ខេត្តកំពត ៖ កាលពីថ្ងៃទី១៩ មេសា កន្លងមកនេះ កម្លាំងការិយាល័យកណ្ដាលនគរបាលព្រហ្មទណ្ឌខេត្ត ដោយបានការបញ្ជាពីលោកឧត្តមសេនីយ៍ត្រី ថ្លាង ភិរិន្ទ ស្នងការនគរបាលខេត្ត លោកឧត្តមសេនីយ៍ត្រី ម៉ៅ ច័ន្ទមៈធុរិទ្ធ ស្នងការរង និងជានាយការិយាល័យកណ្ដាលនគរបាលព្រហ្មទណ្ឌ រួមជាមួយលោកវរសេនីយ៍ទោ គង់ សុខន នាយការិយាល័យព្រហ្មទណ្ឌកម្រិតធ្ងន់ បានដឹកនាំកងកម្លាំង និងនាំខ្លួនជនជាប់ចោទឈ្មោះយ៉ុន ប៊ុន្នី ដែលសម្លាប់ស្រីស្នេហ៍ ទៅធ្វើកាយវិកានៅកន្លែងកើតហេតុពីសកម្មភាពសម្លាប់ស្រីស្នេហ៍របស់ខ្លួន ។
សូមបញ្ជាក់ថា សពស្ត្រីរងគ្រោះត្រូវបានជនល្មើសយកទៅប្លុងចោលនៅក្រោមស្ពានស្ទឹងចារឹក ស្ថិតក្នុងភូមិស្រែលា ឃុំត្រពាំងភ្លាំង ស្រុកឈូក កាលពីថ្ងៃទី១៥ មេសា ហើយជនល្មើសត្រូវសមត្ថកិច្ចស្រាវជ្រាវចាប់ខ្លួនបាននៅថ្ងៃទី១៦ មេសា តាមរយៈទូរស័ព្ទដែលជ្រុះក្បែរសព ។ ជនឈ្មោះយ៉ុន ប៊ុន្នី អាយុ៣១ឆ្នាំ ជាទន្តបណ្ឌិត(ពេទ្យធ្មេញ) នៅក្រុងភ្នំពេញ មានស្រុកកំណើតនៅភូមិដំរីលេង ឃុំទទង់ ស្រុកដងទង់ បានសារភាពប្រាប់សមត្ថកិច្ចថា ខ្លួនពិតជាបានសម្លាប់ស្រីស្នេហ៍របស់ខ្លួនប្រាកដមែនឈ្មោះកែវ ស្រីមុំ អាយុ២៨ឆ្នាំ ស្នាក់នៅផ្ទះលេខ១៤ ក្រុមទី២២ ភូមិទី៤ ផ្លូវលេខ៤៦០ ខណ្ឌចំការមន រាជធានីភ្នំពេញ មានមុខរបរជាអ្នករកសីុរាប់លុយនៅផ្សារទួលទំពូង និងផ្សារបឹងកេងកង ។
ក្រោយពីសមត្ថកិច្ចធ្វើការសាកសួរ ជននេះបានសារភាពពីសកម្មភាពសម្លាប់ស្រីស្នេហ៍របស់ខ្លួនប្រាប់សមត្ថកិច្ច ព្រមទាំាំងនាំទៅចង្អុលបង្ហាញកន្លែងធ្វើសកម្មភាពទៀតផង ។ ប៉ុន្តែមុននឹងឈានទៅសម្លាប់ស្រីស្នេហ៍របស់ខ្លួន ជនជាប់ចោទបានលើកពីហេតុផលដំបូងជូនសមត្ថកិច្ចជាហូរហែឱ្យដឹងថា ខ្លួនស្គាល់ស្ត្រីរងគ្រោះតាមរយៈការទៅព្យាបាលធ្មេញ ។ ក្រោយមកក៏មានទំនាក់ទំនងគ្នាជាបន្តបន្ទាប់ រហូតនាំគ្នាទៅហូបចំណីអាហារនៅក្នុងហាងជាមួយគ្នាជាញឹកញាប់ទើបឈានទៅដល់ការនាំគ្នាទៅដេកនៅផ្ទះសំណាក់ ។ ចាប់តាំងពីបានស្គាល់រាប់អានគ្នាអស់រយៈពេលជាង៣ខែមក ទោះបីស្ត្រីរងគ្រោះមានចិត្តស្រឡាញ់មកលើខ្លួនខ្លាំងរហូតដល់ទិញទូរស័ព្ទទំនើប និងនាឡិកាដៃ ព្រមទាំងសម្ភារ និងលុយកាក់ផ្ដល់មកឱ្យខ្លួនយ៉ាងណាក្ដី ក៏ខ្លួននៅតែតាំងចិត្តថាស្រឡាញ់ស្ត្រីរងគ្រោះក្នុងនាមជាមិត្តភក្ដិប៉ុណ្ណោះ មិនមានចិត្តថាជាប្ដីប្រពន្ធទេ ពីព្រោះនាងមានចរិតកាចពេក មិនអាចយកធ្វើជាគូអនាគតបានទេ ។
