ខេត្ដបាត់ដំបង ៖ បុរសម្នាក់ ត្រូវជនមិនស្គាល់មុខ២នាក់ប្រើកាំភ្លើងអាកាបា.ញ់ចំនួន២គ្រាប់ត្រូវចំដើមទ្រូងបណ្ដាលឱ្យស្លា.ប់ភ្លាមៗនៅក្បែរកាំជណ្ដើរផ្ទះ រួចភ្ជង់ប្រពន្ធប្លន់យកទ្រព្យសម្បត្ដិអស់គ្មានសល់ និងយកម៉ូតូ១គ្រឿងជិះចេញទៅបាត់ កាលពីវេលាម៉ោងជាង៧យប់ថ្ងៃទី១៦ មេសា នៅក្នុងភូមិចុងពរ ឃុំព្រៃត្រឡាច ស្រុករុក្ខគិរី ។
ខេត្ដបាត់ដំបង ៖ បុរសម្នាក់ ត្រូវជនមិនស្គាល់មុខ២នាក់ប្រើកាំភ្លើងអាកាបាញ់ចំនួន២គ្រាប់ត្រូវចំដើមទ្រូងបណ្ដាលឱ្យស្លាប់ភ្លាមៗនៅក្បែរកាំជណ្ដើរផ្ទះ រួចភ្ជង់ប្រពន្ធប្លន់យកទ្រព្យសម្បត្ដិអស់គ្មានសល់ និងយកម៉ូតូ១គ្រឿងជិះចេញទៅបាត់ កាលពីវេលាម៉ោងជាង៧យប់ថ្ងៃទី១៦ មេសា នៅក្នុងភូមិចុងពរ ឃុំព្រៃត្រឡាច ស្រុករុក្ខគិរី ។
ជនរងគ្រោះដែលត្រូវចោរបាញ់សម្លាប់ឈ្មោះ វិត ពឿត អាយុ ៤៤ឆ្នាំ រីឯប្រពន្ធឈ្មោះ នឿន ធី អាយុ ៤២ឆ្នាំ រស់នៅក្នុងភូមិ-ឃុំខាងលើ ។ សមត្ថកិច្ចបានឱ្យដឹងថា ជនដៃដល់មានគ្នា២នាក់ប្រដាប់ដោយកាំភ្លើងវែងខ្លីគ្រប់ដៃ បានចូលទៅបាញ់សម្លាប់ប្ដី និងភ្ជង់ប្រពន្ធប្លន់យកទ្រព្យសម្បត្ដិ ។ បុរសជាប្ដីត្រូវក្រុមចោរប្រើកាំភ្លើងអាកាបាញ់ចំដើមទ្រូងចំនួន២គ្រាប់ និង១គ្រាប់ទៀតបាញ់គំរាមអ្នកភូមិដែលព្យាយាមចូលជួយពេលកើតហេតុ ។
បើតាមស្រ្ដីជាប្រពន្ធបានប្រាប់សមត្ថកិច្ចថា មុនពេលកើតហេតុ ប្ដីរបស់គាត់បានឡើងសម្រាកលើគ្រែក្រោមផ្ទះ ខណៈស្រវឹងស្រឿងៗ រីឯរូបគាត់ងូតទឹករួចបានឡើងទៅលើផ្ទះ ។ ពេលឡើងដល់លើផ្ទះ ស្រាប់តែមានបុរស២នាក់ឡើងតាមគាត់ដល់លើផ្ទះ ហើយដកកាំភ្លើងភ្ជង់គាត់ ។ ក្នុងចំណោមជនទាំង២នាក់នោះ មានម្នាក់ស្លៀកខោប៉ារ៉ាពាក់ម៉ាស់មុខកាន់កាំភ្លើងខ្លី និងម្នាក់ទៀតស្លៀកពាក់ស៊ីវិលកាន់កាំភ្លើងវែង ដែលសង្ស័យថាជាកាំភ្លើងអាកា ។
