ខេត្តកំពង់ឆ្នាំង ៖ រថយន្តចំណុះ២តោនកន្លះដែលមានផ្ទុកអង្ករពេញមួយគ្រឿង ខណៈដែលធ្វើដំណើរពីខេត្តបាត់ដំបង ទៅរាជធានីភ្នំពេញបានផ្ទុះកង់ក្រោយទាំងសងខាង បណ្តាលឱ្យក្រឡាប់បះជើងឡើងលើ កាលពីវេលាម៉ោង៩ និង៥០នាទីយប់ថ្ងៃទី១៨ មេសា ២០១៤ ស្ថិតនៅតាមបណ្តោយផ្លូវជាតិលេខ៥ ក្នុងភូមិស្នោ ឃុំពពេល ស្រុកបរិបូរណ៍ ប៉ុន្តែសំណាងល្អមិនមានអ្នករងគ្រោះ ឬស្លាប់នោះទេ ។
ប្រភពបានឱ្យដឹងថា អ្នកបើកបរមិនត្រូវបានស្គាល់អត្តសញ្ញាណទេ បើករថយន្តពាក់ស្លាកលេខភ្នំពេញ 3B-1392 មានដឹកអង្ករ ក្នុងដំណើរពីជើងទៅត្បូង លុះពេលមកដល់ចំណុចកើតហេតុ ស្រាប់តែរថយន្តនោះផ្ទុះកង់ខាងក្រោយខាងឆ្វេងទាំង២គ្រាប់ បណ្តាលឱ្យអ្នកបើកបរជាន់ហ្វ្រាំងបង្ខំអូសជាង៣០ម៉ែត្រ រួចបានក្រឡាប់បះជើងតែម្តង ។
មន្រ្តីប៉ូលិសចរាចរខេត្តបាននិយាយថា កត្តាគ្រោះថ្នាក់ខាងលើនេះ គឺបណ្តាលមកពីការធ្វេសប្រហែសរបស់អ្នកបើកបរដែលនៅតែប្រើកង់រថយន្តចាស់ៗ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