ខេត្តកណ្តាល ៖ យុវជនម្នាក់បានរងរបួសធ្ងន់ ខណៈពេលកំពុងរាំធុងបាស់ត្រូវយុវជនម្នាក់ទៀតយកកូនកាំបិតចាក់ បន្ទាប់ពីពួកគេមានទំនាស់គ្នាពីរឿងលេងជះទឹកនៅក្នុងវត្ត កាលពីវេលាម៉ោង៤និង៣០នាទីរសៀល ថ្ងៃទី១៨ មេសា ២០១៤ នៅក្នុងបរិវេណវត្តព្រែកទន្លាប់ ភូមិព្រែកបាក់ ឃុំព្រែកទន្លាប់ ស្រុកលើកដែក ហើយជនដៃដល់ត្រូវសមត្ថកិច្ចឃាត់ខ្លួនភ្លាមៗដែរ។
ជនរងគ្រោះឈ្មោះថា សុខខេង ភេទប្រុស អាយុ១៨ឆ្នាំ រស់នៅភូមិ-ឃុំកើតហេតុខាងលើ ចំណែកជនដៃដល់ឈ្មោះឡុង ភក្តី ភេទប្រុស អាយុ២៤ឆ្នាំ រស់នៅភូមិកំពង់ចម្លង ឃុំព្រែកទន្លាប់ ស្រុកលើកដែកដូចគ្នា។
សមត្ថកិច្ចបានឱ្យដឹងថា មុនពេលកើតហេតុជនរងគ្រោះ និងជនដៃដល់បានលេងជះទឹកដាក់គ្នានៅក្នុងបរិវេណវត្តព្រែកទន្លាប់ ក៏កើតជាទំនាស់ពាក្យសម្តីដាក់គ្នា។ លុះដល់ពេលយប់ក្នុងវត្តមានចាក់ធុងបាស់រាំ ជនរងគ្រោះក៏បានចូលទៅរាំលេង ពេលកំពុងរាំស្រាប់តែជនដៃដល់ចូលទៅរាំដែរហើយបានដកកាំបិតចុងស្រួចសាំងគីមចាក់ទៅលើជនរងគ្រោះមួយកាំបិតចំខ្នងខាងក្រោយបណ្តាលឱ្យរងរបួសតែម្តង។
ក្រោយកើតហេតុជនរងគ្រោះត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យ ចំណែកជនសង្ស័យត្រូវសមត្ថកិច្ចឃាត់ខ្លួនភ្លាមៗដែរ៕
ចែករំលែកព័តមាននេះ