ខេត្តបន្ទាយមានជ័យ ៖ ប្រជាពលរដ្ឋជាង១០០គ្រួសារ មកពីភូមិកំព្រីង សង្កាត់ភ្នៀត ក្រុងសេរីសោភ័ណ បាននាំគ្នាប្រមូលផ្តុំធ្វើបាតុកម្មកាលពីរសៀលថ្ងៃទី១៨ មេសា ២០១៤ ប្រឆាំងនឹងប្រធានសហគមន៍ភ្នៀត ថាបានប្រព្រឹត្តអំពើពុករលួយ ឃុបឃិតគ្នាជាមួយអាជ្ញាធរ និង មន្រ្តីជលផល លក់ព្រំអន្លង់អភិរក្សអោយទៅក្រុមបក្ខពួករបស់ខ្លួនរកស៊ីផ្តាច់មុខក្នុងតម្លៃថ្លៃកប់ពពក ដែលជាហេតុធ្វើអោយប្រជាពលរដ្ឋ រស់នៅក្នុងភូមិដាច់បាយ មិនអាចរកស៊ីនេសាទត្រីក្នុងស្ទឹងជាលក្ខណៈគ្រួសារបាន។
អ្នកស្រី អៀ យង់ និងអ្នកស្រី ខឹម មន្ថា មានប្រសាសន៏ថា ប្រជាពលរដ្ឋ មិនអាចស៊ូទ្រាំនឹងទង្វើរបស់ប្រធានសហគមន៍ភ្នៀតបានឡើយ ដោយសារប្រធានសហគមន៍រូបនោះ ប្រព្រឹត្តអំពើពុករលួយ គឺលក់ ព្រំប្រទល់ អន្លង់អភិរក្ស អោយទៅបុគ្គលឯកជន រកស៊ីផ្តាច់មុខក្នុងតម្លៃ២លាន៥ម៉ឺនរៀល ។ អ្នកស្រីបន្តទៀតថា នៅក្នុងសហគមន៍របស់អ្នកស្រីមានអន្លង់អភិរក្ស ចំនួន៥អន្លង់ ប៉ុន្តែ៣អន្លង់ត្រូវគេដេញថ្លៃអស់ហើយ នៅសល់តែ២អន្លង់ទៀតប៉ុណ្ណោះ អន្លង់ទី១ តម្លៃជាង២លានរៀល អន្លង់ទី២ តម្លៃ ៦០ម៉ឺន និងទី៣តម្លៃ៧០ម៉ឺន ។ ការដេញថ្លៃបែបនេះ ប្រជាពលរដ្ឋក្រីក្ររកព្រឹក ខ្វះល្ងាចគ្មានលទ្ឋភាព អាចបង់ប្រាក់ជូនសហគមន៍បានទេ មានតែលើកគ្នាធ្វើបាតុកម្ម សុំអោយរំលាយចោលនូវការដេញថ្លៃ និងសុំអោយផ្លាស់ប្តូរប្រធានសហគមន៍ពុករលួយចេញពីតំណែងតែម្តង។
លោក ម៉ៅ រើម មេភូមិកំព្រីង មានប្រសាន៍អោយដឹងដែរថា ពិតជាមានការដេញថ្លៃព្រំប្រទល់អន្លង់អភិរក្សពិតប្រាកដមែន គឺប្រធានសហគមន៍ សង្កាត់ភ្នៀត ឃុបឃិតគ្នា ជាមួយចៅសង្កាត់រង ដាក់អោយឈ្មួញដេញថ្លៃផ្តាច់មុខ ធ្វើអោយប្រជាពលរដ្ឋមានការក្តៅក្រហាយ មិនសប្បាយចិត្តនាំគ្នាទៅតវ៉ានៅមុខសហគមន៍តែម្តង ដើម្បីរកដំណោះស្រាយ។
លោក ស្រី តាំង កួយ ប្រធានសហគមន៍ ភ្នៀត ដែលរងការចោទប្រកាន់ មិនបានចេញពីផ្ទះមកជួបនឹងក្រុមអ្នកភូមិឡើយ ដោយអ្នកស្រីប្រាប់អ្នកយកព័ត៍មានថា គ្មានការលក់ដូរ ឬ ដេញថ្លៃអន្លង់អភិរក្ស អ្វីទាំងអស់ ប៉ុន្តែអ្នកស្រីឆ្លើយត្រឡប់ត្រឡិនថា សហគមន៍ធ្វើបែបនេះ គឺដោយសារគាត់គ្មានប្រាក់ខែ មានតែដេញថ្លៃអោយទៅបុគ្គលទេ ទើបបានប្រាក់គ្រាន់មកទ្រទ្រង់សហគមន៍ ។
យ៉ាងណាកដៅយ បាតុកម្មត្រូវបានរំសាយទៅវិញនៅរសៀលថ្ងៃដដែល បន្ទាប់ពីចៅសង្កាត់រងទី១ ភ្នៀត និង អ្នក ស្រី តាំង កួយ យល់ព្រមតាមសំណើរបស់ប្រជាពលរដ្ឋ រំសាយចោលការដេញថ្ងៃ អន្លង់អភិរក្ស ហើយអនុញ្ញាតិអោយប្រជាពលរដ្ឋទូទៅ អាចរកស៊ីទទួលទានជាលក្ខណៈ គ្រួសារដូចដើមវិញ ៕
ចែករំលែកព័តមាននេះ