រាជធានីភ្នំពេញ ៖ គណបក្សសង្គ្រោះជាតិ នៅថ្ងៃទី១៨ មេសា បានសរសេរលិខិតមួយច្បាប់ដាក់ជូនទៅសាលារាជធានីភ្នំពេញ ដើម្បីសុំទីលានប្រជាធិបតេយ្យ ឬសួនការ៉ូឡាខាងកើតចំហៀងខាងត្បូងវត្ដបទុមវតី ធ្វើការឃោសនាបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង ស្រុក និងខណ្ឌ អាណត្ដិទី២ ។
យោងតាមលិខិតមួយច្បាប់ចុះថ្ងៃទី១៨ មេសា ដែលចុះហត្ថលេខាដោយលោក ម៉ន ផល្លា គណៈកម្មាធិការប្រតិបត្ដិការរាជធានីភ្នំពេញ ដាក់ជូនលោកអភិបាលរាជធានីភ្នំពេញ ស្នើសុំទីលានប្រជាធិបតេយ្យ ឬសួនការ៉ូឡាខាងកើតចំហៀងខាងត្បូងវត្ដបទុមវតី ដើម្បីជួបជុំធ្វើការឃោសនាបោះឆ្នោតជ្រើសរើសក្រុមប្រឹក្សារាជធានី និងក្រុមប្រឹក្សាខណ្ឌ នៃរាជធានីភ្នំពេញ។
ក្នុងកម្មវត្ថុលិខិតរបស់គណបក្សសង្គ្រោះជាតិ ដាក់សំណើទៅសាលារាជធានីភ្នំពេញ ដើម្បីជួបជុំឃោសនាបោះឆ្នោតបានលើកឡើងថា គណបក្សសង្គ្រោះជាតិរាជធានីភ្នំពេញនឹងធ្វើការជួបជុំតំណាងរាស្រ្ដ សមាជិក-សមាជិកាក្រុមប្រឹក្សារាជធានី ក្រុមប្រឹក្សាខណ្ឌ ក្រុមប្រឹក្សាសង្កាត់ សកម្មជន និងប្រជាពលរដ្ឋ ដើម្បីហែក្បួនយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ខណ្ឌ នីតិកាលទី២ ឆ្នាំ២០១៤ ចាប់ពីថ្ងៃបើកយុទ្ធនាការនៅថ្ងៃទី២ ឧសភា ឆ្នាំ២០១៤ តាមផ្លូវនានាទូទាំងរាជធានីភ្នំពេញ រហូតដល់ថ្ងៃបិទយុទ្ធនាការនៅថ្ងៃទី១៦ ឧសភា ឆ្នាំ២០១៥ ។
ក្នុងលិខិតរបស់គណបក្សសង្គ្រោះជាតិ មិនបានបង្ហាញពីផែនទីផ្លូវណាខ្លះសម្រាប់ដង្ហែក្បួនទេ ដោយគ្រាន់តែលើកឡើងថា នឹងភ្ជាប់ផែនទីតម្រាយផ្លូវនៅពេលក្រោយ ។ គួរបញ្ជាក់ថា លិខិតដែលគណបក្សសង្គ្រោះជាតិដាក់ជូនសាលារាជធានីភ្នំពេញ ត្រូវបានមន្ដ្រី សាលារាជធានីចុះហត្ថលេខាទទួលយកហើយ ប៉ុន្ដែមិនទាន់ដឹងលទ្ធផលថា សាលារាជធានីភ្នំពេញអនុញ្ញាត ឬមិនអនុញ្ញាតនៅឡើយទេ ។ អ្នកនាំពាក្យសាលារាធានីភ្នំពេញ លោក ឡុង ឌីម៉ង់ មិនទាន់សុំការបំភ្លឺបាននៅឡើយទេ ។
យោងតាមសេចក្តីណែនាំរបស់គណៈកម្មាធិការជាតិរៀបចំការបោះឆ្នោត (គ.ជ.ប) ចេញផ្សាយកាលពីថ្ងៃទី១២ មេសា ឆ្នាំ២០១៤ ឱ្យដឹងថា ដើម្បីពង្រឹងការឃោសនាបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង ស្រុក-ខណ្ឌ អាណត្តិទី២ ឆ្នាំ២០១៤នេះ គ.ជ.