ខេត្តកំពង់ចាម ៖ ក្រុមយុវជនចំនួន២ក្រុម បានដេញវាយតប់គ្នាទៅវិញទៅមក ក្នុងតំបន់រមណីយដ្ឋានតាព្រហ្ម ស្ថិតនៅស្រុកស្នួល ខេត្តក្រចេះ កាលពីវេលាប្រហែលជាងម៉ោង៤ រសៀល ថ្ងៃទី ១៥ មេសាត្រូវនឹងថ្ងៃចូលឆ្នាំប្រពៃណីជាតិ ចំថ្ងៃកណ្តាល ។ គ្រានោះត្រូវបានកម្លាំងសមត្ថកិច្ចចុះទៅអន្តរាគមន៏រហូតដល់មានផ្ទុះអាវុធ ជាហេតុបណ្តាលឲ្យត្រូវចំក្រោមដោះស្តាំបុរសម្នាក់ឈ្មោះ ណាក់ ណុចអាយុ ២៤ ឆ្នាំ មានទីលំនៅភូមិសំរោង ឃុំខ្សឹម ស្រុកស្នួល ចំនួន១គ្រាប់បៀមគ្រាប់ បណ្តាលឲ្យរងរបួសធ្ងន់ ត្រូវបានប្រពន្ធដឹកមកសង្រ្គោះជាបន្ទាន់ នៅមន្ទីរពេទ្យបង្អែកខេត្តកំពង់ចាម ។
តាមបុរសរងគ្រោះឈ្មោះណុច ប្រាប់ឲ្យដឹងនៅក្នុងមន្ទីរពេទ្យខេត្តថា នៅពេលរដូវបុណ្យចូលឆ្នាំនេះតំបន់រមណីយដ្ឋានតាព្រហ្ម ក្នុងស្រុកស្នួលមានមនុស្សម្នារជាច្រើនបាននាំគ្នា ទៅលេងកំសាន្តជាលក្ខណៈគ្រួសារឫមិត្តភក្តិទៅជាក្រុម ដោយមានតាំងពីពេលព្រឹករហូតដល់ពេលល្ងាច ដើម្បីស្រូបយកខ្យល់អាកាសនៅទីនោះ ។
បុរសរងគ្រោះឈ្មោះ ណុច ប្រាប់បន្តថា រហូតដល់វេលាម៉ោងជាង ៤ រសៀលថ្ងៃទី ១៥ មេសាត្រង់ចំណុចដែលគាត់អង្គុយលេងនោះ ស្រាប់តែឃើញមានក្រុមយុវជនចំនួន២ក្រុម ដេញវាយតប់គ្នាទៅវិញទៅមកដោយមិនដឹងថា ក្រុមណាវាយលើក្រុមណាមួយនោះទេ ។ បន្ទាប់មកគាត់បានរត់ទៅមើលកៀកបន្តិចក្រោយមកក្រុមជម្លោះនាំគ្នារត់ប្រសាចប្រាសយកអាយុរាងៗខ្លួន ដោយសារតែកម្លាំងសមត្ថកិច្ចដេញតាមចាប់ ។ គាត់អះអាងថា គ្រាន់តែទៅឈរមើលគេលុះពេលឃើញ គេរត់បែបនេះក៏រត់ដែរទៅខ្លាចគេចាប់ច្រឡំ គ្រាន់តែរត់ចេញមិនបានប៉ុន្មានផង សង្ស័យមន្រ្តីនគរបាលម្នាក់ប្រដាប់ដោយអាវុធខ្លីដេញតាមក្រោយ ស្រែកឲ្យឈប់ហេតុតែគាត់(ណាក់ ណុច ) មិនព្រមឈប់នោះក៏បាញ់ត្រូវ១គ្រាប់ចំក្រោមដោះស្តាំ ជាហេតុបណ្តាលឲ្យត្រូវរបួសធ្ងន់ដួលទៅលើដី ។ នាល្ងាចថ្ងៃដដែលនោះត្រូវបានប្រពន្ធនាំមកសង្រ្គោះនៅមន្ទីរពេទ្យបង្អែកស្រុកស្នួល តែដោយសារស្ថានភាពរបួសមានលក្ខណៈធ្ងន់ពេកក៏ដឹកមកសង្រ្គោះនៅមន្ទីរពេទ្យបង្អែកខេត្តកំពង់ចាម ។
លោកឧត្តមសេនីយ៏ត្រី ជួង ស៊ាងហាក់ ស្នងការនគរបាលខេត្តក្រចេះ មានប្រសាសន៏ឲ្យដឹងដែរថាចំពោះហេតុការណ៏ខាងលើ តំបូងមានក្មេងចំនួន២ក្រុមបានផឹកស្រា ស្រវឹងបង្កជម្លោះវាយគ្នាទៅវិញទៅមកហើយត្រូវបានកម្លាំងនគរបាលចំនួន៤នាក់ ដែលរក្សាសណ្តាប់ធ្នាប់នៅទីនោះមកអន្តរាគមន៏ដោយបាញ់បង្ហើរឡើងលើ១គ្រាប់ ចាប់បានម្នាក់បញ្ជូនមកអធិការដ្ឋាននគរបាលស្រុកស្នួល ។បន្ទាប់មកទៀតឃើញមនុស្ស៤ទៅ៥នាក់ រត់ហើយមន្រ្តីអាវុធហត្ថឈ្មោះ សេង ចាន់ថន នៅស្នាក់ការ៧០៨ស្រែថ្មី បានរត់ដេញតាមពីក្រោយ ហើយបាញ់២គ្រាប់បណ្តាលឲ្យត្រូវ ឈ្មោះ ណុច ១គ្រាប់ ត្រូវបានបញ្ជូនមកសង្រ្គោះនៅមន្ទីរពេទ្យបង្អែកស្រុកស្នួល ដោយសារតែគ្រាប់បៀម ហូរឈាមច្រើនបញ្ជូនមកសង្រ្គោះនៅមន្ទីរពេទ្យបង្អែកខេត្តកំពង់ចាម និងបន្តទៅមន្ទីរពេទ្យកាល់ម៉ែត្រ រាជធានីភ្នំពេញ ។
ករណីនេះត្រូវបានប្រពន្ធរបស់មន្រ្តីអាវុធហត្ថ ដែលមានភាគហ៊ុនរមណីយដ្ឋានតាព្រហ្ម បានឡើងទៅជួបគ្រួសារជនរងគ្រោះដល់ភ្នំពេញ ដោយបានជួយលុយចំនួនជាង ២.០០០ ដុល្លារ ដើម្បីព្យាបាលរបួសករណីនេះ កំពុងតែឲ្យមន្រ្តីជំនាញចាត់ការ តាមនីតិវិធីច្បាប់ហើយដែរ ។
ចែករំលែកព័តមាននេះ