រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាបៀរភ្នំពេញ នៅលើសង្វៀន CTN នាថ្ងៃទី២៤ មេសា ស្អែកនេះ ឈានចូលដល់សប្តាហ៍ទី១១ ហើយ ។ សមាសភាពកីឡាករដែលត្រូវមានមុខប្រកួតនៅថ្ងៃនោះមាន ជន សាវុធ មកពីក្លិបពោធិជ័យកីឡា ត្រូវជួបជាមួយនឹង ទឹម សុជាតិ មកពីក្លិបកងរាជអាវុធហត្ថរាជធានីភ្នំពេញ និងគឿម សុវណ្ណឌឿត មកពីក្លិបមោងឫស្សីមរតកគុនខ្មែរ ជួបជាមួយ ខុន សីហា មកពីក្លិបកងពលធំអន្តរាគមន៍លេខ៣ ព្រះវិហារ ។
ជន សាវុធ ប្រកួតបាន៥លើក ក្នុងនោះឈ្នះ៤លើក ចាញ់១លើក ឯទឹម សុជាតិ វិញ ប្រកួតបាន៤លើក ឈ្នះ២លើក ចាញ់២លើក ។ ដូច្នេះ ជន សាវុធ បើឈ្នះលើកនេះទៀត គេនឹងមានឱកាសបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀត ។ ទោះបីជាយ៉ាងណា ជន សាវុធ មានសង្ឃឹមច្រើនក្នុងការឡើងទៅប្រកួតនៅវគ្គបន្តទៀត ជាពិសេសការមកប៉ះ ទឹម សុជាតិ លើកនេះតែម្តង ។ រវាងគូនេះ ជន សាវុធ ចាស់វស្សាជាង មានស្នៀតប្រយុទ្ធល្អជាងគូប្រកួតទាំងព្រម រីឯកម្លាំងក៏ខ្លាំងជាងដែរ។ ចំណែក ទឹម សុជាតិ គ្រាន់តែជាអ្នកប្រដាល់ស្រករក្រោយម្នាក់បុ៉ណ្ណោះ ដូច្នេះល្បិចប្រយុទ្ធនៅលើសង្វៀនរបស់គេនៅស្ទើរនៅឡើយ ។ កាលពីសប្តាហ៍មុនគេត្រូវ ហេង សត្រា មកពីក្លិបតាព្រហ្មមានជ័យ វាយឱ្យសន្លប់ធំនៅត្រឹមទឹកទី១ ។
ទោះបីយ៉ាងណា សម្រាប់ការមកប៉ះ ជន សាវុធ លើកនេះក៏គេមិនទាន់ហ៊ានអះអាងថា យ៉ាងណានោះដែរ បុ៉ន្តែសម្រាប់អ្នកធ្លាប់តាមដានការប្រកួតភាគច្រើន គឺគេមានជំនឿចិត្តលើ ជន សាវុធ ច្រើនជាង ។ ទឹម សុជាតិ បើសិនជាចាញ់លើកនេះម្តងទៀតនោះ ក្តីសង្ឃឹមក្នុងការស្វែងរកកន្លែងឈរជើងនៅវគ្គពាក់កណ្តាលផ្តាច់ព្រ័ត្រនោះ គឺមានតិចបំផុត ដូច្នេះគេត្រូវការឈ្នះទើបអាចនៅមានផ្លូវអ៊ុតខ្លះ ។
គឿម សុវណ្ណឌឿត និងខុន សីហា ពេលនេះកំពុងតែមានពិន្ទុប្រទាញប្រទង់គ្នា ។ ៥ប្រកួតកន្លងមក គឿម សុវណ្ណឌឿត ឈ្នះ៣ ចាញ់២ ឯខុន សីហា ឈ្នះ៤ ចាញ់១ ។ ដូច្នេះ គឿម សុវណ្ណឌឿត ត្រូវរង់ចាំអ៊ុតមើលលទ្ធផលការប្រកួតលើកនេះម្តងទៀត បើសិនជាឈ្នះគឺគេមានសង្ឃឹមច្រើនក្នុងការឡើងទៅប្រកួតនៅវគ្គបន្ត ។ រវាងពួកគេទាំងពីរនៅសល់តែ២ប្រកួតម្នាក់ទៀតបុ៉ណ្ណោះនឹងត្រូវបញ្ចប់វគ្គជម្រុះវិលជុំហើយ ។ ការប៉ះគ្នាលើកនេះ គឿម សុវណ្ណឌឿត មិនសូវជាមានជំនឿចិត្តបុ៉ន្មានឡើយ ព្រោះអីបើធ្វើការវាយតម្លៃទៅលើល្បិចប្រយុទ្ធនៅលើសង្វៀនគឺ ខុន សីហា ល្អជាងគេឆ្ងាយណាស់ ៕
ចែករំលែកព័តមាននេះ