ប សូមធ្វើការណែនាំដល់គណបក្សនយោបាយ ដែលបានចូលរួមក្នុងការបោះឆ្នោតនេះ គឺគណបក្ស បេក្ខជន ឬតំណាងគណបក្ស មិនត្រូវប្រើប្រាស់ពាក្យសម្តីប្រមាថមើលងាយដល់គណបក្ស ឬបេក្ខជន ឬតំណាងគណបក្សណាមួយឡើយ ។ មិនត្រូវជំរុញឱ្យមានការប្រព្រឹត្តអំពើហិង្សា ឬបំភិតបំភ័យក្នុងការឃោសនា និងមិនត្រូវប្រើពាក្យសម្តី ឬជាលាយលក្ខណ៍អក្សរដោយយកព្រឹត្តិការណ៍គួរឱ្យតក់ស្លុតពីអតីតកាលមកនិយាយ ដូចជាឃាតកម្ម ការវាយដំ ការរំលោភ ឬការបំផ្លិចបំផ្លាញទ្រព្យសម្បត្តិរបស់នរណាម្នាក់ ឬក្រុមណាមួយឡើយ។
គ.ជ.ប បញ្ជាក់ថា ការឃោសនាបោះឆ្នោត មានទិសដៅឱ្យគណបក្សនយោបាយ និងបេក្ខជនឈរឈ្មោះបោះឆ្នោត ធ្វើការផ្សព្វផ្សាយកម្មវិធីនយោបាយរបស់ខ្លួនដល់អ្នកបោះឆ្នោត ។ គណបក្សនយោបាយ បេក្ខជន ឬតំណាងគណបក្សនយោបាយ មិនត្រូវប្រើភាសាអសីលធម៌ បង្ហាញពីការគំរាមកំហែង ញុះញង់ឱ្យមានអំពើហិង្សា គំរាមកំហែង ប្រឆាំងអ្នកបោះឆ្នោត ឬគណបក្សនយោបាយ ឬបេក្ខជនឈរឈ្មោះបោះឆ្នោត ។ មិនត្រូវសាបព្រោះភាពភ័យខ្លាច ធ្វើឱ្យភាន់ច្រឡំ និងខូចសណ្តាប់ធ្នាប់សង្គម និងមិនត្រូវនិយាយរិះគន់រើសអើងប្រកាន់បក្សពួក ជាតិសាសន៍ ភេទ ឋានៈក្នុងសង្គម សាសនា គ្រប់រូបភាព ។
គ.ជ.ប បានបន្ថែមថា គណបក្សនយោបាយមិនត្រូវយកទីសាធារណៈ ឬសាលសាធារណៈ ធ្វើជាទីកន្លែងឃោសនាបោះឆ្នោតអចិន្ត្រៃយ៍ឡើយ ។ គណបក្សនយោបាយ បេក្ខជន ឬអ្នកគាំទ្រ នៃគណបក្សនយោបាយ មិនត្រូវឱ្យមានសកម្មភាពនៃការឃោសនាបោះឆ្នោត ក្លាយទៅជាសកម្មភាពបាតុកម្មតវ៉ាប្រឆាំង ឬទាមទារដែលផ្ទុយពីគោលការណ៍ឃោសនា ត្រូវតែរក្សាសណ្តាប់ធ្នាប់សាធារណៈ និងគោរពច្បាប់ចរាចរណ៍ ។ គណបក្សនយោបាយ ឬបេក្ខជន ឬអ្នកគាំទ្រគណបក្សនយោបាយទាំងឡាយណាដែលអនុវត្ដការឃោសនាបោះឆ្នោតផ្ទុយពីខ្លឹមសារ និងសកម្មភាពឃោសនាខាងលើនឹងត្រូវទទួលខុសត្រូវចំពោះមុខច្បាប់ ។
ស្របពេលដែល គ.ជ.ប បានចេញសេចក្ដីណែនាំរបស់ខ្លួន ដើម្បីជូនដំណឹងដល់គណបក្សនយោបាយដែលបានចុះឈ្មោះក្នុងការចូលរួមបោះឆ្នោតជ្រើសរើសក្រុមប្រឹក្សារាជធានី ខេត្ដ ក្រុង ស្រុក និងខណ្ឌលើកទី២ គណបក្សប្រជាជនកម្ពុជា បានចេញផ្សាយនូវគោលនយោបាយចំនួន៩របស់ខ្លួនក្នុងគោលបំណងទាក់ទាញអ្នកគាំទ្រឱ្យបោះឆ្នោតជូនគណបក្សប្រជាជនកម្ពុជា ដែលការឃោសនានឹងប្រព្រឹត្ដទៅចាប់ពីថ្ងៃទី២ដល់ថ្ងៃទី១៦ ឧសភា ឆ្នាំ២០១៤ ហើយការបោះឆ្នោតនឹងប្រព្រឹត្ដនៅថ្ងៃទី១៨ ឧសភា ខាងមុខ ។