បុរសជាឃាតករបានសារភាពទៀតថា ស្ត្រីរងគ្រោះមានចរិតឆេវឆាវណាស់ មានពេលខ្លះទូរស័ព្ទរំខានពេលម៉ោងធ្វើការក្នុងគ្លីនិកជាញឹកញាប់ បើមិនចេញទៅជួបទេគឺអាងគំរាមមិនទុកមុខទុកមាត់ឱ្យទេ បានន័យថា ទៅរំខានដល់កន្លែងធ្វើការ ។ ក្នុងចិត្តរបស់នាងស្រឡាញ់ខ្លួនខ្លាំង តែចំពោះខ្លួនមិនបានស្រឡាញ់ដូចដែលនាងគិតទុកនោះទេ ។ នៅថ្ងៃទី១៤ មេសា នាងបានបបួលខ្លួនទាំងបង្ខំចិត្តឱ្យជូននាងទៅលេងនៅភ្នំឧដុង្គ ។ លុះល្ងាចឡើងវិលមកភ្នំពេញវិញខ្លួនបានទៅដេកនៅផ្ទះរបស់ខ្លួន រីឯនាងក៏បានទៅដេកផ្ទះរបស់នាងវិញដែរ ។ លុះព្រឹកឡើងនាងបានហៅខ្លួនឱ្យជូនទៅខេត្តកំពតដើម្បីទៅលេងស្រុកកំណើត តែរូបគេបានប្រកែកមិនព្រមជូនទៅ ព្រោះមិនចង់ឱ្យនាងស្គាល់ផ្ទះស្គាល់ភូមិ របស់ខ្លួន ។
ក្រោយពីនាងនៅតែបង្ខំឱ្យជូនទៅផ្ទះរបស់ខ្លួនបែបនេះ ខ្លួនក៏ព្រមជូននាងមកខេត្តកំពតទាំងខឹងសម្បាក្នុងចិត្ត ព្រមទាំងបើករថយន្តរបស់នាងមក តាមផ្លូវមិននិយាយស្ដីរកគ្នាទេ ។ ពេលធ្វើដំណើរមកដល់ទឹកដីខេត្តកំពត ខ្លួនក៏បត់រថយន្តចូលតាមផ្លូវក្រួសក្រហម(ផ្លូវចូលទៅដូនសយ) លុះជិតដល់វត្តច្បារអំពៅ ខាងកើតវត្តជាង២០០ម៉ែត្រ ខ្លួនក៏បត់រថយន្តចូលផ្លូវក្រួសក្រហមខាងឆ្វេងដៃ ដែលតាមបណ្ដោយសងខាងផ្លូវមានចម្ការស្វាយចន្ទី ហើយផ្លូវនេះស្ងាត់ណាស់គ្មានឃើញមនុស្សណាម្នាក់ធ្វើដំណើរទេ ល្ងាចថ្ងៃទី១៥ មេសា ។ កន្លែងនេះស្ថិតនៅក្នុងភូមិចក្រីទីង ឃុំព្រៃព្នឹង ស្រុកទឹកឈូ ។
ឃាតករសារភាពថា ដោយឃើញសភាពស្ងាត់នាងសួរខ្លួនថា យ៉ាងមេចបានជាមកផ្លូវស្ងាត់ដូច្នេះ ហើយខ្លួនប្រាប់ថា ទៅផ្ទះម្ដាយមីងរបស់ខ្លួននៅខាងមុខនោះ ដែលពេលនោះថ្ងៃកាន់តែជ្រេជិតលិចទៅហើយ ។
