ មកពីក្លិបតាឡីដំរីមានឫទ្ធិ កីឡាករម៉ឺន សុភា មកពីក្លិបកងពលតូចឆត្រយោង៩១១ និងកីឡាករវ៉ន វីវ៉ា មកពីក្លិបព្រះខ័នរាជ ។ ផល សោភ័ណ្ឌ បានថ្លែងថា ប៉ុន្មានសប្ដាហ៍មកនេះ ដ្បិតថាលោកជាប់ភារៈស៊ីឈ្នួលបើករថយន្ដឱ្យគេក៏ដោយ ក៏លោកហ្វឹកហាត់បានជាប់លាប់ផងដែរនៅក្នុងក្លិបប្រដាល់។ សំអាងលើបទពិសោធន៍ប្រកួតបាន៦៧ដង ឈ្នះ៥៧ដង និងចាញ់ត្រឹមតែ១០ដង លោកហាក់មានជំនឿចិត្ដច្រើន ថាខ្លួននឹងឈ្នះ ហើយមិនអាចបរាជ័យដាច់ខាតក្រោមដៃរបស់កីឡាករបរទេស ។
ដៃគូដែលប៉ះជាមួយគេថ្ងៃស្អែកគឺកីឡាករផែនឌីន ជនជាតិថៃ ដែលធ្លាប់ប្រកួតបាន៥៥ដង ឈ្នះ៥០ដង និងចាញ់ត្រឹមតែ៥ដងក្នុងការប្រកួត ។ ផល សោភ័ណ្ឌ ប្រាប់ថា ទោះជាកីឡាករផែនឌីន មិនមែនជាកីឡាករធម្មតា ក៏លោកនៅតែមានជំនឿចិត្ដខ្ពស់ដូចគ្នាថា មិនចាញ់សម្រាប់ថ្ងៃស្អែក ។
កីឡាករម៉ឺុន សុភា បានបញ្ជាក់ដូចគ្នាដែរថា នឹងឈ្នះផងដែរ បើទោះជាដៃគូដែលគេត្រូវប៉ះជាមួយមិនមែនជាកីឡាករប្រភេទអន់ៗ ដែលអាចមើលស្រាលបានក្ដី ។ សំអាងលើការហ្វឹកហាត់ប្រមាណជាកន្លះខែតាំងពីមុនចូលឆ្នាំខ្មែរ លោកមានជំនឿចិត្ដខ្លាំង ថាលទ្ធផលចុងក្រោយគឺពិតជាឈ្នះ ពិសេសនៅពេលលោកគិតថា ខ្លួនធ្លាប់ប្រកួតបាន៤៤ដង ឈ្នះ៤០ដង និងចាញ់តែ៤ដង ។ កីឡាករដែលប៉ះជាមួយម៉ឺន សុភា នៅសង្វៀនទូរទស្សន៍អាស៊ីអាគ្នេយ៍នារសៀលថ្ងៃស្អែកគឺកីឡាករអាប់ដាល់ ជនជាតិបារាំង ដែលធ្លាប់ប្រកួតបាន៣១ដង ឈ្នះ២៨ដង និងចាញ់៣ដង ។ ម៉ឺុន សុភា ប្រាប់ថា រូបគេបានត្រៀមខ្លួនរួចរាល់អស់ហើយ ដើម្បីយកឈ្នះទៅលើកីឡាករបរទេស បើទោះជាកីឡាករបារាំងដែលត្រូវប៉ះលោកគឺជាកីឡាករខ្លាំងម្នាក់ ដែលបានឆ្លងកាត់ការហ្វឹកហាត់នៅប្រទេសថៃ ។
ដោយឡែក ចំពោះកីឡាករវ៉ន វីវ៉ា រឹតតែមានសង្ឃឹមលើសលប់ជាងគេ បន្ទាប់ពីសំអាងថា គេធ្លាប់ឆ្លងកាត់ការប្រកួតរហូតដល់ជាង១០០ដង ហើយធ្លាប់ផ្ដួលកីឡាករបរទេសរាប់មិនអស់ ។ កីឡាករដែលប៉ះជាមួយគេគឺកីឡាករថៃ យុទ្ធគុនក្រៃ ដែលធ្លាប់ឆ្លងកាត់ការប្រកួត៦៩ដង ឈ្នះ៦៣ដង និងចាញ់តែ៣ដង ។ វ៉ន វីវ៉ា មានជំនឿស្ទើរតែពេញ១០០%ថា គេនឹងឈ្នះនៅរសៀលថ្ងៃស្អែក ។ ជាមួយនឹងការបញ្ចេញទស្សនៈប្រកបដោយការជឿជាក់នេះ លោកញៀន សុធី មន្ដ្រីរៀបចំកីឡាប្រដាល់ប្រចាំនៅស្ថានីយទូរទស្សន៍អាស៊ីអាគ្នេយ៍ និងជាមន្ដ្រីទំនាក់ទំនងបានថ្លែងប្រាប់ថា លោកមិនរំពឹងនោះឡើយថា កីឡាករកម្ពុជា ទាំង៣រូបនឹងអាចឈ្នះលើកីឡាករបរទេសបានទាំងអស់ដូចកាលពីខែមុន ដោយសារតែបរិបទរវាងខែនេះមានសភាពខុសគ្នាកាលពីខែទី១ ។
ហេតុផលនៃការលើកឡើងបែបនេះ គឺដោយសារតែកីឡាករបរទេសដែលស្ថានីយទូរទ្សន៍អាស៊ីអាគ្នេយ៍តម្រូវឱ្យសហព័ន្ធកីឡាប្រដាល់ថៃនាំយកមកលើកនេះសុទ្ធសឹងតែមានស្នាដៃនៅលើសង្វៀនប្រទេសថៃ និងតាមបណ្ដាប្រទេសផ្សេង ដែលអាចនិយាយបានថាជាកីឡាករមានថ្វីដៃល្អជាងកីឡាករបរទេសទាំង៣កាលពីលើកមុន ។ ជាក់ស្ដែង វត្ដមានរបស់កីឡាករយុទ្ធគុន ក្រៃ និងផែនឌីន គូអន្ដរជាតិទី១ និងទី៣ សុទ្ធតែជាកីឡាករល្អ ដែលមានតម្លៃខ្ពស់ដែលលោកនិងក្រុមអ្នកគ្រប់គ្រងកម្មវិធីទាំងមូលហ៊ានថ្លៃយកមក ។ ទោះជាយ៉ាងណា លោកមិនមានបំណងចង់ឱ្យកីឡាករបរទេសយកឈ្នះកីឡាករកម្ពុជាទេ ដោយលោកគ្រាន់តែបារម្ភខ្លាចការប្រកួតជាក់ស្ដែងរបស់កីឡាករកម្ពុជានឹងពិបាកយកឈ្នះទាំង៣នាក់ សម្រាប់ការប្រកួតអន្ដរជាតិលើកទី២ នៅថ្ងៃស្អែកតែប៉ុណ្ណោះ ។
ចាំមើលតើរវាងកីឡាករកម្ពុជាទាំង៣រូបអាចយកឈ្នះកីឡាករបរទេសទាំង៣រូបដូចការរំពឹងទុក ឬត្រឹមតែឈ្នះខ្លះ ចាញ់ខ្លះ ដូចការព្យាកររបស់លោកញៀន សុធី ?
ចែករំលែកព័តមាននេះ