គណបក្សប្រជាជនកម្ពុជាបានបញ្ជាក់ថា អនុវត្ដគោលនយោបាយរបស់គណបក្សប្រជាជនកម្ពុជា ដើម្បីកសាងនិងការពារមាតុភូមិកម្ពុជា ឆ្នាំ២០១៣-២០១៨ គណបក្សមានគោលដៅសំខាន់ៗរួមមាន ការការពារសន្ដិសុខ សណ្ដាប់ធ្នាប់ និងសុវត្ថិភាពសង្គមនៅ គ្រប់មូលដ្ឋាន ដើម្បីធានារ៉ាប់រងដល់ការអនុវត្ដគ្រប់វិស័យ និងជីវភាពរស់នៅដ៏សុខសាន្ដរបស់ប្រជាពលរដ្ឋ។
គោលនយោបាយចំនួន៩ចំណុច សម្រាប់ការបោះឆ្នោតជ្រើសរើសសមាជិកក្រុមប្រឹក្សារាជធានីខេត្ដ ក្រុង ស្រុក ខណ្ឌ នាថ្ងៃទី១៨ ឧសភា ឆ្នាំ២០១៤ រួមមាន ការសន្យាដំឡើងប្រាក់ខែមន្ដ្រីរាជការ និងកងកម្លាំងប្រដាប់អាវុធ ចំនួន១លានរៀល និង១៦០ដុល្លារ សម្រាប់កម្មកររោងចក្រនៅឆ្នាំ២០១៨ និងការដោះស្រាយដីធ្លីជាដើម ។
គោលនយោបាយទាំង៩ចំណុច របស់គណបក្សប្រជាជនកម្ពុជា ត្រូវបានផ្សព្វផ្សាយតាមរយៈសេចក្ដីប្រកាសចុះថ្ងៃទី១២ មេសា ឆ្នាំ២០១៤ ។ គោលនយោបាយនោះក៏ត្រូវបានបង្ហោះនៅក្នុងគេហទំព័រផ្លូវការរបស់គណបក្សប្រជាជនកម្ពុជា ដើម្បីសាទរឆ្នាំថ្មីដែលចូលមកដល់នាថ្ងៃទី១៤ មេសា ឆ្នាំ២០១៤ ។ ក្រៅពីលើកឡើងពីការដំឡើងប្រាក់ខែមន្ដ្រីរាជការ កងកម្លាំងប្រដាប់អាវុធ និងបញ្ហាដីធ្លី គណបក្សប្រជាជនកម្ពុជា បានលើកឡើងពីអភិបាលកិច្ចល្អ សណ្ដាប់ធ្នាប់សង្គម និងការអភិវឌ្ឍសម្រាប់ធ្វើជាគោលនយោបាយអាទិភាពក្នុងការឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ដក្រុង ស្រុក ខណ្ឌ ផងដែរ ។
យុទ្ធនាការឃោសនាបោះឆ្នោតនេះនឹងធ្វើឡើងនៅថ្ងៃទី២ ឧសភា និងបញ្ចប់នៅថ្ងៃទី១៦ឧសភា ។ រីឯថ្ងៃបោះឆ្នោត ដែលធ្វើទ្បើងជាអសកល មានតែសមាជិកក្រុមប្រឹក្សាឃុំសង្កាត់សរុប១១.៤៥៩នាក់ គឺជាអ្នកបោះឆ្នោត ហើយពួកគាត់មានសិទ្ធិកាន់សន្លឹកឆ្នោតម្នាក់ពីរ មានន័យថា ពួកគាត់អាចបោះឆ្នោតជ្រើសរើសក្រុមប្រឹក្សារាជធានី-ខេត្ត និងក្រុមប្រឹក្សាក្រុង ស្រុក-ខណ្ឌក្នុងពេលតែមួយ តែហិបឆ្នោតខុសគ្នា ។
មានគណបក្សចំនួន៥ បានចុះឈ្មោះ ចូលរួមការបោះឆ្នោត ជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ ។ សមាជិកក្រុមប្រឹក្សារាជធានី-ខេត្តចំនួន៣៩៣នាក់ និងក្រុមប្រឹក្សាក្រុង ស្រុក-ខណ្ឌចំនួន២៩៣១នាក់ នឹងត្រូវបោះឆ្នោតជ្រើសរើស ក្នុងនោះ មានការិយាល័យបោះឆ្នោតចំនួន១៩៧នៅទូទាំងប្រទេស ដែលនឹងដំណើរការបោះឆ្នោតនៅថ្ងៃទី១៨ ឧសភា ឆ្នាំ២០១៤ ៕
ចែករំលែកព័តមាននេះ