ប្រពន្ធរបស់ជនរងគ្រោះបញ្ជាក់ថា ពេលជនទាំង២នាក់ភ្ជង់ស្រែកគំរាមសម្លាប់គាត់ ប្ដីគាត់ដែលសម្រាកក្រោមផ្ទះឮ ហើយងើបដើរមកខាងមុខជណ្ដើររួចសួរថា អ្នកណាឡូឡាអីលើផ្ទះ? ស្រាប់តែជនម្នាក់កាន់កាំភ្លើងខ្លីស្រែកបញ្ជាឱ្យអ្នកកាន់កាំភ្លើងវែងបាញ់ប្ដីគាត់ចំនួន២គ្រាប់ចំដើមទ្រូងបណ្ដាលឱ្យស្លាប់តែម្ដង ។ បន្ទាប់ពីបាញ់សម្លាប់ប្ដីគាត់ហើយ ជនទាំង២នាក់បានគំរាមឱ្យគាត់ប្រមូលទ្រព្យសម្បត្ដិឱ្យវាទាំងអស់ ព្រមទាំងបានបាញ់គំរាម១គ្រាប់ទៀតពេលអ្នកភូមិក្បែរនោះព្យាយាមចូលជួយ ។
អ្នកភូមិនិយាយថា គ្មានអ្នកណាបានដឹងពីដំបូងថា មានរឿងអ្វីកើតឡើងទេ តែអ្នកភូមិបានភ្ញាក់ផ្អើលពេលឮស្នូរបាញ់កាំភ្លើងផ្ទួនៗ ដែលគេខានឮស្នូរកាំភ្លើងបែបនេះជាច្រើនឆ្នាំមកហើយ ។ អ្នកភូមិបន្ដថា ពួកគាត់បាននាំគ្នាចេញទៅកាន់ប្រភពនៃកន្លែងផ្ទុះនោះ តែត្រូវក្រុមចោរបាញ់គំរាម១គ្រាប់ជាមួយនឹងសំឡេងស្រែកគំរាមបាញ់សម្លាប់ ទើបអ្នកភូមិមិនហ៊ានចូល និងថែមទាំងដឹងថា មានចោរកំពុងប្លន់ផ្ទះជនរងគ្រោះទៀតផង ។
ជុំវិញករណីនេះ សមត្ថកិច្ចមិនទាន់សន្និដ្ឋានបែបណានៅឡើយទេ តែអាចសន្និដ្ឋានជាបឋមថា ក្រុមចោរអាចជាមនុស្សដែលធ្លាប់ចេញចូលក្នុងភូមិ និងស្គាល់គ្រួសារជនរងគ្រោះទៀតផង ព្រោះជនសង្ស័យម្នាក់ត្រូវស្រ្ដីជាប្រពន្ធឃើញពាក់ម៉ាស់បិទមុខ ។ សមត្ថកិច្ចនិយាយថា ជនទាំង២នាក់អាចមានបក្សពួកជាអ្នកដឹកមកទម្លាក់នៅកន្លែងណាមួយ រួចដើរចូលទៅផ្ទះជនរងគ្រោះធ្វើសកម្មភាពប្លន់តែម្ដង ។
សូមបញ្ជាក់ថា ក្នុងរយៈពេលជាងមួយសប្ដាហ៍កន្លងទៅនេះ អំពើប្លន់បានកើតឡើងចំនួន៣លើកផ្ទួនៗក្នុងខេត្ដបាត់ដំបង ដែល២លើកកើតឡើងនៅស្រុកកំរៀង និង១លើកនៅស្រុករុក្ខគិរី ហើយជនរងគ្រោះ២នាក់បានស្លាប់និងម្នាក់រងរបួស ។ ក្នុងចំណោមនោះ មានជនដៃដល់ម្នាក់បានឃាត់ខ្លួនបញ្ជូនទៅសាលាដំបូងខេត្ដ ក្រៅពីនេះសមត្ថកិច្ចនៅមិនទាន់ប្រាកដក្នុងការកំណត់មុខសញ្ញានៅឡើយ ៕
ចែករំលែកព័តមាននេះ