លុះបើករថយន្តទៅមុខបានប្រហែល៥០ម៉ែត្រពីកន្លែងនាងសួរខ្លួននោះក៏ឈប់រថយន្តរួចនាងសួរថា «មេ៉ចឈប់កន្លែងហ្នឹង អ្នកឯងចង់សម្លាប់ខ្ញុំឬ?» ឯខ្លួននិយាយតបវិញថា នាងឯងដឹងថា ខ្ញុំជាមនុស្សកាចទេ? នាងឆ្លើយថា បើកាចប្រុងសម្លាប់ខ្ញុំឬ? បើឯងហ៊ានសម្លាប់ខ្ញុំសម្លាប់មកចុះ! រួចខ្លួននិយាយតបទៅនាងវិញថា នាងឱ្យខ្ញុំសម្លាប់ទេណា ខ្ញុំសម្លាប់ហើយ ពេលនិយាយបណ្ដើរខ្លួនបានចាប់ទាញសក់នាងមកក្រោយផ្ទប់នឹងកៅអីរថយន្ត រួចក៏ចាប់មួលកនាងសង្កត់នឹងកៅអីរថយន្តរហូតនាងឈប់ត្រដរខ្យល់ ខ្លួនក៏ទាញខ្សែក្រវាត់នីឡុងពាក់កាតធ្វើការមករឹតករហូតដល់នាងលែងកម្រើក ទើបបីនាងដាក់ក្នុងឃ្លុបគូទរថយន្តរួចបើករថយន្ត ចេញទៅមុខទៀត ។ បើកចេញបានប្រហែលជា២០០ម៉ែត្រខ្លួនបានឈប់រថយន្តមួយសន្ទុះ ពីព្រោះខ្លួនហត់ពេកក្រោយពេលប្រវាយប្រតប់គ្នាអស់ពីកម្លាំងកាយ ។
ជនជាប់ចោទរៀបរាប់ទៀតថា ក្រោយពីឈប់មួយសន្ទុះបាត់ហត់ ក៏បើករថយន្តចេញដំណើរទៅមុខដើម្បីរកកន្លែងស្ងាត់នឹងទម្លាក់សពចោល ។ ការដឹកសពចេញទៅរកកន្លែងទម្លាក់ចោលនោះ គឺបើករថយន្តចម្ងាយដីរាប់សិបគីឡូម៉ែត្រ ត្រឡប់ចុះត្រឡប់ឡើង ទម្រាំនឹងហ៊ានទម្លាក់សពចេញពីរថយន្ត ។ ម៉ោងប្រហែល៦ល្ងាចមេឃងងឹតបន្តិចហើយ ខ្លួនក៏បើករថយន្តមកដល់ចំណុចស្ពានបេឡេត៍ឆ្លងកាត់ស្ទឹងមួយគេហៅស្ទឹងចារឹក ឆ្លងស្ពាននេះហួសមកខាងជើងស្ពានបានបន្តិច ឃើញកន្លែងនេះមានសភាពស្ងាត់ ក៏បត់រថយន្តបើកមកលើស្ពានវិញ បើកហួសគល់ស្ពានបន្តិចក៏ឈប់រថយន្តលើស្ពាន រួចបើកឃ្លុបគូទរថយន្តបីសពចេញបោះទម្លាក់ទៅក្រោមស្ពានតែម្ដង ។ ដោយសារទឹកស្ទឹងមានតិច សពធ្លាក់ទៅលើគោក រួចខ្លួនបានបើករថយន្តចេញទៅភ្នំពេញវិញទាំងយប់ ។ លុះបើកទៅដល់ភ្នំពេញហើយ ខ្លួនបានយករថយន្តមកប្លុងចោលនៅផ្លូវភ្នំពេញ-ហាណូយ ក្នុងខណ្ឌសែនសុខ ហើយក៏បានធ្វើដំណើរមកផ្ទះនៅឯខេត្តកំពតវិញ ។
លោកឧត្តមសេនីយ៍ត្រី ម៉ៅ ច័ន្ទមៈធុរិទ្ធ ស្នងការរងនគរបាលខេត្ត មានប្រសាសន៍ថា នៅល្ងាចថ្ងៃទី២០ មេសា ជនជាប់ចោទត្រូវបានបញ្ជូនទៅតុលាការដើម្បីចាត់ការតាមនីតិវិធី និងបានឃុំខ្លួននៅពន្ធនាគារ ។ រីឯរថយន្តនារីរងគ្រោះបានរក្សាទុកនៅស្នងការដ្ឋាននគរបាលខេត្ត ។ លោកឧត្តមសេនីយ៍ឱ្យដឹងថា ការឈានទៅចាប់ខ្លួនជនជាឃាតករនេះបាន ដោយសារតែទូរស័ព្ទរបស់ស្ត្រីរងគ្រោះដែលជ្រុះនៅក្បែរសពទើបធ្វើការស្រាវជ្រាវតាមរយៈទូរស័ព្ទនោះក៏កំណត់បានមុខសញ្ញាជនជាប់ចោទដែលកំពុងរកព្រះសង្ឃស្រោចទឹកក្នុងវត្ត៕
ចែករំលែកព័តមាននេះ