ទូរទស្សន៍រុស្ស៊ីរាយការណ៍ថា មនុស្ស៥នាក់បានត្រូវស្លាប់ក្នុងការបាញ់តគ្នានៅទីក្រុងស្លាវីយ៉ានស្ក៍ ជាទីក្រុងមួយស្ថិតនៅភាគខាងកើតអ៊ុយក្រែនកាន់កាប់ត្រួតត្រាដោយកងកម្លាំងបំបែកខ្លួននិយមសិ្នទ្ធរុស្ស៊ី ។
យោងតាមទូរទស្សន៍ RUSSIA=24 ថា ការប៉ះទង្គិចគ្នានោះកើតមានត្រង់ច្រកចូលទៅកាន់បារ៉ាស់មួយដាក់ដោយកងកម្លាំងស្និទ្ធរុស្ស៊ី ។ ក្នុងចំណោមអ្នកស្លាប់ទាំង៥នាក់ ៣នាក់ជាពួកបំបែកខ្លួននិយមស្និទ្ធរុស្ស៊ី ហើយ២នាក់ស្ថិតក្នុងក្រុមដែលធ្វើការវាយលុកប្រឆាំងបារ៉ាស់ត្រួតពិនិត្យនោះ ។
សេតវិមានកាលពីថ្ងៃទី១៨ មេសាកន្លងមកនេះបានគំរាមដាក់ទណ្ឌកម្មថែមទៀតប្រឆាំងរុស្ស៊ី ប្រសិនបើប្រទេសមហាអំណាចនេះពុំអាចជួយធ្វើឱ្យមានភាពធូរស្រាលនៅភាគខាងកើតអ៊ុយក្រែនទេនោះ ។
សហរដ្ឋអាមេរិក សហភាពអឺរ៉ុប រុស្ស៊ី និងអ៊ុយក្រែន កាលពីថ្ងៃទី១៧ មេសា បានចុះហត្ថលេខាលើកិច្ចព្រមព្រៀងមួយនៅក្រុងហ្សឺណែវ ដើម្បីសម្រាលភាពតានតឹងនៅភាគខាងកើតអ៊ុយក្រែន ដែលនៅទីនោះពួកសកម្មជនស្និទ្ធរុស្ស៊ីបានកាន់កាប់អគាររដ្ឋាភិបាលនានាក្នុងទីក្រុងជាច្រើន ដែលកងទ័ពអ៊ុយក្រែនពុំអាចបណ្តេញពួកគេចេញ ។
ទោះបីយ៉ាងណា ពួកសកម្មប្រយុទ្ធស្និទ្ធរុស្ស៊ីបដិសេធមិនគោរពតាមកិច្ចព្រមព្រៀងនោះ ហើយទាមទារឱ្យរដ្ឋាភិបាលក្រុងគៀវលាលែងចេញ ។
លោកស្រីស៊ូសាន រ៉ៃ ទីប្រឹក្សាសន្តិសុខជាតិរបស់សេតវិមានក្នុងសន្និសីទសារព័ត៌មានមួយថ្លែងថា យើងតាមដានមើលរុស្ស៊ីថា តើទទួលខុសត្រូវដែរឬអត់ក្នុងការប្រើឥទ្ធិពលរបស់ខ្លួនដើម្បីរាំងខ្ទប់ និងធ្វើបែបណាឱ្យពួកជីវពលមិនរៀបរយដកថយចេញពីបណ្តាអគាររដ្ឋដែលពួកគេកាន់កាប់ ។ ប្រសិនបើយើងពុំពិនិត្យឃើញថា បណ្តាកិច្ចសន្យាដែលរុស្ស៊ីបានធ្វើនៅក្រុងហ្សឺណែវ ពុំត្រូវបានបំពេញ នោះច្បាស់ណាស់ដែលបណ្តាដៃគូអឺរុ៉ប និងយើងខ្លួនឯងផ្ទាល់ត្រៀមដាក់ទណ្ឌកម្មថែមទៀតប្រឆាំងរុស្ស៊ី ៕
ចែករំលែកព័តមាននេះ