នាងម៉ារីយ៉ា សារ៉ាប៉ូវ៉ា កំពុងឈានឆ្ពោះទៅរកភាពជោគជ័យបន្ថែមទៀតក្នុងអាជីពជាមួយនឹងពានជើងឯកក្របខ័ណ្ឌធំមួយក្នុងពេលដ៏ខ្លីខាងមុខ ខណៈនាងបានកំពុងត្រៀមខ្លួនចាប់ផ្តើមកំដៅសាច់ដុំក្នុងកម្មវិធីប្រកួតលើទីលានដីក្រហម WTA Porsche Tennis Grand Prix សប្តាហ៍នេះនៅប្រទេសអាល្លឺម៉ង់ ។
កាលពីឆ្នាំទៅមិញ កីឡាការិនីវ័យ២៧ឆ្នាំរបស់រុស្ស៊ីរូបនេះបានបំបាក់កីឡាការិនីចិន លី ណាក្នុងលទ្ធផល២សិតទល់នឹងសូន្យ៦-៤ និង៦-៣ក្លាយជាអ្នកលើកពានជើងឯកនៅក្រុងStuttgart នេះ២ឆ្នាំជាប់ៗគ្នា ។ ក្រៅពីការប្រកួតនៅអាល្លឺម៉ង់ នាងក៏មានគម្រោងប្រកួតកម្មវិធីកំដៅសាច់ដុំនៅទីក្រុងរ៉ូម ប្រទេសអុីតាលី និងទីក្រុងម៉ាឌ្រីដប្រទេសអេស្ប៉ាញ ដើម្បីត្រៀមដណ្តើមយកពានជើងឯក French Open នៅចុងខែឧសភាផងដែរ ។ French Open ជាក្របខ័ណ្ឌធំតែមួយគត់ដែល សារ៉ាប៉ូវ៉ា ទើបយកឈ្នះបាន១លើកកាលពីឆ្នាំ២០១២ ប៉ុន្តែការប្រកួតកាលឆ្នាំ២០១៣ នាងធ្វើមិនបានល្អទេ បន្ទាប់ពីបរាជ័យនៅវគ្គផ្តាច់ព្រ័ត្រក្រោមថ្វីដៃកីឡាការិនីអាមេរិកស៊េរីណា វីលៀម ក្នុងលទ្ធផល៦-៤ និង៦-៤ ។
បន្ទាប់ពីបានធ្លាក់ចេញក្នុងជុំទី៤ ក្របខ័ណ្ឌធំ Australian Open កាលពីខែមករាកន្លងមក សារ៉ាប៉ូវ៉ា បាននិយាយថា គោលបំណងរបស់ខ្លួន គឺធ្វើយ៉ាងណា បង្កើនកម្លាំងឡើងវិញក្រោយពីបានធ្លាក់ចុះបន្ទាប់ពីវះកាត់របួសស្មាក្នុងឆ្នាំ២០០៩ ។ ទោះជាយ៉ាងណា ការតាំងចិត្តនោះមិនដូចបំណងរបស់នាងទាំងស្រុងនោះឡើយ ដ្បិតកាលពីខែមីនា នាងបានបរាជ័យធ្លាក់ចេញពីជុំទី៣កម្មវិធី Indian Wells បន្ទាប់ពីចាញ់កីឡាការិនីវ័យ២២ឆ្នាំរបស់អុីតាលី Camila Giorgi ក្នុងលទ្ធផល៦-៣, ៤-៦ និង៧-៥ ។ មកទល់នឹងពេលនេះ ចំណាត់ថ្នាក់ពិភពលោករបស់នាងបានធ្លាក់ពីលេខ២ មកលេខ៧ ។
កីឡាការិនីរូបនេះបានបន្តថា ៖«គោលដៅរបស់ខ្ញុំ គឺស្តារឡើងវិញនូវកម្លាំងកាយ ។ ពេលនេះខ្ញុំអាចឈរប្រកួតបានយូរ ។ ខ្ញុំបានប្រសើរជាងមុនច្រើន តែយ៉ាងណា ខ្ញុំនៅតែត្រូវរៀនសូត្រពីការប្រកួតលើទីលានដីក្រហម ខណៈបច្ចេកទេសប្រកួតមានការខុសគ្នាខ្លះៗ ។ បើវិលទៅគិតពីអតីតកាល ជ័យជម្នះគឺពិតជាសំខាន់ខ្លាំងណាស់សម្រាប់ខ្ញុំ» ។
ការប្រកួតក្នុងកម្មវិធី WTA Porsche Tennis Grand Prix នៅក្រុង Stuttgart ប្រទេសអាល្លឺម៉ង់នឹងត្រូវបញ្ចប់នៅថ្ងៃទី២៨ ខែមេសានេះ ។ កម្មវិធីត្រូវបានចូលរួមដោយម្ចាស់ជើងឯកក្របខ័ណ្ឌធំគ្រប់រូបគឺមានន័យថា ប្រជុំទៅដោយកីឡាការិនីល្បីៗ ។ នាងបានបន្តថា ៖ «កាលពី២ឆ្នាំកន្លងទៅ ខ្ញុំបានមកប្រកួតនៅទីនេះ ហើយដណ្តើមបានជ័យជម្នះទាំង២លើក ។ ដូច្នេះ ខ្ញុំមានអនុស្សាវរីយ៍ល្អណាស់នៅទីនេះ ។ បទពិសោធន៍ល្អបែបនេះ ខ្ញុំមិនចង់ឱ្យខកខាននោះទេ» ។
គួរកត់សម្គាល់ថា ចាប់តាំងពីការលើកពានជើងឯក WTA Porsche Tennis Grand Prixឆ្នាំទៅមិញមកទល់នឹងពេលនេះ សារ៉ាប៉ូវ៉ា មិនទាន់បានយកឈ្នះពានជើងឯកកម្មវិធីណាមួយនៅឡើយទេ ៕
ចែករំលែកព័តមាននេះ