រាជធានីភ្នំពេញ ៖ កម្មករក្រុមហ៊ុនស៊ីនទ្រីម្នាក់ទើបចេញពីផឹកជិះម៉ូតូធុនសេ១០០កូរ៉េ ពណ៌ព្រីងទុំលាយក្រហមមួយគ្រឿង ទៅបុកពីក្រោយរថយន្តមួយគ្រឿងដែលកំពុងតែឈប់ស្តុប បណ្តាលឱ្យដួលសន្លប់មួយសន្ទុះហើយដឹងខ្លួនវិញ។ ទោះបីជាយ៉ាងណា ម្ចាស់រថយន្តពុំទារសងការខូចខាតឡើយ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១រសៀលថ្ងៃទី១៨ មេសា នៅតាមវិថីមហាវិថីសេនាប្រមុខគឹមអ៊ីលស៊ុង មុខសណ្ឋាគារឡុងប៊ិចផ្លាហ្សា ក្នុងសង្កាត់បឹងកក់ទី១ ខណ្ឌទួលគោក។ ជនរងគ្រោះឈ្មោះហែម តុលា ភេទប្រុស អាយុ៣៣ឆ្នាំ ជាកម្មករក្រុមហ៊ុនស៊ីនទ្រី ស្នាក់នៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។
សាក្សីឱ្យដឹងថា នៅមុនពេលកើតហេតុ កម្មករខាងលើស្ថិតនៅក្នុងស្ថានភាពស្រវឹង បានជិះម៉ូតូធុនសេ១០០កូរ៉េ ទិសដៅពីត្បូងទៅជើងដោយល្បឿនលឿន។ ពេលមកដល់ចំណុចកើតហេតុដែលជាចំណុចស្តុប ស្រាប់តែម៉ូតូនោះបុកពីក្រោយរថយន្តម៉ាកតូយ៉ូតា ពណ៌ខ្មៅ ពាក់ស្លាកលេខភ្នំពេញ២W.0036 មួយគ្រឿងពេញទំហឹង បណ្តាលឱ្យដួលបោកទៅលើថ្នល់សន្លប់ដេកស្តូកស្តឹង។
ភ្លាមៗនគរបាលដែលនៅក្បែរនោះបាននាំគ្នារត់ទៅជួយលើកម៉ូតូប្រុងហៅរថយន្តពេទ្យ តែកម្មកររូបនោះដឹងខ្លួនវិញ។ បន្ទាប់ពីមានគ្រោះថ្នាក់ អ្នកបើកបររថយន្តបានចុះពីលើរថយន្តមើលនឹកហួសចិត្តដែលជិះម៉ូតូមកបុករថយន្តដែលកំពុងឈប់ស្តុប រួចក៍បានឡើងជិះរថយន្តទៅបាត់ទៅ ព្រោះរបួសស្រាលដោយអ្នករងរបួសដឹងខ្លួនវិញ ៕
ចែករំលែកព័តមាននេះ