រាជធានីភ្នំពេញ ៖ ផ្លូវលេខ១០០៣ស្ថិតក្នុងសង្កាត់ភ្នំពេញថ្មី ខណ្ឌសែនសុខ ដែលសាលារាជធានីភ្នំពេញបើកការដ្ឋានស្ថាបនាជាប្រភេទផ្លូវបេតុងមានទទឹង១២ម៉ែត្រ បណ្តោយ២០៦០ម៉ែត្រតភ្ជាប់ពីប្រឡាយអូអាគុជដល់ផ្លូវឧកញ៉ាម៉ុងរិទ្ធី រួមទាំងការដាក់ប្រព័ន្ធលូមេថ្មីទំហំមុខកាត់១ម៉ែត្រកន្លះតាំងពីពាក់កណ្តាលខែវិច្ឆិកា ២០១៣ រហូតមកដល់ពេលនេះនៅមិនទាន់រួចរាល់នៅឡើយទេ ដែលភាពយឺតយ៉ាវនេះដោយសារមានផលប៉ះពាល់ទៅនឹងរបងផ្ទះជញ្ជាំងផ្ទះដែលលយចូលមកលើដីចំណីផ្លូវសាធារណៈ បង្គោលភ្លើង ឬសំយ៉ាបផ្ទះជាដើម តែទោះជាយ៉ាងណាអាជ្ញាធររាជធានីភ្នំពេញបានសំណូមពរឱ្យប្រជាពលរដ្ឋដែលទទួលរងផលប៉ះពាល់ទាំងនោះមានការយោគយល់ផង។
តំណាងក្រុមហ៊ុន BBE ដែលម៉ៅការស្ថាបនាផ្លូវលេខ១០០៣នោះបានឱ្យដឹងថា ផ្លូវលេខ១០០៣ ត្រូវបានស្ថាបនាជាប្រភេទផ្លូវបេតុង មានទទឹង១២ម៉ែត្រ បណ្តោយ២០៦០ម៉ែត្រតភ្ជាប់ពីប្រឡាយអូអាគុជដល់ផ្លូវឧកញ៉ាម៉ុង រិទ្ធី ដែលបានបើកការដ្ឋានស្ថាបនាតាំងពីពាក់កណ្តាលខែវិច្ឆិកា ឆ្នាំ២០១៣ រួមទាំងការដាក់ប្រព័ន្ធលូមេថ្មីទំហំមុខកាត់១ម៉ែត្រកន្លះផងដែរ។
ការស្ថាបនាផ្លូវនេះមានភាពយឺតយ៉ាវដោយសារមានផលប៉ះពាល់ដូចជារបងផ្ទះ ជញ្ជាំងផ្ទហដែលលយចូលមកលើដីចំណីផ្លូវសាធារណៈ បង្គោលភ្លើង ឬសំយ៉ាបផ្ទះជាដើម ។ បញ្ហានេះអាជ្ញាធរក៏ដូចមន្ទីរជំនាញបានជួបប្រជុំជាមួយប្រជាពលរដ្ឋដែលមានផលប៉ះបាល់ជាច្រើនលើកច្រើនសារ និងមានប្រជាពលរដ្ឋមួយចំនួនបានចូលរួមសហការ តែក៏មានប្រជាពលរដ្ឋមួយចំនួនហាក់ធ្វើព្រងើយមិនអើពើសោះ។
ពេលនេះក្រុមហ៊ុនកំពុងធ្វើការជួសជុលកែលំអជាបន្ទាន់នៅត្រង់ចំណុចកាត់ទទឹងផ្លូវលេខ១៩៨៦ដើម្បីសម្រួលដល់ការធ្វើចរាចរណ៍របស់ប្រជាពលរដ្ឋក្រោយពីកាត់ផ្តាច់ដាក់បំពង់លូ។
ទាក់ទិននឹងផលប៉ះពាល់ការស្ថាបនាផ្លូវខាងលើនេះមន្ត្រីសាលារាជធានីភ្នំពេញបានសំណូមពរដល់ប្រជាពលរដ្ឋដែលមានលំនៅឋានអមសងខាងផ្លូវ១០០៣ដែលត្រូវស្ថាបនានេះសូមឱ្យមានការយោគយល់ចំពោះផលប៉ះពាល់នានាលើគម្រោងពង្រីកផ្លូវនេះ ដូចជារបងផ្ទះ ជញ្ជាំងផ្ទះដែលលយចូលទៅលើដីចំណីផ្លូវសាធារណៈ បង្គោលភ្លើង ឬសំយ៉ាបផ្ទះជាដើមដែលធ្វើឱ្យការពង្រីកផ្លូវជួបឧបសគ្គ និងបង្កឱ្យមានភាពយឺតយ៉ាវ៕
ចែករំលែកព័តមាននេះ