ខេត្ដសៀមរាប ៖ កម្មវិធីអង្គរសង្ក្រាន្ដដែលទើបតែរំលងទៅនាពេល ថ្មីៗនេះ ក្រៅពីកម្មវិធីសិល្បៈ និងល្បែងប្រជាប្រិយ បម្រើការកម្សាន្ដសប្បាយរបស់មហាជនជាតិ និងអន្ដរជាតិ មានកម្មវិធី២ទៀតមានការចាប់អារម្មណ៍ខ្លាំងណាស់ដែរ គឺបច្ចេកសិលាឋាន និងការតាំងនំអន្សមយក្ស ។
ខេត្ដសៀមរាប ៖ កម្មវិធីអង្គរសង្ក្រាន្ដដែលទើបតែរំលងទៅនាពេល ថ្មីៗនេះ ក្រៅពីកម្មវិធីសិល្បៈ និងល្បែងប្រជាប្រិយ បម្រើការកម្សាន្ដសប្បាយរបស់មហាជនជាតិ និងអន្ដរជាតិ មានកម្មវិធី២ទៀតមានការចាប់អារម្មណ៍ខ្លាំងណាស់ដែរ គឺបច្ចេកសិលាឋាន និងការតាំងនំអន្សមយក្ស ។
ក្រុមការងារអាជ្ញាធរអប្សរា ក្រុមយុវជនបេតិកភណ្ឌដែលបានចូលរួមវេទិកាយុវជនបេតិកភណ្ឌក្នុងឱកាសកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៧ ឆ្នាំ២០១៣ ក្រុមយុវជនក្រសួងទេសចរណ៍ និងក្រុមការងារមូលនិធិកេរដំណែល ជាអ្នកបង្កើតកម្មវិធីបច្ចេកសិលាឋាន ។ លោកសុខ សង្វារ ប្រធានគ្រប់គ្រងទូទៅផ្នែកសិលាឋានឱ្យដឹងថា ពាក្យបច្ចេកសិលាឋាន មកពីពាក្យ បច្ចេកបូកសិលា(ថ្ម) និងបូកឋាន(កន្លែង) មានន័យថាកន្លែងកែច្នៃថ្មដោយចំណេះសិល្បៈ ។ ក្រុមការងារបានយកទីតាំងមុខប្រាសាទអង្គរវត្ដរៀបចំកម្មវិធីក្នុងបរិវេណទំហំ៣.៥០០ម៉ែត្រក្រឡា បណ្ដោយ១០០ម៉ែត្រ ទទឹង៣៥ម៉ែត្រ ។ នៅផ្នែកខាងមុខបរិវេណមានកំពែងថ្មបាយក្រៀមកម្ពស់ជាង២ម៉ែត្រអមសងខាងខ្លោងទ្វារចូលដែលមានកម្ពស់ប្រហែល៧ម៉ែត្រ និងមានរបងស្លឹកត្នោតហ៊ុមព័ទ្ធជុំវិញ ។
គោលបំណងរៀបចំកម្មវិធីបច្ចេកសិលាឋាន លោកសុខ សង្វារ បញ្ជាក់ថា ដើម្បីផ្ដល់ចំណេះដឹងដល់សាធារណជនជាតិ និងអន្ដរជាតិពីបច្ចេកទេសយកថ្ម និងការប្រើប្រាស់ថ្មកសាងប្រាសាទនិងកិច្ចការអភិរក្សក៏ដូចជាការលើកកម្ពស់តម្លៃបេតិកភណ្ឌ ។ ផ្ដល់ឱកាសឱ្យសាធារណជនបានចូលរួមទស្សនា និងអនុវត្ដជាក់ស្ដែងក្នុងការសាងសង់ និងអភិរក្សប្រាសាទ ។ បង្ហាញពីតួនាទី និងសមិទ្ធផលរបស់អាជ្ញាធរអប្សរាក្នុងការអភិរក្ស និងអភិវឌ្ឍរមណីយដ្ឋានអង្គរប្រកបដោយចីរភាព ។ លើសពីនេះលើកទឹកចិត្ដឱ្យសាធារណជនស្រឡាញ់ និងចូលរួមអភិរក្សបេតិកភណ្ឌដើម្បីអភិវឌ្ឍន៍ និងផ្សព្វផ្សាយឱ្យបានទូលំទូលាយជាលំដាប់ ។ បច្ចេកសិលាឋានមានទីតាំងទស្សនា សំខាន់ៗ គឺរោងពិព័រណ៍គំនូរ និងរូបភាព ។ ទីលានបង្ហាញសកម្មភាពប្រាសាទ ។ រោងអាជ្ញាធរអប្សរា និងទីលានបង្ហាញសកម្មភាពអភិរក្សបេតិកភណ្ឌនាពេលបច្ចុប្បន្ន ។
ចំណែកសមាគមម្ហូបអាហារខ្មែរបានផលិតនំអន្សមយក្សដាក់តាំងនៅមុខប្រាសាទអង្គរវត្ដ ។ ក្រៅពីដាក់តាំងនំប្រពៃណីខ្មែរនេះ ក៏រៀបចំកម្មវិធីប្រកួតទទួលទានផងដែរ ។
កម្មវិធីប្រកួតញ៉ាំនំអន្សមយក្សមានបេក្ខជនចូលរួមចំនួន៥០នាក់ បែងចែកជា៥ក្រុម ដោយជ្រើសរើសជ័យលាភីចំនួន៣នាក់ ។
បេក្ខជនឈ្មោះកែម ទិព្វ ជាប់ចំណាត់ថ្នាក់លេខ១ ដោយបរិភោគនំអន្សមអស់ចំនួន២.៨៧០ក្រាម ទទួលបានប្រាក់រង្វាន់៤០ម៉ឺុនរៀល និង១០០ដុល្លារអាមេរិក ។ ជ័យលាភីលេខ២បានទៅលើឈ្មោះហាក់ រិទ្ធី បរិភោគនំអន្សមអស់ចំនួន២.៧៦២ក្រាម ទទួលបានប្រាក់រង្វាន់៣០ម៉ឺុនរៀល និង១០០ដុល្លារអាមេរិក ។ ចំណាត់ថ្នាក់លេខ៣បានទៅលើឈ្មោះចូវ មករា បរិភោគអន្សមអស់ចំនួន២.៧០០ក្រាម ទទួលបានប្រាក់រង្វាន់២០ម៉ឺុនរៀលនិង១០០ដុល្លារអាមេរិក ។ នេះជាលើកទី១ហើយដែលកម្ពុជាធ្វើនំអន្សមមានទម្ងន់រហូតដល់ទៅ២តោន ប្រវែង៥ម៉ែត្រ ទទឹង១ម៉ែត្រ និងកម្ពស់១ម៉ែត្រ ។
លោកចាន់ សុភា អ្នកសម្របសម្រួលសមាគមចុងភៅនៃការធ្វើនំអន្សមយក្សឱ្យដឹងថា នំនេះធ្វើពីអង្ករដំណើប សណ្ដែកបាយ និងសាច់ជ្រូក២តោន ដោយចំណាយអស់ប្រាក់ចំនួន៧.៥០០ដុល្លារ ។
ក្រុមការងារបានស្រាយនំអន្សមយក្ស ហើយចែកជូនមហាជន ម្នាក់បន្ដិចៗទទួលទានឱ្យស្គាល់រសជាតិផងដែរ ។
អ្នកទេសចរជាតិនិងអន្ដរជាតិច្រើនកុះករចាប់អារម្មណ៍ចូលរួមទស្សនាកម្មវិធីបច្ចេកសិលាឋាន និងការតាំងបង្ហាញ និងប្រកួតទទួលទាននំអន្សមយក្ស ។ អ្នកទេសចរជាច្រើននិយាយស្រដៀងគ្នាថា ពួកគេរីករាយក្នុងការទស្សនាកម្មវិធីទាំង២នេះ ។ ពួកគេចាត់ទុកកម្មវិធីបច្ចេកសិលាឋាន និងការតាំងនំអន្សមយក្សជាកម្មវិធីដ៏លេចធ្លោក្នុងអង្គរសង្ក្រាន្ដ ៕
ចែករំលែកព័តមាននេះ