AFP ផ្សាយថា អង្គការផ្នែកស្បៀងអាហារនៃអង្គការសហប្រជាជាតិ បានប្រកាសអាសន្នកាលពីពេល ថ្មីៗកន្លងមកថា ប្រទេសស៊ីរីកំពុងប្រឈមមុខនឹងគ្រោះរាំងស្ងួត ដែលបង្កឱ្យពលរដ្ឋជាច្រើននាក់ស្ថិតក្នុងស្ថានភាពគ្រោះថ្នាក់ និងចាត់ទុកថាជាការរងគ្រោះបន្ថែមពីសង្គ្រាមស៊ីវិលនៅក្នុងប្រទេសដែលអូសបន្លាយពេល៣ឆ្នាំកន្លង ទៅ ។
លោកស្រីអេលីហ្សាប៊ែត ប៊័រ អ្នកនាំពាក្យគម្រោងការស្បៀងអាហារពិភពលោក (WFP) បញ្ជាក់ថា WFP កំពុងបារម្ភថា គ្រោះរាំងស្ងួតរយៈពេលវែង អាចផ្តល់ផលប៉ះពាល់នៅតំបន់ក្នុងភាគឦសាន ពិសេសនៅទីក្រុងអាឡេប អុីឌ្រីប និងហាម៉ា ធ្វើឱ្យដំណាំកសិកម្មនានាខូចខាតទាំងស្រុង ។
លោកស្រីបញ្ជាក់ប្រាប់សារព័ត៌មានថា ប្រសិនបើគ្រោះរាំងស្ងួតនៅតែបន្ត នឹងធ្វើឱ្យប្រជាពលរដ្ឋជាច្រើនលាននាក់ប្រឈមមុខនឹងគ្រោះថ្នាក់ ។ បច្ចុប្បន្នកំពុងមានក្តីបារម្ភបំផុតលើគ្រោះរាំងស្ងួតអាចប៉ះពាល់ដល់ផ្នែកកសិកម្មក្នុងប្រទេសស៊ីរី ព្រោះប្រព័ន្ធធារាសាស្ត្រ និងគ្រឿងចក្រកសិកម្មបានខូចខាតដោយសារសង្គ្រាម ។
បច្ចុប្បន្ន WFP បានជួយសង្គ្រោះដល់ពលរដ្ឋចំនួន៤,៥លាននាក់ នៅប្រទេសស៊ីរី ពីចំនួនប្រជាពលរដ្ឋស៊ីរីដែលកំពុងរងទុក្ខប្រហែល៦,៥លាននាក់ ។ ទោះជាយ៉ាងណាក្តី នៅមិនទាន់កំណត់ច្បាស់ថា អ្នកដែលពឹងផ្អែកលើការឧបត្ថម្ភស្បៀងអាហារ ព្រោះតែគ្រោះរាំងស្ងួតនឹងមានចំនួនប៉ុន្មាននៅឡើយទេ ។ ជាធម្មតា តំបន់ដែលទទួលរងផលប៉ះពាល់របស់ស៊ីរី គឺស្ថិតនៅក្នុងតំបន់ផលិតស្រូវសាឡី ដែលលាតសន្ធឹងជាង៥០% នៃបរិមាណស្រូវសាឡីសរុប ដែលសីុរីផលិតបានក្នុងមួយឆ្នាំ ។
តាមទិន្នន័យរបស់អ្នកជំនាញ UN ឱ្យដឹងថា ទិន្នផលផ្នែកកសិកម្មនៅក្នុងឆ្នាំនេះអាចធ្លាក់ចុះ ប្រហែលពី១,៧ដល់២លានតោន ដោយចាត់ទុកថាជាចំណុចទាបបំផុតនៅក្នុងប្រវត្តិសាស្ត្រ ។ កាលពីឆ្នាំ២០០៨ ស៊ីរីបានប្រឈមមុខនឹងគ្រោះរាំងស្ងួតរួចមកហើយ និងប្រហែល៣ឆ្នាំកន្លងមក ប្រទេសនេះបានធ្លាក់ក្នុងសង្គ្រាមស៊ីវិល បង្កឱ្យមានអ្នកស្លាប់ជាង១៥០.០០០នាក់ និងជំរុញឱ្យជនជាតិស៊ីរីប្រហែល៩លាននាក់ ត្រូវចាកចេញពីលំនៅឋាន ដោយក្នុងចំនួននេះមានប្រហែល២,៦លាននាក់ បានភៀសខ្លួនទៅប្រទេសជិតខាង ៕
ចែករំលែកព័តមាននេះ