ខេត្តពោធិ៍សាត់ ៖ ប្ដីកំណាចម្នាក់ពេលត្រឡប់មកពីផឹកស៊ីវិញ បើកឆ្នាំងបាយអត់មានបាយក៍កើតក្ដីខឹងសម្បារវាយប្រពន្ធរហូតដល់សន្លប់រួចហើយបើកឡានចេញទៅណាបាត់ពីរបីថ្ងៃ លុះពេលត្រឡប់ចូលផ្ទះវិញប្រពន្ធប្ដឹងសមត្ថកិច្ចឲ្យឃាត់ខ្លួនតែម្ដង។
ករណីអំពើហិង្សាក្នុងគ្រួសារនេះបានកើតឡើងកាលពីថ្ងៃទី១៤ មេសាវេលាម៉ោង៧យប់ ចំថ្ងៃបុណ្យចូលឆ្នាំទីមួយនៅភូមិស្ទឹងថ្មី ឃុំប្រមោយ ស្រុកវាលវែង។ លោក ធាង ឡេង អធិការនគរបាលស្រុកវាលវែងឲ្យដឹងថា ជនសង្ស័យដែលឃាត់ខ្លួននេះឈ្មោះភី ឈុនលី អាយុ២៥ឆ្នាំ រស់នៅភូមិឃុំកើតហេតុខាងលើមានមុខរបរជាអ្នករត់តាក់ស៊ី(វាលវែង-ពោធិ៍សាត់)។
តាមការរៀបរាប់របស់ស្ត្រីជាប្រពន្ធឈ្មោះពៅ សាលួន ឲ្យដឹងថា ប្ដីរបស់នាងកាចសាហាវណាស់តាំងពីបានគ្នាជាប្ដីប្រពន្ធមកមិនដែលមានសុភមង្គលទេ ពេលស្រវឹងស្រាម្ដងៗបង្កតែរឿងវាយទាត់ធាក់ឈ្លោះប្រកែកគ្នារាល់លើក។ជាក់ស្ដែងនៅយប់ចូលឆ្នាំថ្ងៃដំបូងនោះពេលត្រឡប់មកពីផឹកស៊ីវិញគាត់បានរករឿងវាយទាត់ធាក់ បោចសក់ និងទះកំផ្លៀងនាងរហូតដល់សន្លប់។ ដោយទ្រាំលែងបាន និងបន្ទាប់ពីដឹងថាគាត់ជក់ថ្នាំញៀនទៀតនោះនាងក៍ប្ដឹងសមត្ថកិច្ចឲ្យឃាត់ខ្លួនតែម្ដង។
នៅចំពោះមុខសមត្ថកិច្ចជនសង្ស័យឈ្មោះភី ឈុនលី បានឆ្លើយសារភាពថា ខ្លួនពិតជាបានវាយដំប្រពន្ធមែន ដោយសារថ្ងៃនោះប្រពន្ធអត់ដាំបាយឲ្យហូប ពេលខ្លួនសួរនាំស្រាប់តែនាងស្រែកក្ដែងៗឲ្យទៅទិញបាយផ្សារហើយប្រើពាក្យមិនសមរម្យទៀតធ្វើឲ្យខ្លួនខ្មាស់គេខ្លាំងណាស់។ពេលនោះផ្ទុះកំហឹងក៍ស្ទុះទៅវាយទាត់ធាក់រួចហើយបើកឡានទៅដេកនៅទីប្រជុំជនខេត្តពោធិ៍សាត់ពីរបីយប់ទើបត្រឡប់មកវិញក៍ត្រូវសមត្ថកិច្ចឃាត់ខ្លួន។
ចែករំលែកព័តមាននេះ